సీఎం రేవంత్ రెడ్డి బిగ్ ట్విస్ట్.. హరీశ్ రావు ఢిల్లీ టూర్‌పై విచారణ!

కాళేశ్వరం ప్రాజెక్టు పేరుతో జరిగిన భారీ దోపిడీపై ముఖ్యమంత్రి రేవంత్ రెడ్డి నిప్పులు చెరిగారు. గత ప్రభుత్వం చేసిన తప్పులను, అవినీతిని ఎండగడుతూనే, బాధ్యులను చట్టం ముందు నిలబెట్టి తీరుతామని ఆయన స్పష్టం చేశారు. మంగళవారం జరిగిన మీడియా సమావేశంలో ప్రాజెక్టు వైఫల్యాలు, రాజకీయ కుట్రలపై ముఖ్యమంత్రి మాట్లాడారు.

చరిత్రను తిరగరాసిన రీడిజైనింగ్ కుట్ర

1975లో జలగం వెంగళరావు హయాంలో కుదిరిన ఒప్పందాల నుంచి, 2009లో వైఎస్సార్ ప్రారంభించిన ప్రాణహిత-చేవేళ్ల వరకు ప్రాజెక్టు ప్రస్థానాన్ని సీఎం గుర్తు చేశారు. "రూ.38,063 కోట్లతో మొదలైన ప్రాజెక్టును, కేసీఆర్ కేవలం రాజకీయ, ఆర్థిక ప్రయోజనాల కోసం రూ.1.50 లక్షల కోట్లకు పెంచారు. రీడిజైనింగ్ పేరుతో ప్రజల సొమ్మును నీళ్లపాలు చేశారు" అని రేవంత్ ధ్వజమెత్తారు. మేడిగడ్డ కుప్పకూలడం అనేది ప్రకృతి ఇచ్చిన తీర్పు అని, ఎన్నికల ప్రయోజనం కోసం వాస్తవాలను దాచిపెట్టారని ఆయన విమర్శించారు.

హరీశ్ రావు ఢిల్లీ పర్యటనపై అనుమానాలు

బిఆర్ఎస్ నేత హరీశ్ రావు రహస్యంగా ఢిల్లీ పర్యటించడం వెనుక పెద్ద మతలబు ఉందని ముఖ్యమంత్రి ఆరోపించారు. "కాళేశ్వరంపై విచారణ వేగవంతమవుతోందని తెలిసి, బీజేపీ నేతల కాళ్లు పట్టుకోవడానికే హరీశ్ ఢిల్లీకి పరుగెత్తారు. అక్కడ ఎవరెవరిని కలిశారో తెలంగాణ ప్రజలకు సమాధానం చెప్పాలి" అని డిమాండ్ చేశారు. జడ్జిమెంట్ రాకముందే న్యాయవాదులతో సంప్రదింపులు జరపాల్సిన అవసరం ఏముందని ఆయన ప్రశ్నించారు.

సీబీఐ మౌనం వెనుక మర్మమేంటి?

కాళేశ్వరం అవినీతిపై సీబీఐ విచారణకు రాష్ట్ర ప్రభుత్వం సిద్ధంగా ఉందని, ఇప్పటికే కేంద్రానికి తీర్మానం పంపినట్లు సీఎం తెలిపారు. "నాడు కేసీఆర్, హరీశ్‌లను జైల్లో వేయాలన్న కిషన్ రెడ్డి, నేడు ఎందుకు మౌనంగా ఉన్నారు? మేం పదే పదే లేఖలు రాస్తున్నా కేంద్రం ఎందుకు స్పందించడం లేదు?" అని ఆయన కేంద్రాన్ని నిలదీశారు. బీజేపీ అండతో అవినీతి కేసుల నుంచి తప్పించుకోవాలని చూస్తే రాష్ట్ర ప్రభుత్వం చూస్తూ ఊరుకోదని హెచ్చరించారు.

రైతులకు భరోసా.. దోషులకు శిక్ష
ప్రాజెక్టులో లోపాలు ఉన్నప్పటికీ, రైతుల ప్రయోజనాలను దృష్టిలో ఉంచుకుని రిపేర్లు చేపట్టి నీరు అందిస్తామని సీఎం హామీ ఇచ్చారు.

శ్రీపాద ఎల్లంపల్లి నీటితోనే అత్యధిక పంటలు పండుతున్నాయని, అది కాళేశ్వరం పుణ్యం కాదని స్పష్టం చేశారు.

పీసీ ఘోష్ కమిటీ నివేదిక ఆధారంగా దోషులపై కఠిన చర్యలు తీసుకుంటామని చెప్పారు.

సాంకేతిక నిపుణుల సలహాలతో ప్రాజెక్టు పునరుద్ధరణకు ప్రణాళికలు సిద్ధం చేస్తున్నట్లు వెల్లడించారు.

"తెలంగాణ ప్రజల ఆస్తిని దోచుకున్న ఏ ఒక్కరినీ వదిలిపెట్టం. న్యాయం జరిగే వరకు మా పోరాటం ఆగదు" అని రేవంత్ రెడ్డి తన ప్రసంగాన్ని ముగించారు.