యూట్యూబ్ లో ఫేమస్ అయిన రణవీర్ అల్హాబాదియా చేసిన అనుచిత వ్యాఖ్యలు ఇప్పుడు అతని జీవితానికే ముప్పు తెచ్చాయి. అతనిపై చాలాచోట్ల కేసులు నమోదయ్యాయి. దీంతో రణవీర్ ముందస్తు బెయిల్ కోసం అప్లై చేశాడు.  అయితే సుప్రీంకోర్టులో అతనికి చుక్కెదురైంది. ముందస్తు బెయిల్‌ సహా తన పిటిషన్లను అత్యవసరంగా విచారించాలన్న విజ్ఞప్తిని సీజేఐ బెంచ్‌ తిరస్కరించింది. రణవీర్ తనపై నమోదైన ఎఫ్ఐఆర్ లు అన్నింటినీ ఒకే దగ్గరకు చేర్చేలా ఆదేశాలివ్వాలంటూ సుప్రీంకోర్టులో పిటిషన్ వేశాడు. ఈ పిటిషన్లన్నీ ప్రధాన న్యాయమూర్తి సంజీవ్‌ ఖన్నా నేతృత్వంలోని ధర్మాసనం ముందుకు వెళ్లాయి. ఈ పిటిషన్లను అత్యవసరంగా విచారించాలన్న రణవీర్‌ తరఫు లాయర్‌ విజ్ఞప్తిని సీజేఐ బెంచ్‌ తోసిపుచ్చింది. ఈ విషయంలో కోర్టు రిజిస్ట్రీని సంప్రదించాలని సూచించింది. 

నేను ఎక్కడికీ పారిపోను, రక్షణ ఇవ్వండి..

మరోవైపు రణవీర్, అతని కుటుంబ సభ్యులు విపరీతమైన త్రెట్ ఎదుర్కొంటున్నారు. చాలామంది రణవీర్ ను చంపేస్తామని బహిరంగంగానే బెదిరిస్తున్నారు. స్టార్ ప్లస్ మహాభారతంలోని దుర్యోధనుడుగా వేసిన నటుడు...రణవీర్ తనకు ఎదురుపడితే చంపేస్తానని డైరెక్ట్ గా ఒక వీడియోనే రిలీజ్ చేశాడు. అలాగే మరికొందరు అతన్ని అప్పగిస్తే డబ్బులు ఇస్తామని చెబుతున్నారు. ఇక మరోవైపు రణవీర్ తల్లిదండ్రులకూ విపరీతమైన బెదిరింపులు వస్తున్నాయి. అతని తల్లి డాక్టరుగా ఉన్న క్లినిక్ కు కొందరు వెళ్ళి చంపేస్తామని బెదిరించారు. హాస్పిటల్ ఫర్నిచర్ ను ధ్వంసం చేశారు. దీంతో తమకు రక్షణ కల్పించాలని రణవీర్ అల్హాబాదియా కోరుతున్నాడు. తాను ఎక్కడికీ పారిపోనని..చట్టప్రకారం అన్నీ ఎదుర్కుంటానని...కానీ తన ప్రాణాలకు రక్షణ లేదని అంటున్నాడు. తమను కాపాడాలని విజ్ఞప్తి చేస్తున్నాడు. 

ఇండియా గాట్‌ టాలెంట్‌ షో లో ఓ యువతిని రణవీర్‌ తన తల్లిదండ్రుల శృంగారం గురించి ప్రశ్న అడగటం వివాదాస్పదమైన సంగతి తెలిసిందే. దీనిపై తీవ్ర వ్యతిరేకత రావడంతో ఇప్పటికే అతడు క్షమాపణలు చెప్పాడు.  '' నేను చేసిన వ్యాఖ్యల్లో హాస్యం లేదు. ఇలా మాట్లాడి నా ప్రచారం తెచ్చుకోవాలని నేను అనుకున్నానని చాలామంది భావిస్తున్నారు. కానీ అది నా ఉద్దేశం కాదు. నా వ్యాఖ్యలను నేను సమర్థించుకోవడం లేదు. నన్ను క్షమించండి అంటూ పోస్టు పెట్టాడు. 

Also Read: TS: ఇందిరమ్మ ఇళ్లపై తెలంగాణ ప్రభుత్వం కీలక ప్రకటన