US Visa Fraud : గ్రీన్‌కార్డులు పొందేందుకు చోరీ నాటకం ...వీసా మోసాలతో11 మంది ఇండియన్స్‌ అరెస్ట్‌

US Visa Fraud :  పలు కారణాలతో అమెరికా వెళ్లడమే కాకుండా అక్రమంగా అక్కడే ఉంటూ వీసా మోసాలకు పాల్పడ్డారన్న ఆరోపణలతో 11 మంది ఇండియన్లను అక్కడి పోలీసులు అరెస్ట్‌ చేశారు. ఆ దేశపు  గ్రీన్ కార్డుల కోసం వీరంతా చోరీల నాటకాలు ఆడారని దర్యాప్తులో తేలడంతో వారిని అదుపులోకి తీసుకున్నారు. తాము దోపిడీ బాధితులమని చెప్పి డ్రామాలకు తెరలేపి ‘యూ-వీసా’ పొందేందుకు ప్రయత్నించినట్లు వారిపై అభియోగాలు మోపారు. 

ఇతర దేశాల వారు ఎవరైనా అమెరికా వెళ్తే అక్కడ హింసాత్మక నేరాల్లో బాధితులై ఉంటే వారు అమెరికా (USA)లో చట్టబద్ధంగా ఉండేందుకు యూ-వీసా (నాన్‌ ఇమిగ్రేషన్‌ స్టేటస్‌)కు దరఖాస్తు చేసుకోవడానికి అవకాశం ఉంటుంది. ఈ  వీసా లభిస్తే వలసదారులకు పని చేసుకోవడానికి అనుమతి లభించడంతో పాటు 5-10 ఏళ్లలో గ్రీన్‌కార్డు (Green Card) పొందేందుకు అవకాశం లభిస్తుంది. ఈ అవకాశాన్ని ఆసరాగా తీసుకున్న కొంతమంది  భారతీయ వలసదారులు మోసాలకు పాల్పడినట్లు యూఎస్‌ ఫెడరల్‌ ప్రాసిక్యూటర్లు తేల్చారు. ఈ కేసులకు సంబంధించి మసాచుసెట్స్‌, కెంటకీ, ఒహాయో తదితర రాష్ట్రాల్లో మొత్తం 11 మంది భారతీయులను పోలీసులు అరెస్టు చేసినట్లు వెల్లడించారు.

వీరంతా అక్రమంగా అమెరికాలో నివాసం ఉంటున్నట్లు అధికారులు గుర్తించారు. వీరిలో ఓ వ్యక్తిని భారత్‌కు డిపోర్ట్‌ చేశారు.. మిగతావారిలో ఆరుగురిని  కోర్టులో హాజరుపర్చి విడుదల చేయగా మిగతా నలుగురిని రిమాండ్‌లో ఉంచినట్లు పోలీసులు తెలిపారు. వీరంతా  ఓ ముఠాగా ఏర్పడి వ్యవస్థీకృత మోసాలకు పాల్పడినట్లు దర్యాప్తు అధికారులు స్పష్టం చేశారు. ఫాస్ట్‌ఫుడ్‌ రెస్టారెంట్లు, మద్యం దుకాణాలు, స్టోర్ల వద్ద దోపిడీలు చేయించినట్లు వివరించారు. అనంతరం ఈ ఘటనల్లో తాము బాధితులమంటూ నమ్మించడమే కాకుండా యూ వీసాలకు (U-Visa) దరఖాస్తులు చేసే ప్రయత్నం చేశారని అక్కడి అధికారులు తెలిపారు. ఈ కేసులో నేర రుజువైతే నిందితులకు ఐదేళ్ల జైలు శిక్ష, 2.5లక్షల డాలర్ల జరిమానా విధించే అవకాశం ఉంది.