BRS (TRS) : తెలంగాణ రాజకీయ యవనికపై ఒక ప్రభంజనం...టీఆర్ఎస్ నుంచి బీఆర్ఎస్ వరకు సాగిన రెండున్నర దశాబ్దాల సుదీర్ఘ ప్రస్థానం

BRS (TRS) : భారతదేశ రాజకీయ చరిత్రలో, ముఖ్యంగా దక్షిణాది రాజకీయాల్లో తెలంగాణ రాజకీయ ముఖచిత్రాన్ని సమూలంగా మార్చివేసి, ఒక ప్రాంతీయ ఆకాంక్షను జాతీయ స్థాయికి తీసుకెళ్లిన అరుదైన చరిత్ర భారత్ రాష్ట్ర సమితి (బీఆర్ఎస్) సొంతం. 2001లో ఒక చిన్న రాజకీయ ఆలోచనగా మొదలై, ప్రత్యేక రాష్ట్ర సాధనే శ్వాసగా పోరాడి, పదేళ్ల పాటు అధికారాన్ని చెలాయించి, నేడు జాతీయ వేదికపై తన ఉనికిని చాటుకునేందుకు ప్రయత్నిస్తున్న ఈ పార్టీ ప్రస్థానం భారత రాజకీయాల్లోనే ఒక గొప్ప అధ్యాయం. తెలంగాణ ప్రత్యేక రాష్ట్ర సాధనే లక్ష్యంగా పుట్టిన ఈ పార్టీ, రెండు దశాబ్దాల పాటు అనేక మలుపులు, సంచలనాలు , వ్యూహాత్మక విజయాలను చూసింది.

జలదృశ్యంలో మొదలైన జై తెలంగాణ నినాదం

2001 ఏప్రిల్ 27వ తేదీ తెలంగాణ చరిత్రలో ఒక కీలక మలుపు. అప్పటి ఆంధ్రప్రదేశ్ శాసనసభ ఉపసభాపతి పదవికి, ఎమ్మెల్యే పదవికి,తెలుగుదేశం పార్టీకి రాజీనామా చేసిన కల్వకుంట్ల చంద్రశేఖర్ రావు (కేసీఆర్), కొండా లక్ష్మణ్ బాపూజీ నివాసమైన 'జలదృశ్యం' వేదికగా తెలంగాణ రాష్ట్ర సమితి (టీఆర్‌ఎస్‌)ని స్థాపించారు.  అప్పటికే అటకెక్కిన తెలంగాణ ఉద్యమాన్ని రాజకీయ పంథాలో పునరుజ్జీవింపజేయడం కేసీఆర్ ప్రధాన వ్యూహం."తెలంగాణ సాధనే ఏకైక లక్ష్యం" అని ప్రకటించిన కేసీఆర్‌తో పాటు వి. ప్రకాశ్, నాయిని నర్సింహారెడ్డి వంటి నేతలు నడిచారు. ప్రారంభంలో అనేక అవహేళనలు ఎదురైనా, కరీంనగర్ ఎస్ఆర్ఆర్ కాలేజీ గ్రౌండ్స్‌లో నిర్వహించిన తొలి బహిరంగ సభ ఉద్యమ సెగను ఢిల్లీకి తాకించింది.

ఉద్యమ వ్యూహకర్తగా కేసీఆర్: స్ట్రీట్ ఫైట్ నుంచి స్టేట్ ఫైట్ వరకు

కేసీఆర్ ఉద్యమాన్ని కేవలం భావోద్వేగంగా కాకుండా ఒక రాజకీయ వ్యూహంగా మలిచారు. 2004లో కాంగ్రెస్‌తో పొత్తు, యూపీఏ కనీస ఉమ్మడి ప్రణాళికలో తెలంగాణ అంశాన్ని చేర్చడం, రాష్ట్రపతి ప్రసంగంలో ప్రస్తావన వచ్చేలా చేయడం పార్టీ తొలి విజయాలు. అయితే కేంద్రం జాప్యం చేయడంతో రాజీనామాల పర్వం మొదలైంది. ఉప ఎన్నికల వ్యూహం: రాజీనామాలు చేయడం, మళ్లీ గెలవడం ద్వారా తెలంగాణ ఆకాంక్షను సజీవంగా ఉంచారు.2009 ఎన్నికల్లో ఆశించిన ఫలితాలు రాకపోవడంతో పార్టీ ఉనికి ప్రశ్నార్థకమైన తరుణంలో  కేసీఆర్ చేపట్టిన "చచ్చుడో.. తెలంగాణ వచ్చుడో" నినాదంతో చేసిన ఆమరణ నిరాహార దీక్ష దేశాన్ని కుదిపేసింది.

