Donald Trump: అమెరికా చేతుల్లోకి హార్ముజ్ జలసంధి.. ‘లాక్డ్ అండ్ లోడెడ్’ అంటున్న ట్రంప్

పశ్చిమ ఆసియాలో మరోసారి యుద్ధ మేఘాలు కమ్ముకుంటున్నాయి. ఇరాన్ తీరుపై అమెరికా అధ్యక్షుడు ట్రంప్ తీవ్రస్థాయిలో విరుచుకుపడ్డారు(trump warning to iran). ఆ దేశానికి అత్యంత కఠినమైన హెచ్చరికలు జారీ చేస్తూ, అమెరికా యుద్ధానికి సిద్ధంగా ఉందనే సంకేతాలను పంపారు. తాజా పరిణామాలతో అంతర్జాతీయ రాజకీయాల్లో తీవ్ర ఉత్కంఠ నెలకొంది. అత్యంత కీలకమైన విషయం ఏమిటంటే, ట్రంప్ తన సోషల్ మీడియా వేదికగా "లాక్డ్ అండ్ లోడెడ్" అంటూ ఒక పోస్ట్ చేశారు. అంటే తమ ఆయుధాలు సిద్ధంగా ఉన్నాయని, ఆదేశం రాగానే దాడికి దిగుతామని దీని అర్థం.

Also Read :  ఇజ్రాయెల్‌కు తుర్కియే వార్నింగ్.. అలా చేయకపోతే దాడి తప్పదు..

చర్చల వైఫల్యానికి ఇరానే కారణం!

ఇరాన్‌(iran war) తో జరుగుతున్న దౌత్యపరమైన చర్చలు విఫలం కావడానికి ఆ దేశ మొండివైఖరే కారణమని ట్రంప్ స్పష్టం చేశారు. ముఖ్యంగా తన న్యూక్లియర్ ప్రోగ్రామ్‌ను (అణు కార్యక్రమం) వదులుకునేందుకు ఇరాన్ ఏమాత్రం సిద్ధంగా లేదని ఆయన మండిపడ్డారు. శాంతి స్థాపన కంటే ఆయుధ సంపత్తిని పెంచుకోవడమే ఇరాన్ లక్ష్యమని ఆయన ఆరోపించారు.

స్ట్రెయిట్ ఆఫ్ హార్ముజ్‌పై ఆంక్షల ఉచ్చు

ప్రపంచ చమురు రవాణాకు అత్యంత కీలకమైన హార్ముజ్ జలసంధి విషయంలో ట్రంప్ సంచలన నిర్ణయం తీసుకున్నారు. హార్ముజ్‌లోకి ఏ నౌక వెళ్లాలన్నా లేదా బయటకు రావాలన్నా అమెరికా నేవీ అనుమతి తప్పనిసరి అని హెచ్చరించారు. నిబంధనలు అతిక్రమిస్తే అమెరికా నౌకాదళం వాటిని అడ్డుకుంటుందని స్పష్టం చేశారు. సముద్ర జలాల్లో మైన్లు ఉన్నాయని ప్రచారం చేస్తూ ఇరాన్ ప్రపంచాన్ని భయపెడుతోందని, ఇలాంటి బ్లాక్‌మెయిల్ రాజకీయాలు ఇక సాగవని ఆయన తేల్చి చెప్పారు.

టోల్ చెల్లిస్తే సెక్యూరిటీ ఉండదు!

ఇరాన్‌కు మద్దతు ఇచ్చే దేశాలకు లేదా ఆ దేశానికి టోల్ చెల్లించి ప్రయాణించే నౌకలకు అంతర్జాతీయ జలాల్లో ఎటువంటి భద్రత ఉండదని ట్రంప్ హెచ్చరించారు. అలాంటి నౌకలను అమెరికా సైన్యం ఎక్కడికక్కడ అడ్డుకుంటుందని, వాటి రక్షణ బాధ్యత తమది కాదని ఆయన స్పష్టమైన సందేశాన్ని పంపారు.

Also Read :  అమెరికావి గొంతెమ్మ కోర్కెలు.. అందుకే పక్కన పెట్టాం.. ఇరాన్ సంచలన ప్రకటన!

ధ్వంసమైన ఇరాన్ రక్షణ వ్యవస్థ

ఇరాన్ సైనిక సామర్థ్యంపై కూడా ట్రంప్ కీలక వ్యాఖ్యలు చేశారు. ఇప్పటికే ఇరాన్ నేవీ, ఎయిర్‌ఫోర్స్, మరియు రాడార్ సిస్టమ్స్ తీవ్రంగా దెబ్బతిన్నాయని ఆయన పేర్కొన్నారు. ఇరాన్ దగ్గర ఇప్పుడు చెప్పుకోదగ్గ రక్షణ వ్యవస్థ లేదని ఆయన ఎద్దేవా చేశారు. అమెరికా సైన్యం పూర్తిస్థాయిలో యుద్ధ సన్నద్ధతతో ఉందని, ఇరాన్ గనుక తన తీరు మార్చుకోకపోతే పరిణామాలు చాలా తీవ్రంగా ఉంటాయని ట్రంప్ హెచ్చరించారు. ఈ ప్రకటనతో అగ్రరాజ్యం ఇరాన్‌పై ఎప్పుడైనా సైనిక చర్యకు దిగే అవకాశం ఉందన్న ప్రచారం జరుగుతోంది. ప్రపంచ దేశాలు ఇప్పుడు ఈ ఇద్దరు దిగ్గజాల మధ్య నెలకొన్న ఉద్రిక్తతలను గమనిస్తున్నాయి. ఒకవేళ యుద్ధం గనుక సంభవిస్తే అది ప్రపంచ ఆర్థిక వ్యవస్థపై, ముఖ్యంగా చమురు ధరలపై తీవ్ర ప్రభావం చూపే అవకాశం ఉంది.