PoK : పాక్ అణచివేతపై ‘పీఓకే’ అగ్నిగుండం.. ఇంటర్నెట్ బంద్, పర్యాటకులకు నో ఎంట్రీ.. అసలు అక్కడ ఏం జరుగుతోంది?

PoK : పాకిస్తాన్ ఆక్రమిత కాశ్మీర్ (PoK)లో పాక్ ప్రభుత్వ నిరంకుశ పోకడలు, సైనిక అణచివేత పతాక స్థాయికి చేరాయి. అక్కడ ప్రజల హక్కుల కోసం పోరాడుతున్న అతిపెద్ద పౌర హక్కుల సంస్థ 'జమ్మూ-కాశ్మీర్ జాయింట్ అవామీ యాక్షన్ కమిటీ' (JKJAAC)పై షెహబాజ్ షరీఫ్ ప్రభుత్వం నిషేధం విధించింది. అంతటితో ఆగకుండా, తమ వివక్షాపూరిత విధానాలపై శాంతియుతంగా నిరసన తెలుపుతున్న ఈ పౌర సంస్థను పాక్ పాలకులు ఏకంగా 'ఉగ్రవాద సంస్థ'గా ప్రకటించారు. ఈ వివాదాస్పద నిర్ణయంతో పీఓకే వ్యాప్తంగా తీవ్ర ఉద్రిక్త పరిస్థితులు నెలకొన్నాయి. ఏ క్షణమైనా అక్కడ పెద్ద ఎత్తున హింస, ప్రజా తిరుగుబాటు చెలరేగే అవకాశం కనిపిస్తోంది.

అవామీ యాక్షన్ కమిటీపై నిషేధం విధించిన వెంటనే పాకిస్తాన్ సైన్యం అర్ధరాత్రి వేళ ఆ సంస్థ నాయకులను లక్ష్యంగా చేసుకుని దాడులకు తెగబడింది. నిషేధానికి వ్యతిరేకంగా ప్రజలు చేపట్టే నిరసనలను ముందే అణచివేయాలనే వ్యూహంతో సైన్యం ఈ దారుణానికి ఒడిగట్టింది. ఈ దాడిలో జేఏఏసీ (JAAC)కి చెందిన ఒక సభ్యుడు ప్రాణాలు కోల్పోగా, ఆ సంస్థ ముఖ్య నాయకుడు ఉమర్ నజీర్ కాశ్మీరీతో సహా పలువురు తీవ్రంగా గాయపడ్డారు. గత కొన్ని నెలలుగా పాక్ ప్రభుత్వం, సైన్యం సాగిస్తున్నdictator  తరహా ధోరణికి వ్యతిరేకంగా ఈ కమిటీ పీఓకే ప్రజలను ఏకం చేస్తూ రోడ్లపైకి వచ్చి పోరాడుతోంది.

నిజానికి పీఓకే ప్రజలు సుదీర్ఘకాలంగా పాకిస్తాన్ పాలకుల నుంచి తీవ్ర వివక్షను, సవతి తల్లి ప్రేమను ఎదుర్కొంటున్నారు. స్థానిక సహజ వనరులను పాకిస్తాన్ విచ్చలవిడిగా దోచుకుంటోందని, కానీ తమకు మాత్రం కేవలం విధ్వంసం, పేదరికం, పక్షపాతమే మిగులుస్తున్నారని స్థానికులు కాలంగా ఆరోపిస్తున్నారు. అక్కడ కనీస మానవ హక్కులు గానీ, ప్రాథమిక హక్కులు గానీ అమలు కావడం లేదు. తమ ప్రాంత సంపదను దోచుకుంటూ, తమను మాత్రం రెండో తరగతి పౌరులుగా చూస్తున్న పాక్ సైనిక బలాఢ్యుల తీరుపై అక్కడి ప్రజల్లో దశాబ్దాలుగా పేరుకుపోయిన అసంతృప్తి ఇప్పుడు లావా లాగా బద్దలైంది.

ప్రస్తుతం పాకిస్తాన్‌తో పాటు పీఓకేలో కూడా ఆర్థిక సంక్షోభం, ద్రవ్యోల్బణం గరిష్ట స్థాయికి చేరాయి. నిత్యావసరాల ధరలు, ముఖ్యంగా గోధుమ పిండి (ఆటా), విద్యుత్ ఛార్జీలు ఆకాశాన్ని తాకాయి. ఈ విపరీతమైన ధరల పెరుగుదల, కనీస వసతుల లేమితో విసిగిపోయిన సాధారణ ప్రజలు రోడ్లపైకి వచ్చి ఉద్యమించారు. సైనిక బలంతో ఈ ప్రజా ఉద్యమాన్ని అణచివేయడం సాధ్యం కాకపోవడంతో, షెహబాజ్ ప్రభుత్వం ఏకంగా ఈ పౌర సంఘానికి 'ఉగ్రవాద ముద్ర' వేసింది. ప్రజల గొంతును శాశ్వతంగా నొక్కేయడానికే పాక్ ప్రభుత్వం ఈ కుట్రకు తెరలేపిందని రాజకీయ విశ్లేషకులు భావిస్తున్నారు.

ప్రభుత్వ అనాగరిక నిర్ణయంపై పీఓకే ప్రజల్లో వ్యక్తమవుతున్న జనాగ్రహాన్ని చూసి పాకిస్తాన్ పాలకులు వణికిపోతున్నారు. ప్రజలు ఒకచోట చేరకుండా, నిరసనలకు సంబంధించిన సమాచారం, వీడియోలు బయటి ప్రపంచానికి తెలియకుండా ఉండేందుకు పీఓకే వ్యాప్తంగా ఇంటర్నెట్ సేవలను ప్రభుత్వం పూర్తిగా నిలిపివేసింది. సమాచార వ్యవస్థను అస్తవ్యస్తం చేయడం ద్వారా ఉద్యమ తీవ్రతను తగ్గించవచ్చని భావిస్తోంది. స్మార్ట్‌ఫోన్లు, సోషల్ మీడియా యుగంలో ఇంటర్నెట్ బంద్ చేయడం ద్వారా పీఓకేను ఒక చీకటి ప్రాంతంగా మార్చేందుకు పాక్ ప్రయత్నిస్తోంది.

పరిస్థితి ఏ క్షణంలోనైనా చేజారిపోయే ప్రమాదం ఉండటంతో పాకిస్తాన్ ప్రభుత్వం ఒక అత్యవసర ట్రావెల్ అడ్వైజరీని (ప్రయాణ హెచ్చరిక) జారీ చేసింది. పర్యాటకులు, సాధారణ పౌరులు జూన్ 5 నుండి జూన్ 20 వరకు పీఓకే ప్రాంతంలో పర్యటించవద్దని, అక్కడికి వెళ్లడం సురక్షితం కాదని స్పష్టం చేసింది. అంతర్జాతీయంగా ఎదురవుతున్న తీవ్ర ఆర్థిక ఇబ్బందులు, దేశీయంగా పెరుగుతున్న రాజకీయ ఒత్తిళ్ల మధ్య, ఇప్పుడు పీఓకేలో చెలరేగిన ఈ ప్రజా నిరసనలు షెహబాజ్ షరీఫ్ ప్రభుత్వానికి మరియు పాక్ సైన్యానికి పెద్ద సవాలుగా మారాయి.