 ఈ దీక్షతో తెలంగాణ సమాజం మొత్తం ఏకమైంది. ఉస్మానియా విద్యార్థులు, ఉద్యోగ సంఘాలు రోడ్లపైకి వచ్చాయి. ఫలితంగా డిసెంబర్ 9, 2009న కేంద్రం తెలంగాణ ప్రకటన చేసింది. ఆ తర్వాత సీమాంధ్ర ఉద్యమాల వల్ల వెనక్కి తగ్గినా, పొలిటికల్ జేఏసీ ఆధ్వర్యంలో మిలియన్ మార్చ్, సకల జనుల సమ్మె వంటి కార్యక్రమాలతో టీఆర్ఎస్ కేంద్రంపై ఒత్తిడిని కొనసాగించింది. చివరకు 2014 ఫిబ్రవరిలో పార్లమెంట్ సాక్షిగా తెలంగాణ రాష్ట్రం సిద్ధమైంది.
 

 అధికార పీఠం.. సంక్షేమ పాలన.. హ్యాట్రిక్ మిస్

2014 జూన్ 2న తెలంగాణ ఆవిర్భవించిన తర్వాత జరిగిన మొదటి ఎన్నికల్లో టీఆర్‌ఎస్‌ ఘనవిజయం సాధించింది. కేసీఆర్ తొలి ముఖ్యమంత్రిగా బాధ్యతలు చేపట్టారు.2014 జూన్ 2న తెలంగాణ ఆవిర్భావంతో పాటు టీఆర్ఎస్ మొదటి ప్రభుత్వాన్ని ఏర్పాటు చేసింది. 63 అసెంబ్లీ స్థానాలతో అధికారంలోకి వచ్చిన కేసీఆర్, మిషన్ భగీరథ, మిషన్ కాకతీయ, రైతుబంధు వంటి పథకాలతో ప్రజల మన్ననలు పొందారు. హైదరాబాద్‌ను ఐటీ హబ్‌గా మార్చడం, ప్రపంచంలోనే అతిపెద్ద ఎత్తిపోతల పథకం కాళేశ్వరం నిర్మించడం వంటివి పార్టీకి తిరుగులేని బలాన్ని ఇచ్చాయి. దీంతో 2018 ముందస్తు ఎన్నికల్లో 88 సీట్లతో పార్టీ రెండోసారి భారీ విజయాన్ని అందుకుంది. కాళేశ్వరం ప్రాజెక్టు నిర్మాణం, హైదరాబాద్‌ను గ్లోబల్ సిటీగా మార్చడం వంటివి పార్టీ బలాన్ని పెంచాయి. అయితే, పదేళ్ల నిరంతర అధికార తర్వాత 2023 ఎన్నికల్లో ప్రజలు మార్పును కోరుకోవడంతో కాంగ్రెస్ చేతిలో పరాజయం ఎదురైంది.

