Telangana : తెలంగాణకు గుడ్ న్యూస్..రాష్ట్రానికి ఎనిమిది కొత్త రైళ్లు..

Telangana : తెలంగాణ నుంచి ఇతర రాష్ట్రాలకు ప్రయాణించే ప్రయాణికుల కోసం కేంద్ర ప్రభుత్వం ఒక కీలక నిర్ణయం తీసుకుంది. రాష్ట్రంలో పెరుగుతున్న ప్రయాణ రద్దీని దృష్టిలో ఉంచుకుని, హైదరాబాద్‌లోని వివిధ రైల్వే స్టేషన్ల నుంచి దేశంలోని పలు ప్రధాన నగరాలకు కనెక్టివిటీని పెంచే దిశగా కేంద్రం అడుగులు వేసింది. ఈ మేరకు హైదరాబాద్‌లోని కాచిగూడ, చర్లపల్లి,  నాంపల్లి స్టేషన్ల నుంచి 8 కొత్త 'వీక్లీ స్పెషల్' రైళ్లను నడపాలని రైల్వే మంత్రిత్వ శాఖ ఆమోదం తెలిపింది.

కేంద్ర బొగ్గు మరియు గనుల శాఖ మంత్రి జి. కిషన్‌రెడ్డి ఈ విషయాన్ని వెల్లడించారు. రాష్ట్రవ్యాప్తంగా రైల్వే మౌలిక సదుపాయాలను మెరుగుపరచడంలో భాగంగా, ప్రధాని నరేంద్ర మోదీ     రైల్వే మంత్రి అశ్వినీ వైష్ణవ్‌ల సహకారంతో ఈ కొత్త రైలు సర్వీసులను అందుబాటులోకి తెస్తున్నట్లు ఆయన పేర్కొన్నారు.

ఈ కొత్త రైళ్ల ప్రత్యేకతలు

ఈ కొత్త రైళ్లు హైదరాబాద్ నుంచి తిరుపతి, తిరుచానూరు వంటి పుణ్యక్షేత్రాలతో పాటు, భువనేశ్వర్ (ఒడిశా), జైపూర్ (రాజస్థాన్), మరియు శ్రీ గంగానగర్ (రాజస్థాన్) వంటి సుదూర ప్రాంతాలకు కనెక్టివిటీని మెరుగుపరుస్తాయి. కాచిగూడ, చర్లపల్లి, నాంపల్లి స్టేషన్ల నుంచి ఈ సర్వీసులు ప్రారంభం కానున్నాయి.వేలాది మంది ప్రయాణికులు, భక్తులు, సుదూర ప్రాంతాలకు వెళ్లే ఉద్యోగులు, విద్యార్థులకు ఈ రైళ్లు ఎంతో సౌకర్యవంతంగా ఉండనున్నాయి.

మంత్రి కిషన్‌రెడ్డి కృతజ్ఞతలు

తెలంగాణలో రైల్వే నెట్‌వర్క్‌ను బలోపేతం చేసేందుకు కేంద్రం నిరంతరం కృషి చేస్తోందని కిషన్‌రెడ్డి పేర్కొన్నారు. ఈ కొత్త రైళ్లను మంజూరు చేసినందుకు ప్రధాని మోదీకి, రైల్వే మంత్రి అశ్వినీ వైష్ణవ్‌కు ఆయన ప్రత్యేక ధన్యవాదాలు తెలిపారు. ఈ విషయాన్ని ఆయన 'ఎక్స్' (ట్విట్టర్) వేదికగా పంచుకుంటూ, రాష్ట్రంలో రైల్వే వ్యవస్థను ఆధునీకరించే క్రమంలో ఇదొక కీలక అడుగు అని అభివర్ణించారు.

ఈ కొత్త సర్వీసుల ప్రారంభంతో తెలంగాణ నుంచి ఇతర రాష్ట్రాలకు ప్రయాణించే వారికి తిప్పలు తప్పనున్నాయని, రద్దీ సమయాల్లో ప్రయాణం సులభతరం కానుందని రైల్వే అధికారులు భావిస్తున్నారు. త్వరలోనే ఈ రైళ్ల పూర్తి షెడ్యూల్,సమయ వేళలను రైల్వే శాఖ అధికారికంగా విడుదల చేయనుంది.