Fire accident : మూసాపేట్‌లో ఘోర అగ్నిప్రమాదం... ఈవీ గోదాంలో ఎగిసిపడుతున్న మంటలు

 Fire accident : హైదరాబాద్‌ కూకట్‌పల్లి నియోజకవర్గ పరిధిలోని మూసాపేట్ గూడ్స్ షెడ్ సమీపంలో మంగళవారం మధ్యాహ్నం భారీ అగ్నిప్రమాదం సంభవించింది. ఒక ప్రముఖ ఎలక్ట్రిక్ వాహనాల (EV) నిల్వ గోదాంలో (Warehouse) ఒక్కసారిగా మంటలు చెలరేగడంతో ఆ ప్రాంతమంతా పొగలు కమ్ముకున్నాయి. ఈ ప్రమాద తీవ్రతకు గోదాం పూర్తిగా దగ్ధమవడమే కాకుండా, పక్కనే ఉన్న ఐదు దుకాణాలకు కూడా మంటలు వేగంగా వ్యాపించాయి.గోదాంలో వందలాది సరికొత్త ఎలక్ట్రిక్ బైక్‌లు, వాటికి సంబంధించిన లిథియం-అయాన్ (Lithium-ion) బ్యాటరీలు, విడిభాగాలు, టైర్లు భారీగా నిల్వ ఉంచారు. ఒక వాహనంలో ప్రారంభమైన మంటలు క్షణాల వ్యవధిలోనే బ్యాటరీలకు అంటుకున్నాయి. బ్యాటరీలు ఒక్కొక్కటిగా పేలడం ప్రారంభం కావడంతో పెద్ద ఎత్తున శబ్దాలు చేస్తూ మంటలు ఆకాశమంత ఎత్తున ఎగిసిపడ్డాయి. దట్టమైన నల్లటి పొగ మైళ్ల దూరం వరకు కమ్ముకోవడంతో స్థానిక కాలనీల ప్రజలు ఊపిరాడక, ప్రాణభయంతో రోడ్లపైకి పరుగులు తీశారు.

ప్రమాదం గురించి సమాచారం అందిన వెంటనే కూకట్‌పల్లి, సనత్‌నగర్, జీడిమెట్ల ప్రాంతాల నుండి ఐదు ఫైరింజన్లు (Fire Tenders) ఘటనా స్థలానికి చేరుకున్నాయి. అయితే సాధారణ నీటితో లిథియం బ్యాటరీల మంటలను ఆర్పడం సాధ్యం కాకపోవడంతో, అగ్నిమాపక సిబ్బంది ప్రత్యేక కెమికల్ ఫోమ్ (రసాయన నురుగు) ఉపయోగించి మంటలను అదుపు చేసేందుకు శతవిధాలా శ్రమించారు. దాదాపు మూడు గంటల పాటు శ్రమించి మంటలు పక్కనే ఉన్న రైల్వే గూడ్స్ షెడ్ వైపు,నివాస గృహాల వైపు వ్యాపించకుండా అడ్డుకోగలిగారు.

ప్రమాదం జరిగిన సమయంలో గోదాంలో కొంతమంది కార్మికులు విధుల్లో ఉన్నారు. మంటలు వ్యాపించడాన్ని గమనించిన వెంటనే వారు అప్రమత్తమై బయటకు వచ్చేయడంతో ఒక పెద్ద ప్రాణనష్టం తప్పింది. లోపల ఎవరైనా చిక్కుకున్నారా అనే కోణంలో డిజాస్టర్ మేనేజ్మెంట్ (DRF) బృందాలు లోపలికి వెళ్లి గాలింపు చర్యలు చేపట్టాయి. ప్రాథమిక అంచనా ప్రకారం, గోదాంలో ఉన్న సుమారు 150 కి పైగా ఎలక్ట్రిక్ వాహనాలు, విలువైన బ్యాటరీ కిట్లు పూర్తిగా బూడిదయ్యాయి. దీనివల్ల కోట్ల రూపాయల మేర ఆస్తి నష్టం వాటిల్లినట్లు యాజమాన్యం పేర్కొంటోంది.

ఈ ఘోర ప్రమాదానికి గల కారణాలపై స్పష్టత రాలేదు. అయితే, కొత్త వాహనాల బ్యాటరీలను టెస్ట్ చేసే క్రమంలో ఛార్జింగ్ పాయింట్ వద్ద ఓవర్‌హీట్ అవ్వడం వల్ల గానీ, లేదా గోదాంలోని పాత వైరింగ్ కారణంగా భారీ షార్ట్ సర్క్యూట్ జరగడం వల్ల గానీ ఈ ప్రమాదం జరిగి ఉండవచ్చని అగ్నిమాపక శాఖ అధికారులు ప్రాథమికంగా భావిస్తున్నారు. క్లూస్ టీమ్ రంగంలోకి దిగి నమూనాలను సేకరించింది. స్థానిక పోలీసులు ఈ ఘటనపై కేసు నమోదు చేసుకుని, గోదాంలో కనీస అగ్నిమాపక భద్రతా ప్రమాణాలు (Fire Safety Norms) పాటించారా లేదా అనే కోణంలో దర్యాప్తు ముమ్మరం చేశారు.