BREAKING: RBI సంచలన నిర్ణయం.. పేటీఎం పేమెంట్స్‌ బ్యాంక్‌ లైసెన్స్‌ రద్దు

రిజర్వ్ బ్యాంక్ ఆఫ్ ఇండియా (RBI) సంచలన నిర్ణయం తీసుకుంది. నిబంధనల ఉల్లంఘనల నేపథ్యంలో 'పేటీఎం పేమెంట్స్‌ బ్యాంక్‌ లిమిటెడ్' లైసెన్స్‌ను రద్దు చేస్తున్నట్లు ప్రకటించింది. గత కొంతకాలంగా ఈ బ్యాంక్ కార్యకలాపాల్లో సమస్యలు ఎదురవుతున్నాయి. అలాగే నియంత్రణ నిబంధనలు పాటించడంలో ఈ బ్యాంక్ పదే పదే విఫలమయ్యింది. ఈ నేపథ్యంలోనే ఆర్బీఐ ఈ కఠినమైన చర్యలు చేపట్టింది. 

ఇంతకుముదు ఈ బ్యాంకుకు సంబంధించిన కీలక కార్యకలాపాలను నిలిపివేయాలని, అలాగే పెండింగ్‌లో ఉన్న లావాదేవీల సెటిల్‌మెంట్‌ను పూర్తి చేయాలని గతేడాది మార్చి 15కు RBI గడువు విధించింది. కానీ ఈ గడువు ముగిసిన తర్వాత కూడా నిబంధనలు అమలు చేయడంలో ఎలాంటి మార్పులు రాలేదు. అందుకే RBI  ఈ నిర్ణయం తీసుకున్నట్లు తెలుస్తోంది. దీని లైసెన్స్ రద్దు కావడంతో ఈ సంస్థ ఇకనుంచి ఎలాంటి బ్యాంకింగ్ సేవలు నిర్వహించలేదు.  

లైసెన్స్‌ రద్దు కావడం వల్ల పేమెంట్స్ బ్యాంక్ ఫ్రేమ్‌వర్క్ కింద పేటీఎం నిర్వహిస్తున్న బ్యాంకింగ్ బిజినెస్ కూడా మూతపడింది. వాలెట్లు, డిపాజిట్లు, ఇతర బ్యాంకింగ్ లావాదేవీలపై RBI విధించిన ఈ ఆంక్షలు పేటీఎం సంస్థపై, అలాగే దాన్ని నమ్ముకున్న వినియోగదారులపై తీవ్ర ప్రభావం చూపించనుంది. అయితే నిబంధనల విషయంలో ఎలాంటి సంస్థనైనా ఉపేక్షించేది లేదని RBI తన చర్యలతో మరోసారి స్పష్టం చేసింది.