Telangana: ఏండ్లు గడిచినా.. ఆ భూములకు పత్తాలేని పాస్​ బుక్ లు!

Hyderabad: తెలంగాణలో గత బీఆర్ఎస్ (BRS) ప్రభుత్వం మూడేళ్ల కిందట తీసుకొచ్చిన ధరణి పోర్టల్‌ వ్యవహారం ఇటీవల చర్చనీయాంశమైన విషయం తెలిసిందే. కాగా ఈ పోర్టల్ వల్ల భూముల రిజిస్ట్రేషన్ ప్రక్రియ సులభమైనప్పటికీ అంతకు మించిన వివాదాలకు కారణమైంది. ముఖ్యంగా ఈ ధరణి పోర్టల్‌లో గ్రేటర్ హైదరాబాద్ విస్తీర్ణానికి సంబంధించిన దాదాపు 16 లక్షల ఎకరాల భూములు నిరుపయోగంగా ఉన్నాయని చెబుతూ 'నిషిద్ధ జాబితా' కింద ఉంచారు అధికారులు. దీంతో ప్రధాన ఆర్థిక వనరుల్లో ఒకటిగా ఉన్న హైదరాబాద్ మెట్రోపాలిటన్ డెవలప్‌మెంట్ అథారిటీ జిల్లాలైన రంగారెడ్డి, మేడ్చల్ మల్కాజిగిరి, సంగారెడ్డి జిల్లాలకు చెందిన భూమీ వృథాగా పోతుందని అర్బన్ ప్లానర్లు, నిపుణులు ఆందోళన వ్యక్తం చేశారు.

పట్టాదార్‌ పాసుపుస్తకాలు లేవు..
ఈ మేరకు దాదాపు 18 లక్షల ఎకరాలకు పట్టాదార్‌ పాసుపుస్తకాలు ఇంతవరకూ ఇవ్వలేదని వాపోతున్నారు. ఈ భూమికి సంబంధించిన నిజమైన పట్టాదార్లు, యజమానులు తమ భూమిని అమ్మడం లేదా కొనడం సాధ్యం కాకపోవడంతో నిషేధిత జాబితా నుంచి తమ భూమిని తొలగించాలని రెవెన్యూ అధికారుల చుట్టూ పరుగులు తీస్తున్నారు. ఇప్పటికే ఇందులో కొన్ని ఎకరాల్లో వ్యవసాయం చేసే అనేక మంది రైతులు పెద్దఎత్తున నిరసలు చేపట్టారు. దీంతో జిల్లా కలెక్టర్ల అనుమతులతో రెవెన్యూ శాఖ ఏడాది క్రితం నిషేధిత జాబితా నుంచి సుమారు 2.5 లక్షల ఎకరాలను తొలగించింది.

అధికారులకు విన్నవించినా ఫలితం లేదు..
అయితే ఇటీవల సూర్యాపేట జిల్లాకు చెందిన తడకమల్ల శరత్ అనే రైతు ఎల్లారం గ్రామంలో తనకున్న ఏడెకరాల వ్యవసాయ భూమికి సంబంధించి రెవెన్యూ రికార్డుల్లో తప్పులు దొర్లాయని, తప్పులు సరిచేయాలని అధికారులకు విన్నవించినా ఫలితం లేకుండా పోయింది. చిన్న ప్లాట్ల యజమానులు సైతం తప్పులను సరిదిద్దుకునేందుకు కార్యాలయాల చుట్టూ ప్రదక్షిణలు చేస్తున్నారు. మేడ్చల్‌కు చెందిన ఎస్ చలమరాజు పట్టణంలోని తన 200 చదరపు గజాల స్థలాన్ని రెవెన్యూ అధికారుల అక్రమ ప్రవేశం కారణంగా 'ఎండోమెంట్ భూమి'గా వర్గీకరించిన నిషేధిత జాబితా నుంచి తొలగించాలని ప్రభుత్వాన్ని కోరుతున్నారు.

హైదరాబాద్ లో రియల్టీ వృద్ధి దెబ్బతింటోంది..
ఇక ఈ ధరణి పోర్టల్ లో హైదరాబాద్ పరిసర ప్రాంతాల్లో భూమి పట్టాలు మంజూరు చేయకపోవడంతో రియల్టీ బిజినెస్ దెబ్బతింటోందని ఆరోపిస్తున్నారు.'రాష్ట్రంలోని కొన్ని భూములను అభివృద్ధి చేయలేకపోవడంతోపాటు.. ప్రభుత్వం రిజిస్ట్రేషన్ ఛార్జీలు, డెవలప్‌మెంట్ ఛార్జీలు, భవనాల రుసుము ఇతర పన్నులతో నష్టపోతున్నాం. ప్రభుత్వం ధరణి ఫిర్యాదులను ముందుగా పరిష్కరించాలి' అని అర్బన్ ప్లానర్ కోరుతున్నారు. తెలంగాణ డెవలపర్స్ అసోసియేషన్ ప్రెసిడెంట్ జివి రావు మాట్లాడుతూ ధరణి సృష్టించిన గందరగోళం వల్ల హైదరాబాద్ పరిసర ప్రాంతాల్లో రియల్ ఎస్టేట్ అభివృద్ధి నిలిచిపోయిందన్నారు. 'ధరణిని అనారోగ్యకరమైనదిగా భావించారు. కొన్ని ఆస్తులను నిషేధ జాబితాలో ఉంచడం అనేది ప్రజల చట్టపరమైన, ప్రాథమిక హక్కులను ప్రత్యక్షంగా ఉల్లంఘించడమే' అని ఆయన అన్నారు.

