ఇండియన్ బుక్ ఆఫ్ రికార్డ్స్‌లో వైయస్ షర్మిల ప్రజా ప్రస్థానం

షర్మిలకు అవార్డును ప్రదానం ఇండియన్ బుక్ ఆఫ్ రికార్డ్స్ ప్రతినిధులు

2021 అక్టోబర్​ 21న వైఎస్ షర్మిల తన ప్రజాప్రస్ధాన యాత్రను చేవెళ్ల నుంచి ప్రారంభించారు. ఈ యాత్రలో ఆమెకు ఎన్ని అడ్డంకులు వచ్చిన వాటిని ఎదుర్కొని కొనసాగించారు. వరంగల్​ జిల్లాలో ఎన్ని ఉద్రిక్తత పరిస్థితులు వచ్చిన కోర్టుకు వెళ్లి మరీ.. అనుమతులు తెచ్చుకొని పాదయాత్ర కొనసాగించారు. దాదాపు సంవత్సరం ఆరు నెలలు ఈ యాత్ర కొనసాగింది. దీంతో తన యాత్రను గుర్తించిన ఇండియన్ బుక్ ఆఫ్ రికార్డ్స్ ప్రతినిధులు లోటస్ పాండ్​లోని వైఎస్​ఆర్​ తెలంగాణ పార్టీ కార్యాలయంలో షర్మిలను కలిసి అభినందించారు. అనంతరం అవార్డును ప్రదానం చేశారు. అయితే కేసీఆర్​ ప్రభుత్వాన్ని గద్దె దించాలనే ఉద్దేశంతో షర్మిల ప్రజాప్రస్థాన యాత్ర పేరుతో పాదయాత్ర చేసింది.

ప్రజాప్రస్థాన పాదయాత్రలో ఆమె బీఆర్​ఎస్​ ముఖ్యమంత్రి కేసీఆర్​, మంత్రులు, ఎమ్మెల్యేలపై కీలక వ్యాఖ్యలు చేశారు. దీంతో కొన్నిచోట్ల ఆమె యాత్రకు పోలీసులు ఆటంకం కలిగించారు. మరికొన్ని సార్లు జైలుకి వెళ్లారు. అయినా ఆమె పట్టు వదలని విక్రమార్కునిలా పాదయాత్రను కొనసాగించింది. ఇటీవలే వైఎస్సార్​ పుట్టినరోజు సందర్భంగా పాలమూరులో మరల తన పాదయాత్రను త్వరలో మొదలు పెడతానని ప్రకటించారు. గతంలో ఏపీలోనూ పాదయాత్ర చేసినా.. తెలంగాణలో చేసినంత సుదీర్ఘంగా చేయలేదు.

కేసీఆర్ పాలనకు చరమ గీతం పాడాలని షర్మిల ఆకాంక్ష

ఇవాళ హైదరాబాద్​లోని వైఎస్​ఆర్​టీపీ కార్యాలయంలోని 77వ స్వాతంత్ర్య దినోత్సవ వేడుకల్లో వైఎస్​ షర్మిల ముఖ్య అతిథిగా హాజరయ్యారు. ఈ కార్యక్రమంలో పార్టీ కార్యకర్తలు, అభిమానులు అధిక సంఖ్యలో పాల్గొన్నారు. ఈ సందర్భంగా ఆమె మాట్లాడుతూ.. భిన్నత్వంలో ఏకత్వం భారతదేశం గొప్పదనమని అన్నారు. ఎన్నో కులాలు, ఎన్నో మతాలు, ఎన్నో భాషలు కలిసిమెలిసి జీవిస్తుండడం దేశ గౌరవమని తెలిపారు. ప్రస్తుతం కేంద్రప్రభుత్వం బ్రిటీష్​ వారు ఆచరించిన డివైడ్​ అండ్​ రూల్​ పద్దతిలో పాలన సాగుతుందని విమర్శించారు. మణిపూర్​లో మహిళలపైన అల్లర్లు ఇంకా కొనసాగుతున్నాయని ఆవేదన వ్యక్తం చేశారు. ఈ ఏడాదితో కేసీఆర్ పాలనకు చరమ గీతం పాడాలని షర్మిల ఆకాంక్షించారు.