Murder : అమెరికాలో పరిశోధనా విద్యార్థుల హత్య!  స్నేహితుడే హంతకుడు..

Murder : అమెరికాలో ఉన్నత చదువుల కోసం వెళ్లిన ఇద్దరు బంగ్లాదేశీ పరిశోధక విద్యార్థుల కథ విషాదాంతమైంది. యూనివర్సిటీ ఆఫ్ సౌత్ ఫ్లోరిడా (USF)లో పీహెచ్‌డీ చేస్తున్న జమిల్ లిమోన్, నహిదా బ్రిస్టీలు దారుణ హత్యకు గురైన ఘటన అంతర్జాతీయంగా కలకలం రేపుతోంది. ఈ కేసుకు సంబంధించిన  వివరాలు ఇలా ఉన్నాయి:

27 ఏళ్ల జమిల్ లిమోన్ పర్యావరణ విధానాలపై, అదే వయసున్న నహిదా బ్రిస్టీ కెమికల్ ఇంజనీరింగ్‌లో పరిశోధనలు చేస్తున్నారు. వీరిద్దరూ కొన్నేళ్లుగా ప్రేమలో ఉండటమే కాకుండా, త్వరలోనే వివాహం చేసుకోవాలని కూడా నిశ్చయించుకున్నారు. అయితే, ఏప్రిల్ 16న క్యాంపస్‌లో చివరిసారిగా కనిపించిన వీరు, ఆ తర్వాత అకస్మాత్తుగా అదృశ్యమయ్యారు. దీనిపై కేసు నమోదు చేసిన పోలీసులు గాలింపు చేపట్టగా, పది రోజుల తర్వాత ఏప్రిల్ 25న టాంపా బేలోని హోవార్డ్ ఫ్రాంక్‌ల్యాండ్ బ్రిడ్జ్ సమీపంలో జమిల్ మృతదేహం నీటిపై తేలుతూ లభ్యమైంది. నహిదా ఆచూకీ ఇంకా దొరకనప్పటికీ, లభించిన ఆధారాల బట్టి ఆమె కూడా హత్యకు గురైనట్లు పోలీసులు నిర్ధారించారు.

ఈ దారుణానికి పాల్పడింది మరెవరో కాదు, జమిల్ లిమోన్ రూమ్‌మేట్ అయిన హిషామ్ అబుఘర్బీహ్ (26) అని పోలీసులు ప్రాథమిక విచారణలో తేల్చారు. నిందితుడు బాధితులతో కలిసి ఒకే అపార్ట్‌మెంట్‌లో నివసించేవాడు. ముందస్తు ప్రణాళికతోనే హిషామ్ ఈ జంటను అత్యంత క్రూరంగా హత్య చేసినట్లు ఆధారాలు లభించాయి. నిందితుడిపై ఇప్పటికే రెండు హత్య కేసులు నమోదు చేసిన పోలీసులు, అతడిని అదుపులోకి తీసుకుని విచారిస్తున్నారు. పోలీసుల ప్రాథమిక అంచనా ప్రకారం, వీరి మధ్య ఉన్న వ్యక్తిగత గొడవలే ఈ హత్యలకు దారితీసి ఉండవచ్చు. రూమ్‌మేట్స్ మధ్య తలెత్తిన చిన్నపాటి వివాదమా లేక మరేదైనా కారణమా అన్న కోణంలో దర్యాప్తు సాగుతోంది.

ఈ ఘటనపై బంగ్లాదేశ్ ప్రభుత్వం తీవ్ర దిగ్భ్రాంతి వ్యక్తం చేసింది. అమెరికాలోని తమ రాయబార కార్యాలయం ద్వారా అక్కడి అధికారులతో సంప్రదింపులు జరుపుతూ, దర్యాప్తును వేగవంతం చేసి నిందితుడికి కఠిన శిక్ష పడేలా చూడాలని కోరింది.ప్రస్తుతం టాంపా బే ప్రాంతంలో నహిదా బ్రిస్టీ మృతదేహం కోసం కోస్ట్ గార్డ్ బృందాలు గాలింపు చర్యలు ముమ్మరం చేశాయి. ఉన్నత శిఖరాలను అధిరోహించాల్సిన యువ పరిశోధకులు ఇలా ప్రాణాలు కోల్పోవడంతో యూనివర్సిటీ ఆఫ్ సౌత్ ఫ్లోరిడాలో విషాద ఛాయలు అలముకున్నాయి. అమెరికాలో పెరుగుతున్న ఇలాంటి హింసాత్మక ఘటనలు అంతర్జాతీయ విద్యార్థులలో ఆందోళన కలిగిస్తున్నాయి.