Court: భార్యను సెకండ్ హ్యాండ్ అన్న భర్త.. షాకిచ్చిన హైకోర్టు.. ఫైన్ ఎంతంటే?

ఇద్దరు బాగా చదువుకున్నారు...మంచి ఉద్యోగాలు.. పెద్దలు వారి పెళ్లిని ఎంతో ఘనంగా చేశారు. ఎంతో ఖర్చు పెట్టారు. ఆ తరువాత ఇద్దరు అమెరికా వెళ్లి సెటిల్ అయిపోయారు. అక్కడి పౌరసత్వం కూడా తీసుకున్నారు. అయితే కొంతకాలానికి ఇరువురి మధ్య గొడవలు మొదలైయ్యాయి. దీంతో భార్య భర్తను విడిచిపెట్టి వచ్చి ముంబైలోని తల్లిదండ్రుల వద్దనే ఉంటుంది.

దీంతో భర్త గారు విడాకులు కోరుతూ అమెరికా కోర్టులో అప్లై చేసుకున్నాడు. ఆ కాగితాలను భార్యకు పంపించాడు. దీంతో భార్య కూడా భర్త మీద గృహహింస కేసు పెట్టింది. ఆ పిటిషన్‌ లో ఆమె పేర్కొన్న వివరాలు ఇలా ఉన్నాయి. తమ ఇద్దరికీ 1994లో వివాహమైందని బాధితురాలు ఫిర్యాదులో పేర్కొంది. ఇద్దరూ హనీమూన్ కోసం నేపాల్ వెళ్లారు. ఈ సమయంలో ఆమె భర్త ఆమెను 'సెకండ్ హ్యాండ్' అని పిలిచాడు. వాస్తవానికి, ఆమెకు ముందు ఓ నిశ్చితార్థం జరిగి ఆగిపోయింది. అనంతరం భార్యాభర్తలిద్దరూ అమెరికా వెళ్లారని బాధితురాలు తెలిపింది. అమెరికాలో పెళ్లి వేడుక కూడా ఏర్పాటు చేశాడు. కొన్ని రోజుల తర్వాత, భర్త బాధితురాలిపై దాడి చేయడం ప్రారంభించాడు. ఆమె క్యారెక్టర్‌ పై అనుమానం వ్యక్తం చేస్తూ తప్పుడు ఆరోపణలు చేయడం ప్రారంభించారు.

ఇంతలో, భార్యాభర్తలిద్దరూ 2005లో ముంబైకి తిరిగి వచ్చి ఉమ్మడిగా ఉన్న ఇంట్లో నివసించడం ప్రారంభించారు. 2008లో భార్య తన తల్లి వద్దకు వెళ్లేందుకు తల్లి ఇంటికి వెళ్లింది. భర్త మళ్లీ అమెరికాకు తిరిగి వచ్చాడు. అక్కడ నుంచి భార్యకు విడాకుల నోటీసులు పంపించాడు.దీంతో విసుగు చెందిన బాధితురాలు గృహ హింస చట్టం కింద 2017లో మెట్రోపాలిటన్ మేజిస్ట్రేట్ కోర్టులో ఫిర్యాదు చేసింది. బాధితురాలు చేసిన ఆరోపణలను ఆమె తల్లి, సోదరుడు, మామ కోర్టులో ధృవీకరించారు.

బాధితురాలు గృహహింస బాధితురాలని కోర్టు అంగీకరించింది. 2023 జనవరిలో, భర్తకు రూ.3 కోట్లు పరిహారం చెల్లించాలని, దాదర్‌లో ఇల్లు ఇవ్వాలని, ప్రత్యామ్నాయంగా ఇంటికి రూ. 75 వేలు, ప్రతి నెలా రూ.1.5 లక్షల నిర్వహణ భత్యం ఇవ్వాలని కోర్టు ఆదేశించింది.ట్రయల్ కోర్టు ఇచ్చిన ఈ ఉత్తర్వులను వ్యతిరేకిస్తూ భర్త హైకోర్టులో రివిజన్ పిటిషన్‌ను దాఖలు చేశారు. ఇప్పుడు బాంబే హైకోర్టు భార్యకు రూ.3 కోట్ల పరిహారం, రూ.1.5 లక్షల భరణం ఇవ్వాలని ట్రయల్ కోర్టు ఇచ్చిన ఆదేశాలను సమర్థించింది.

మహిళకు శారీరక గాయాలే కాకుండా మానసిక హింస, మానసిక వేదనకు కూడా పరిహారంగా ఈ మొత్తాన్ని అందజేస్తున్నట్లు హైకోర్టు న్యాయమూర్తి జస్టిస్ షర్మిలా దేశ్‌ముఖ్‌ ఉత్తర్వుల్లో పేర్కొన్నారు.

Also read: నువ్వో శక్తి స్వరూపిణివి.. సందేశ్‌ ఖాలీ బాధితురాలితో ఫోన్ లో మోదీ!