Prime Minister Modi : మే 9న తెలంగాణకు ప్రధాని మోదీ..పరేడ్ గ్రౌండ్స్‌లో భారీ బహిరంగ సభ

Prime Minister Modi :   ప్రధాని నరేంద్ర మోదీ తెలంగాణ పర్యటన ఖరారు అయింది.దీంతో  రాష్ట్ర రాజకీయాల్లో పెనుమార్పులు చోటు చేసుకోనున్నాయి. మూడోసారి ప్రధానమంత్రిగా బాధ్యతలు చేపట్టిన తర్వాత మోదీ తెలంగాణకు రావడం ఇదే తొలిసారి కావడంతో ఈ పర్యటనపై సర్వత్రా ఆసక్తి నెలకొంది. ప్రధాని మోదీ మే 9న తెలంగాణకు చేరుకోనున్నారు. ఈ పర్యటనలో ఆయన ప్రధానంగా రెండు అంశాలపై దృష్టి సారించనున్నారు. ఒకటి రాష్ట్రంలో కేంద్ర ప్రభుత్వం చేపట్టిన పలు అభివృద్ధి పనుల ప్రారంభోత్సవాలు,శంకుస్థాపనలు కాగా, రెండోది పార్టీ శ్రేణుల్లో ఉత్సాహం నింపేలా భారీ బహిరంగ సభలో పాల్గొనడం.

 ప్రధాని రాకను పురస్కరించుకుని హైదరాబాద్‌లోని సికింద్రాబాద్ పరేడ్ గ్రౌండ్స్‌లో భారతీయ జనతా పార్టీ (బీజేపీ) భారీ బహిరంగ సభకు ఏర్పాట్లు చేస్తోంది. మూడోసారి ప్రధానిగా బాధ్యతలు చేపట్టిన తర్వాత తొలిసారి వస్తున్నందున, ఈ సభను అత్యంత ప్రతిష్టాత్మకంగా నిర్వహించాలని భాజపా రాష్ట్ర నాయకత్వం నిర్ణయించింది. రాష్ట్రంలోని వివిధ జిల్లాల నుండి భారీ సంఖ్యలో కార్యకర్తలను, ప్రజలను తరలించేందుకు ప్రణాళికలు సిద్ధం చేస్తున్నారు.ప్రస్తుతం తెలంగాణలో నెలకొన్న రాజకీయ పరిణామాల నేపథ్యంలో మోదీ పర్యటన అత్యంత ప్రాధాన్యత సంతరించుకుంది.

రాష్ట్రంలో బలపడుతున్న బీజేపీకి ప్రధాని ప్రసంగం మరింత ఊపునిస్తుందని పార్టీ భావిస్తోంది. ఇటీవల కల్వకుంట్ల కవిత కొత్త పార్టీ ప్రకటించడం, మరోవైపు జనగణన ప్రక్రియ ప్రారంభం కానున్న తరుణంలో ప్రధాని మోదీ ఇచ్చే సందేశం కీలకం కానుంది. తెలంగాణ అభివృద్ధికి కేంద్రం కట్టుబడి ఉందనే సంకేతాన్ని ఇచ్చేందుకు పలు రైల్వే, రహదారి ప్రాజెక్టుల వివరాలను ఈ సందర్భంగా వెల్లడించే అవకాశం ఉంది.
 ప్రధాని పర్యటన నేపథ్యంలో హైదరాబాద్‌లో కట్టుదిట్టమైన భద్రతా ఏర్పాట్లు చేస్తున్నారు. ఎస్పీజీ (SPG) ఇప్పటికే రంగంలోకి దిగి పరేడ్ గ్రౌండ్స్ , ప్రధాని పర్యటించే ప్రాంతాలను తమ ఆధీనంలోకి తీసుకుంది. స్థానిక పోలీసులతో కలిసి భద్రతా సమీక్షలు నిర్వహిస్తున్నారు.మొత్తానికి, మే 9న మోదీ పర్యటన తెలంగాణ రాజకీయాల్లో కొత్త చర్చకు దారితీస్తుందనడంలో సందేహం లేదు. అభివృద్ధి మంత్రంతో పాటు, రాజకీయంగా ప్రత్యర్థులకు ఆయన ఎలాంటి హెచ్చరికలు జారీ చేస్తారో వేచి చూడాలి.