జాతీయ ఆకాంక్ష: బీఆర్ఎస్‌గా రూపాంతరం

తెలంగాణ నమూనాను దేశవ్యాప్తంగా విస్తరించాలనే ఉద్దేశంతో 2022 అక్టోబర్ 5న దసరా పర్వదినాన తెలంగాణ రాష్ట్ర సమితి పేరును 'భారత్ రాష్ట్ర సమితి' (బీఆర్ఎస్)గా మారుస్తూ తీర్మానం చేశారు. డిసెంబర్ 2022లో కేంద్ర ఎన్నికల సంఘం దీనిని ఆమోదించడంతో ఢిల్లీలో జాతీయ కార్యాలయం ప్రారంభమైంది. గులాబీ జెండాపై తెలంగాణ మ్యాప్ స్థానంలో భారత దేశ పటాన్ని చేర్చి, 'జై భారత్' నినాదాన్ని ఎత్తుకున్నారు. మహారాష్ట్ర, పంజాబ్ వంటి రాష్ట్రాల్లో కూడా పార్టీ కార్యకలాపాలను విస్తరించే ప్రయత్నం చేశారు. ఖమ్మంలో భారీ బహిరంగ సభ నిర్వహించి ఇతర రాష్ట్రాల ముఖ్యమంత్రులతో జాతీయ వేదికను పంచుకున్నారు.

తెలంగాణ మోడల్‌ను దేశవ్యాప్తంగా పరిచయం చేయాలనే ఉద్దేశంతో, 2022 అక్టోబర్‌లో తెలంగాణ రాష్ట్ర సమితిని భారత్ రాష్ట్ర సమితి (బీఆర్ఎస్) గా మారుస్తున్నట్లు కేసీఆర్ ప్రకటించారు. డిసెంబర్ 2022లో కేంద్ర ఎన్నికల సంఘం దీనిని ఆమోదించింది. మహారాష్ట్ర వంటి పొరుగు రాష్ట్రాల్లో సభలు నిర్వహిస్తూ జాతీయ రాజకీయాల్లో చక్రం తిప్పాలని పార్టీ ప్రయత్నించింది.

ప్రస్తుత సవాళ్లు, 2024 లోక్ సభ ఫలితాలు

పార్టీ ప్రయాణంలో 2024 లోక్ సభ ఎన్నికలు ఊహించని షాక్ ఇచ్చాయి. రాష్ట్రంలోని 17 స్థానాల్లో పోటీ చేసిన బీఆర్ఎస్, తన చరిత్రలో మొదటిసారిగా ఒక్క సీటు కూడా గెలుచుకోలేకపోయింది. 16.69% ఓట్ల శాతంతో సరిపెట్టుకుని, చాలా చోట్ల మూడో స్థానానికి పరిమితమైంది. ఇది పార్టీకి అతిపెద్ద పరీక్షా సమయంగా మారింది.  కాంగ్రెస్ పార్టీ అధికారంలోకి రావడం, బీఆర్ఎస్ ప్రధాన ప్రతిపక్షంగా నిలవడం పార్టీ చరిత్రలో ఒక పెద్ద మార్పు.

తెలంగాణ ఉద్యమకారుల ఆకాంక్షలకు ప్రతిరూపంగా పుట్టిన టీఆర్ఎస్, నేడు బీఆర్ఎస్‌గా జాతీయ స్థాయిలో తన అదృష్టాన్ని పరీక్షించుకుంటోంది. ఇటీవల తెలంగాణ స్థానిక సంస్థల ఎన్నికల ఫలితాల సమయం నుంచి రాజకీయాల్లో యాక్టివిటీ పెరిగింది. ముఖ్యంగా కల్వకుంట్ల కవిత నేతృత్వంలో 'తెలంగాణ స్టేట్ సేన' (TRS) పేరుతో కొత్త రాజకీయ కార్యాచరణలు రావడం, పార్టీ పునర్వైభవం కోసం కేసీఆర్ జిల్లాల పర్యటనలు చేయాలని నిర్ఝయించడం గమనార్హం.

అధికారంలో ఉన్నా, ప్రతిపక్షంలో ఉన్నా తెలంగాణ రాజకీయాల్లో ఈ పార్టీ ఒక కీలక శక్తి. పరాజయాల నుంచి గుణపాఠాలు నేర్చుకుంటూ, మళ్లీ ప్రజల్లోకి వెళ్లేందుకు కేసీఆర్ నాయకత్వంలో పార్టీ సిద్ధమవుతోంది. ప్రాంతీయ అస్తిత్వం నుంచి జాతీయ స్థాయికి ఎదిగిన ఈ ప్రస్థానంలో తదుపరి మలుపు ఏమిటన్నది ఇప్పుడు ఆసక్తికరంగా మారింది.