Earthquake : భద్రాద్రి కొత్తగూడెం జిల్లాలో భూకంపం.. భయంతో పరుగులు తీసిన జనం

Earthquake : భద్రాద్రి కొత్తగూడెం జిల్లాలో శనివారం అర్ధరాత్రి దాటిన తర్వాత (ఆదివారం తెల్లవారుజామున) స్వల్ప భూకంపం సంభవించింది. జాతీయ భూకంప విజ్ఞాన కేంద్రం (NCS) అందించిన వివరాల ప్రకారం.. ఈ రోజు (జూన్ 14, 2026) తెల్లవారుజామున 2.26 గంటల సమయంలో భూమి ఒక్కసారిగా కంపించింది. గాఢ నిద్రలో ఉన్న ప్రజలు ఈ హఠాత్ పరిణామానికి ఒక్కసారిగా ఉలిక్కిపడ్డారు.

రిక్టర్‌ స్కేల్‌పై ఈ భూకంప తీవ్రత 3.8గా నమోదైనట్లు అధికారులు వెల్లడించారు. ఈ భూకంప కేంద్రం (Epicenter) ఆంధ్రప్రదేశ్‌లోని రాజమండ్రికి వాయువ్య దిశగా సుమారు 111 కిలోమీటర్ల దూరంలో, భూగర్భంలో 10 కిలోమీటర్ల లోతులో కేంద్రీకృతమై ఉన్నట్లు శాస్త్రవేత్తలు గుర్తించారు. భూకంప తీవ్రత తక్కువగానే ఉన్నప్పటికీ, ఆ చుట్టుపక్కల ప్రాంతాల్లో ప్రకంపనలు స్పష్టంగా తెలిశాయి.

 అర్ధరాత్రి వేళ ఇళ్లు, పాత్రలు కదలడంతో ఏం జరుగుతుందో తెలియక ప్రజలు తీవ్ర భయాందోళనలకు గురయ్యారు. ప్రాణభయంతో చాలామంది ఇళ్ల నుంచి బయటకు పరుగులు తీసి, వీధుల్లోనే గడిపారు. ఈ స్వల్ప భూకంపం కారణంగా ఎటువంటి ప్రాణ నష్టం లేదా ఆస్తి నష్టం జరిగినట్లు ఇప్పటివరకు ఎలాంటి నివేదికలు అందలేదు. అయినప్పటికీ, స్థానిక యంత్రాంగం అప్రమత్తమై పరిస్థితిని గమనిస్తోంది.