Tamil Nadu Exit Polls: తమిళనాడు ఎగ్జిట్‌ పోల్స్‌ ఏం చెబుతున్నాయంటే?...ఆ పార్టీదే విజయం?

Tamil Nadu Exit Polls  2026 : తమిళనాడు అసెంబ్లీ ఎన్నికల్లో అధికార డీఎంకే (DMK)(Tamil Nadu DMK) కూటమి మరోసారి అధికారాన్ని చేజిక్కించుకోనుందని 'పీపుల్స్ పల్స్' ఎగ్జిట్ పోల్(exit-polls) సర్వే స్పష్టం చేసింది. రాష్ట్ర చరిత్రలో రికార్డు స్థాయిలో 84 శాతం ఓటింగ్ నమోదు కాగా, డీఎంకే కూటమి 125 నుండి 145 స్థానాలను గెలుచుకుని మ్యాజిక్ ఫిగర్ 118ని సులభంగా దాటుతుందని అంచనా. డీఎంకే కూటమి 38.4 శాతం ఓట్లతో ఆధిపత్యం ప్రదర్శించగా, ప్రధాన ప్రతిపక్షం ఏఐడీఎంకే (AIADMK) 65-80 స్థానాలకు పరిమితమయ్యే అవకాశం కనిపిస్తోంది. నటుడు విజయ్ నేతృత్వంలోని టీవీకే (TVK) పార్టీ 18-24 స్థానాల్లో గెలుపొంది, రాష్ట్ర రాజకీయాల్లో గణనీయమైన ప్రభావాన్ని చూపనుంది.

ఈ ఎన్నికల్లో మహిళా ఓటర్లు , ముస్లింలు డీఎంకే వైపు మొగ్గు చూపడం ఆ కూటమికి కలిసొచ్చింది. ప్రభుత్వ పథకాల పట్ల ఆకర్షితులైన మహిళల్లో 37.8 శాతం మంది డీఎంకేకు మద్దతు పలకగా, టీవీకే 26 శాతం ఓట్లను చీల్చుకుంది. యువ ఓటర్లపై విజయ్(actor-vijay) భారీ ఆశలు పెట్టుకున్నప్పటికీ, 18-24 ఏళ్ల మధ్య ఉన్న నూతన ఓటర్లలో 34.9 శాతం మంది డీఎంకేకే జై కొట్టారు. డీఎంకే వ్యతిరేక ఓట్లు టీవీకే , ఏఐడీఎంకే మధ్య చీలిపోవడం, అలాగే ఏఐడీఎంకే తన సంప్రదాయ ఓటు బ్యాంకును శశికళ, ఓపీఎస్, పీఎమ్‌కే (ఆర్) వంటి ఇతర శక్తుల వల్ల కోల్పోవడం ఆ పార్టీని దెబ్బతీసింది.

ప్రధాన అభ్యర్థుల విషయానికొస్తే, ముఖ్యమంత్రి స్టాలిన్(CM MK Stalin) (కొలతూరు), మాజీ సీఎం పళనిస్వామి (ఎడప్పాడి), సీనియర్ నేత దురై మురుగన్ (కాట్పడి) తమ స్థానాల్లో విజయం దిశగా సాగుతున్నారు. టీవీకే అధినేత విజయ్ పెరంబూర్ నుండి గెలిచే అవకాశముండగా, ఈస్ట్ తిరుచిరాపల్లిలో వెనుకంజలో ఉన్నట్లు సర్వే వెల్లడించింది. మరోవైపు, ఉదయనిధి స్టాలిన్ (చపాక్), డీఎంకేలో చేరిన పన్నీరు సెల్వం (బోడినాయకనూర్), సౌమ్య అన్బమణి రాందాస్ (ధర్మపురి) తమ నియోజకవర్గాల్లో టీవీకే పార్టీ నుండి గట్టి పోటీని ఎదుర్కొంటున్నారు.

బీజేపీకి ఈ ఎన్నికల్లో మిశ్రమ ఫలితాలు వచ్చే అవకాశం ఉంది. సత్తూరు నుండి పోటీ చేస్తున్న బీజేపీ నేత నయనార్ నాగేందర్ గెలిచే అవకాశం ఉండగా, మైలాపూర్‌లో పోటీ చేస్తున్న తమిళ సై టీవీకే చేతిలో ఓడిపోయే పరిస్థితి కనిపిస్తోంది. అలాగే కాంగ్రెస్ రాష్ట్ర అధ్యక్షుడు సెల్వ (శ్రీపెరంబదూర్), డీఎండీకే చీఫ్ ప్రేమలత (విరుదాచలం) కూడా టీవీకే ధాటికి వెనుకబడినట్లు లేదా మూడో స్థానానికే పరిమితమైనట్లు తెలుస్తోంది. మొత్తంగా, ప్రభుత్వ వ్యతిరేక పవనాలు ఉన్నప్పటికీ, ఓట్ల చీలిక మరియు మహిళా ఓటర్ల మద్దతుతో డీఎంకే వరుసగా రెండోసారి అధికారం చేపట్టే దిశగా అడుగులు వేస్తోంది.

