Tamil Nadu : ద్రవిడ పార్టీల ఆరు దశాబ్దాల ఆధిపత్యానికి ముగింపు

Tamil Nadu : తమిళనాడు రాజకీయ చరిత్రలో 2026 అసెంబ్లీ ఎన్నికలు ఒక నవశకానికి నాంది పలికాయి. ఆరు దశాబ్దాలుగా అప్రతిహతంగా సాగుతున్న ద్రవిడ పార్టీల ద్వంద్వాధిపత్యానికి తెరదించుతూ, సినీ నటుడు విజయ్ నేతృత్వంలోని తమిళగ వెట్రి కజగం (TVK) సాధించిన విజయం భారత రాజకీయాల్లోనే ఒక అద్భుతంగా నిలిచింది. డీఎంకే, అన్నాడీఎంకేల కంచుకోటలను బద్దలు కొడుతూ విజయ్ నేతృత్వంలో సాగిన ఈ 'వాయువేగ' ప్రస్థానంపై  దేశమంతా చర్చ సాగుతోంది.

తమిళనాడులో 1967 నుండి రాజకీయాలన్నా, అధికారమన్నా కేవలం డీఎంకే (DMK) లేదా అన్నాడీఎంకే (AIADMK) మాత్రమే అన్నట్లుగా సాగింది. స్వాతంత్ర్యానంతరం కాంగ్రెస్ పార్టీని గద్దె దించి, ద్రవిడ ఆత్మగౌరవ నినాదంతో అన్నాదురై నేతృత్వంలో డీఎంకే అధికారంలోకి వచ్చింది. ఆయన మరణానంతరం కరుణానిధి పగ్గాలు చేపట్టగా, ఆ తర్వాత ఏర్పడిన అన్నాడీఎంకే ద్వారా ఎం.జి.రామచంద్రన్ (MGR) రాజకీయాల్లో పెనుమార్పులు తెచ్చారు. గత 50 ఏళ్లలో అన్నాడీఎంకే ఏడుసార్లు, డీఎంకే ఆరుసార్లు ముఖ్యమంత్రి పీఠాన్ని అధిరోహించాయి. జాతీయ పార్టీలు సైతం ఈ రెండు ద్రవిడ పక్షాల నీడలోనే ఉండాల్సిన పరిస్థితి నెలకొంది.

2024లో పార్టీని స్థాపించి, రాజకీయాల్లోకి అడుగుపెట్టిన విజయ్, మొదటి ప్రయత్నంలోనే అసాధారణ విజయాన్ని నమోదు చేశారు. 1977లో తొలిసారి ఎన్నికలకు వెళ్లినప్పుడు ఎంజీఆర్ నేతృత్వంలోని అన్నాడీఎంకే 30.4% ఓట్లను సాధించగా, ఇప్పుడు విజయ్ టీవీకే పార్టీ ఏకంగా 34.92% ఓట్ల వాటాను సాధించి ఆ రికార్డును కనుమరుగు చేసింది. కేవలం సినీ గ్లామర్‌తోనే కాకుండా, "ద్రవిడ సిద్ధాంతాలకు ప్రత్యామ్నాయం" అనే బలమైన రాజకీయ నినాదంతో యువతను, మహిళలను విజయ్ విశేషంగా ఆకట్టుకున్నారు.

జయలలిత, కరుణానిధి వంటి దిగ్గజ నేతల మరణం తర్వాత తమిళనాడు రాజకీయాల్లో ఏర్పడిన శూన్యతను పూరించడంలో స్టాలిన్ కొంతవరకు విజయం సాధించినా, విపక్షంగా అన్నాడీఎంకే బలహీనపడటం విజయ్‌కు కలిసొచ్చింది. డీఎంకేపై ఉన్న వ్యతిరేకతను, అన్నాడీఎంకేలోని అంతర్గత విభేదాలను తన వైపు తిప్పుకోవడంలో విజయ్ వ్యూహాత్మకంగా వ్యవహరించారు. 1967లో కాంగ్రెస్ పతనం తర్వాత ద్రవిడ పార్టీలు ఎలాగైతే ఎదిగాయో, సరిగ్గా 60 ఏళ్ల తర్వాత అదే స్థాయిలో ద్రవిడ పార్టీల పతనం మొదలై టీవీకే రూపంలో మూడో ప్రత్యామ్నాయం పగ్గాలు చేపట్టింది.

స్టాలిన్ తన వారసుడిగా ఉదయనిధి స్టాలిన్‌ను తెరపైకి తెస్తున్న తరుణంలో, "వారసత్వ రాజకీయాలకు ముగింపు" పలకాలని విజయ్ ఇచ్చిన పిలుపు ఓటర్లలో బలంగా పనిచేసింది. తమిళ భాషా పరిరక్షణ, ఉత్తర భారత ఆధిపత్య వ్యతిరేకత వంటి అంశాలను ప్రస్తావిస్తూనే, అవినీతి రహిత పాలన హామీతో ఆయన ఓటర్లను మెప్పించారు. ఈ ఫలితంతో తమిళనాడులో ఇకపై డీఎంకే - అన్నాడీఎంకే మార్క్ రాజకీయాలు ముగిసినట్టేనని, కేవలం ప్రాంతీయ భావజాలం మాత్రమే కాకుండా అభివృద్ధి , మార్పు వైపు ప్రజలు మొగ్గు చూపారని స్పష్టమవుతోంది.