ఇది కూడా చదవండి : Free Bus : మహిళలకు ఉచిత ప్రయాణం ఆగిపోనుందా? హైకోర్టులో దాఖలైన పిల్

కాంగ్రెస్ ప్రభుత్వం సమస్యలను పరిష్కరించాలి..
ధరణి సమస్యలు ఎదుర్కొంటున్న పలువురి సమస్యలను కాంగ్రెస్ ప్రభుత్వం వెంటనే పరిష్కరించాలని రియల్టర్లు కోరుతున్నారు. ల్యాండ్ అడ్మినిస్ట్రేషన్ ప్రధాన కమిషనర్ (CCLA) వద్ద పెండింగ్‌లో ఉన్న 2.3 లక్షల దరఖాస్తులలో, వాటిలో ఎక్కువ భాగం గత మూడేళ్లుగా నిషేధిత భూమి, ఆస్తులకు సంబంధించినవేనని బాధితులు చెబుతున్నారు. 'ఒక సర్వే నంబర్‌లో ఒకటి లేదా రెండు ఎకరాలు ప్రభుత్వ, వక్ఫ్ లేదా ఎండోమెంట్స్ భూమి లేదా చట్టపరమైన వివాదంలో ఉంటే, 50 నుంచి 100 ఎకరాల వరకు ఉన్న సర్వే నంబర్ మొత్తం నిషేధించబడుతుంది. లావాదేవీలకు బ్లాక్ చేయబడుతుంది. యజమానులు వ్యక్తిగతంగా దరఖాస్తు చేసుకోవాలి. అది ప్రభుత్వ భూమి కాదని లేదా చట్టపరమైన చిక్కుల్లో లేదని నిరూపించడానికి భూమిని చూపించి నిరూపించాలి' అని గత రెండేళ్లుగా ధరణి అవాంతరాలపై పోరాడుతున్న న్యాయవాది గుమ్మి రాజ్‌కుమార్ రెడ్డి TOIకి వివరించారు.

'బీఆర్‌ఎస్‌ ప్రభుత్వ నిర్లక్ష్యం.. 
అలాగే సెక్షన్ 'బి'లో వివాదాస్పద భూమిలో వర్గీకరించబడిన ఆస్తికి పట్టాదార్ పాస్‌బుక్‌లు జారీ చేయకపోవడం, భూ విస్తీర్ణం సరిదిద్దడానికి సదుపాయం లేకపోవడం, భూ వర్గీకరణ సవరణ మొదలైనవి ధరణికి సంబంధించిన కొన్ని ప్రధాన సమస్యలలో ఉన్నాయని రాజ్‌కుమార్ రెడ్డి చెప్పారు. అలాగే 'బీఆర్‌ఎస్‌ ప్రభుత్వం ఎలాంటి చర్యలు తీసుకోలేదు. ధరణి అవాంతరాల పరిష్కారానికి ఫిర్యాదులు పంపాలని గత ప్రభుత్వం ప్రజలను కోరింది. అయితే దాఖలైన దరఖాస్తుల్లో 10% మాత్రమే క్లియర్ చేయగలిగింది. ధరణిపై సవరణల కోసం CCLA 35 మాడ్యూళ్లను అభివృద్ధి చేసింది. కానీ చాలా సమస్యలను పరిష్కరించలేకపోయింది' అని ధరణి కమిటీ సభ్యుల్లో ఒకరైన న్యాయవాది, భూ చట్టాల నిపుణుడు బి సునీల్ కుమార్ అన్నారు. అలాగే పోర్టల్‌లోని 46 సమస్యల జాబితాను బయటపెట్టిన ఆయన.. వీటిని గతంలో బీఆర్‌ఎస్‌ ప్రభుత్వం దృష్టికి తీసుకెళ్లినా ఎలాంటి చర్యలు తీసుకోలేదన్నారు.

ధరణిలో ప్రధాన సమస్యలు..
ఇక 'అసైన్డ్, ప్రభుత్వం, సీలింగ్, ఎండోమెంట్స్ లేదా వక్ఫ్ భూమిగా గుర్తించబడిన పట్టా భూములు ధరణిలో ప్రధాన సమస్యలుగా ఉన్నాయి. ఒక వ్యక్తి కొనుగోలులో భూమిని కోల్పోతే, సేకరణతో సంబంధం లేనప్పటికీ, ఎటైర్ సర్వే నంబర్ నిషేధిత జాబితాలో చేర్చబడుతుంది. కొన్ని చోట్ల వ్యవసాయ భూమిని ఇల్లుగా చూపించారు.పట్టా భూమిని నోషనల్ ఖాతాలో ఉంచారు. ధరణికి ముందు జరిగిన భూమి లావాదేవీలు ఇప్పటికీ పాత యజమానుల పేర్లను చూపుతున్నాయి. ఒక యజమానికి రెండు పాస్‌బుక్‌లు ఇచ్చారు. సాదా బైనామా భూమికి పాస్‌బుక్‌లు ఇంకా ఇవ్వలేదు' అని సునీల్ వివరించారు.