సోషల్ మీడియా యూజర్లకు అలర్ట్: ఇకపై ఇన్‌స్టాగ్రామ్, ఫేస్‌బుక్‌లకు KYC తప్పనిసరి

నేటి డిజిటల్ యుగంలో సోషల్ మీడియా వినియోగం ఎంత పెరిగిందో, అదే స్థాయిలో సైబర్ నేరాలు, ఫేక్ అకౌంట్ల బెడద కూడా పెరిగింది. ఈ సమస్యకు చెక్ పెట్టేందుకు కేంద్ర ప్రభుత్వం ఒక విప్లవాత్మక నిర్ణయం తీసుకోబోతోంది. ఇకపై ఇన్‌స్టాగ్రామ్, ఫేస్‌బుక్ వంటి సోషల్ మీడియా ప్లాట్‌ఫామ్‌లతో పాటు గేమింగ్, డేటింగ్ యాప్‌లకు కూడా కేవైసీ తప్పనిసరి కానుంది. ఆన్‌లైన్ సేఫ్టీ పటిష్టం చేసేందుకు కేంద్ర హోం శాఖ, ఐటీ శాఖ కలిసి ఏర్పాటు చేసిన పార్లమెంటరీ కమిటీ ఈ మేరకు కీలక ప్రతిపాదనలు చేసింది.

ఫేక్ అకౌంట్ల కాలం చెల్లినట్లే!

ప్రస్తుతం సోషల్ మీడియాలో ఎవరైనా, ఏ పేరుతోనైనా అకౌంట్ తెరిచే వెసులుబాటు ఉంది. దీనివల్ల ఫేక్ అకౌంట్లు సృష్టించి మోసాలకు పాల్పడటం, మహిళలను వేధించడం సులభతరమైంది. అయితే, బ్యాంకులు అనుసరించే విధంగానే సోషల్ మీడియా సంస్థలు కూడా యూజర్ల గుర్తింపు కార్డులను (KYC) వెరిఫై చేయాలని కమిటీ సూచించింది. దీనివల్ల ప్రతి అకౌంట్ వెనుక ఉన్న అసలు వ్యక్తి ఎవరో తెలుస్తుంది, ఫలితంగా ఫేక్ అకౌంట్లు పూర్తిగా తొలగిపోయే అవకాశం ఉంది.

కమిటీ చేసిన ప్రధాన ప్రతిపాదనలు ఇవే:
నిరంతర నిఘా: కేవలం అకౌంట్ తెరిచేటప్పుడు మాత్రమే కాకుండా, తరచూ యూజర్ వెరిఫికేషన్ ప్రక్రియను నిర్వహించాలి.
ఏజ్ వెరిఫికేషన్: గేమింగ్, డేటింగ్ యాప్స్‌లో వయస్సు నిర్ధారణ తప్పనిసరి. చిన్న పిల్లలు అభ్యంతరకర కంటెంట్‌కు గురికాకుండా కఠిన నిబంధనలు అమలు చేయాలి.
హై రిస్క్ కేటగిరీ: సోషల్ మీడియాలో ఇతరులను వేధించే వారిని, అసభ్యకర పోస్టులు పెట్టే వారిని 'హై రిస్క్' జాబితాలో చేర్చి వారిపై కఠిన చర్యలు తీసుకోవాలి.
డీప్ ఫేక్ కట్టడి: ఆర్టిఫిషియల్ ఇంటెలిజెన్స్ (AI) సాయంతో సృష్టించే డీప్ ఫేక్ వీడియోల వల్ల ఎదురయ్యే ముప్పును అరికట్టేందుకు ఈ కేవైసీ విధానం ఎంతో కీలకం కానుంది.

లైసెన్సింగ్ నిబంధనలు కఠితరం

ఆన్‌లైన్ గేమింగ్, డేటింగ్ యాప్స్ నిర్వహణకు సంబంధించి కేంద్రం కొత్త గైడ్‌లైన్స్‌ను రూపొందించనుంది. వీటి లైసెన్సింగ్ ప్రక్రియను మరింత కఠినం చేయడంతో పాటు, యూజర్ల నుంచి వచ్చే ఫిర్యాదులను తక్షణమే పరిష్కరించేందుకు ఒక ప్రత్యేక వ్యవస్థను ఏర్పాటు చేయాలని పార్లమెంటరీ కమిటీ స్పష్టం చేసింది. కేంద్ర ప్రభుత్వం ఈ ప్రతిపాదనలను అమలులోకి తెస్తే, సోషల్ మీడియా ప్రపంచం మరింత సురక్షితంగా మారుతుందని నిపుణులు భావిస్తున్నారు. సామాన్యులకు ఇది ఊరటనిచ్చే విషయమే అయినప్పటికీ, ప్రైవసీ విషయంలో ఎలాంటి నిబంధనలు ఉంటాయో వేచి చూడాలి.