Cockroach Janata Party : ఇక రోజూ 'బొద్దింకల పార్టీ' సభలు... జూన్ 14న భాగ్యనగరంలో భారీ నిరసన.. షెడ్యూల్ విడుదల!

Cockroach Janata Party : దేశవ్యాప్తంగా వరుసగా జరుగుతున్న పోటీ పరీక్షల అక్రమాలు, ప్రశ్నాపత్రాల లీకేజీల వ్యవహారంపై విద్యార్థి లోకం భగ్గుమంటోంది. పరీక్షల్లో పారదర్శకత లోపించడం, కోటి మందికి పైగా విద్యార్థుల భవిష్యత్తు ప్రమాదంలో పడటానికి బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ తక్షణమే రాజీనామా చేయాలని డిమాండ్ చేస్తూ ‘కాక్రోచ్ జనతా పార్టీ’ (CJP) దేశవ్యాప్త ఆందోళనలకు పిలుపునిచ్చింది. ఇందులో భాగంగా జూన్ 14వ తేదీన భాగ్యనగరం (హైదరాబాద్) వేదికగా భారీ నిరసన కార్యక్రమాన్ని నిర్వహించనున్నట్లు ఆ పార్టీ ప్రకటించింది.

పూణే సభకు వెల్లువెత్తిన మద్దతు

ఈ దేశవ్యాప్త నిరసనల పరంపర జూన్ 11న (ఇవాళ) మహారాష్ట్రలోని సావిత్రిబాయి పూణే విశ్వవిద్యాలయం (SPPU) వద్ద సాయంత్రం 4 గంటలకు ఘనంగా ప్రారంభమైంది. ఢిల్లీ సభను మించేలా ఈ పూణే సభకు యువత, విద్యార్థులు భారీ సంఖ్యలో తరలివచ్చారు. ఈ నిరసన సభకు లడఖ్ ప్రముఖ సామాజిక పోరాట యోధుడు సోనం వాంగ్ చుక్ సహా పలువురు ప్రముఖులు హాజరై, కాక్రోచ్ జనతా పార్టీ వ్యవస్థాపక అధ్యక్షుడు అభిజీత్ దీప్కేకు తమ పూర్తి మద్దతును ప్రకటించారు. ఈ సందర్భంగా అభిజీత్ దీప్కే మాట్లాడుతూ.. తమ పోరాటం పూర్తిగా శాంతియుతంగా, రాజ్యాంగ పరిధికి లోబడే జరుగుతుందని స్పష్టం చేశారు.

విద్యార్థుల కోసం 'ఎడ్యుకేషన్ మేనిఫెస్టో' విడుదల

ఈ ఉద్యమ ప్రారంభంతో పాటు కాక్రోచ్ జనతా పార్టీ తమ ప్రత్యేక ‘విద్యా విధాన ప్రకటన పత్రాన్ని’ (ఎడ్యుకేషన్ మేనిఫెస్టో) విడుదల చేసింది. ఇటీవలి కాలంలో దేశాన్ని కుదిపేస్తున్న నీట్ (NEET) ప్రశ్నాపత్రాల లీకేజీల నివారణ, పరీక్షల్లో పూర్తి పారదర్శకత, సకాలంలో ఫలితాల ప్రకటన మరియు ఉద్యోగ నియామకాలు, అలాగే పరీక్షా నిర్వహణ అధికారులలో జవాబుదారీతనం పెంచడం వంటి కీలక అంశాలను ఈ మేనిఫెస్టోలో పొందుపరిచారు. విద్యావ్యవస్థలోని లోపాలను ఎత్తిచూపుతూ, విద్యాశాఖ మంత్రి రాజీనామా చేసేంత వరకు తాము వెనక్కి తగ్గేదే లేదని దీప్కే తేల్చిచెప్పారు.

జూన్ 14న హైదరాబాద్‌లో 'ధర్నా'

కేంద్ర ప్రభుత్వంపై ఒత్తిడి పెంచేందుకు వీలుగా కాక్రోచ్ జనతా పార్టీ దేశంలోని ప్రధాన నగరాల్లో వరుస బహిరంగ సభల షెడ్యూల్‌ను ఎక్స్ (ట్విట్టర్) వేదికగా విడుదల చేసింది. ఈ షెడ్యూల్ ప్రకారం.. జూన్ 14 (ఆదివారం) ఉదయం 10 గంటలకు హైదరాబాద్‌లోని ఇందిరాపార్క్ వద్ద ఉన్న ధర్నా చౌక్ లో నిరసన కార్యక్రమం ప్రారంభమవుతుంది. తెలంగాణలోని నిరుద్యోగ యువత, విద్యార్థులు ఈ సభకు పెద్ద ఎత్తున తరలిరావాలని పార్టీ శ్రేణులు కోరుతున్నాయి.

కాక్రోచ్ జనతా పార్టీ (CJP) దేశవ్యాప్త నిరసనల పూర్తి షెడ్యూల్:

తేదీ                                   నగరం(వేదిక)                                                              సమయం

జూన్ 11    పూణే (సావిత్రిబాయి పూణే యూనివర్సిటీ - SPPU)              సాయంత్రం 4:00 గంటలకు
జూన్ 12    లక్నో (ఎకో గార్డెన్)                                                                ఉదయం 11:00 గంటలకు
జూన్ 13    అమృత్‌సర్ (అమృత్‌సర్ గేట్)                                            సాయంత్రం 4:00 గంటలకు
జూన్ 14    హైదరాబాద్ (ఇందిరాపార్క్ ధర్నా చౌక్)                               ఉదయం 10:00 గంటలకు
జూన్ 14    బెంగళూరు (ఫ్రీడమ్ పార్క్)                                                   సాయంత్రం 4:00 గంటలకు
జూన్ 15    జైపూర్ (షాహిద్ స్మారక్)                                                          మధ్యాహ్నం 3:00 గంటలకు
జూన్ 20    న్యూఢిల్లీ (జంతర్ మంతర్)                                                    తుది పోరాట సభ

ఢిల్లీ వేదికగా తుది హెచ్చరిక:

ఈ వరుస నిరసనల తర్వాత కూడా కేంద్ర ప్రభుత్వం స్పందించకపోతే లేదా విద్యాశాఖ మంత్రి ధర్మేంద్ర ప్రధాన్ తన పదవికి రాజీనామా సమర్పించకపోతే.. తిరిగి ఈ నెల జూన్ 20న దేశ రాజధాని న్యూఢిల్లీలోని జంతర్ మంతర్ వద్ద అత్యంత భారీ ఎత్తున నిరసన సభ నిర్వహించి తీరుతామని కాక్రోచ్ జనతా పార్టీ స్పష్టం చేసింది. అయితే ప్రస్తుతం కేంద్ర ప్రభుత్వం మాత్రం ఈ సభలను పెద్దగా పట్టించుకోనట్లు వ్యవహరిస్తోందని రాజకీయ విశ్లేషకులు భావిస్తున్నారు.