Also Read :  భారీ వర్షం.. గోడ కూలి ఏడుగురు మృతి

ఏఐఏడీఎంకేకు మెజారిటీ ?

కాగా ఈసారి ప్రతిపక్ష ఏఐఏడీఎంకే కూటమి విజయం సాధిస్తుందని VoteVibe,  CNN-News18 సర్వేలు వెల్లడించాయి. సర్వే ప్రకారం, ఏఐఏడీఎంకే కూటమికి 39.9 శాతం ఓట్లు, డీఎంకే కూటమికి 38.9 శాతం ఓట్లు వచ్చే అవకాశం ఉంది. కేవలం ఒక్క శాతం ఓట్ల తేడాతో ఏఐఏడీఎంకే కూటమి సుమారు 114 నుండి 124 స్థానాలను గెలుచుకుని, ప్రభుత్వం ఏర్పాటుకు అవసరమైన 118 స్థానాల మెజారిటీని సాధించవచ్చని విశ్లేషణలు చెబుతున్నాయి.

ఈ ఎన్నికల్లో నటుడు విజయ్ స్థాపించిన తమిళగ వెట్రి కళగం (TVK) మూడో శక్తిగా అవతరించి అందరి దృష్టిని ఆకర్షించింది. ఈ పార్టీకి సుమారు 15.8 శాతం ఓట్లు మరియు 4 నుండి 10 అసెంబ్లీ స్థానాలు రావచ్చని ఎగ్జిట్ పోల్స్ సూచిస్తున్నాయి. ముఖ్యంగా మహిళా ఓటర్లలో 18.1 శాతం మంది,18-24 ఏళ్ల యువతలో 25.1 శాతం మంది విజయ్ వైపు మొగ్గు చూపడం గమనార్హం. ముఖ్యమంత్రి అభ్యర్థిగా ఎంకే స్టాలిన్ 39.1 శాతంతో ప్రథమ స్థానంలో ఉండగా, ఎడప్పాడి పళనిస్వామి 38.4 శాతంతో , విజయ్ 14.1 శాతం మద్దతుతో తర్వాతి స్థానాల్లో నిలిచారు.

ఓటర్ల ధోరణిని పరిశీలిస్తే, యువత, మైనారిటీ వర్గాలు డీఎంకే కూటమికి అండగా నిలవగా, ఓబీసీ, ఉన్నత కులాల ఓటర్లు ఏఐఏడీఎంకే వైపు మొగ్గు చూపారు. ప్రాంతాల వారీగా ఉత్తర,పశ్చిమ తమిళనాడులో ఏఐఏడీఎంకే ఆధిక్యం ప్రదర్శించగా, డెల్టా, దక్షిణ ప్రాంతాల్లో డీఎంకే బలంగా ఉంది. గ్రామీణ ప్రాంతాల్లో ఏఐఏడీఎంకేకు, పట్టణ ప్రాంతాల్లో డీఎంకేకు స్వల్ప ఆదరణ లభించింది. పురుష ఓటర్లలో ఏఐఏడీఎంకే కూటమికి స్పష్టమైన ఆధిక్యం ఉండగా, మహిళా ఓటర్లలో డీఎంకే స్వల్పంగా ముందంజలో ఉంది.

ప్రజలు ప్రధానంగా నిరుద్యోగం (17.8%), ద్రవ్యోల్బణం (17.5%), మరియు డ్రగ్స్ సమస్యల ప్రాతిపదికన ఓటు వేసినట్లు సర్వేలు వెల్లడించాయి. ఎగ్జిట్ పోల్స్ అంచనాలు ఏఐఏడీఎంకేకు అనుకూలంగా ఉన్నప్పటికీ, రెండు ప్రధాన కూటముల మధ్య ఓట్ల శాతం తేడా చాలా తక్కువగా ఉండటంతో ఫలితం ఎటువైపైనా తిరిగే అవకాశం ఉంది. 234 స్థానాల భవితవ్యం తేల్చే తుది ఫలితాలు మే 4న వెలువడనున్నాయి, అప్పటి వరకు ఈ రాజకీయ ఉత్కంఠ కొనసాగనుంది.

Also Read :  ఈవీఎంలపై టేపులు.. భారీగా రిగ్గింగ్.. వెస్ట్ బెంగాల్ ఎన్నికల్లో గందరగోళం