Pakistan : బంగ్లాదేశ్ చేతిలో దెబ్బ.. పాక్ టెస్ట్ కెప్టెన్ షాన్ మసూద్ అవుట్!

పాకిస్తాన్ క్రికెట్‌లో మరోసారి కెప్టెన్సీ మార్పునకు రంగం సిద్ధమైంది. వరుస ఓటములతో సతమతమవుతున్న ప్రస్తుత టెస్ట్ కెప్టెన్ షాన్ మసూద్‌పై పాకిస్తాన్ క్రికెట్ బోర్డు వేటు వేయనున్నట్లు తెలుస్తోంది. గత నెలలో బంగ్లాదేశ్‌ చేతిలో ఎదురైన వరుసగా నాలుగో ఓటమితో పిసిబి చైర్మన్ మొహసిన్ నఖ్వీ ఈ నిర్ణయానికి వచ్చినట్లు సమాచారం. మసూద్ స్థానంలో ఆల్‌రౌండర్ సల్మాన్ ఆఘాను కొత్త టెస్ట్ కెప్టెన్‌గా నియమించే అవకాశాలు ఎక్కువగా ఉన్నాయి.

డిసెంబర్ 2023లో ఆస్ట్రేలియా పర్యటన నుండి టెస్ట్ కెప్టెన్‌గా బాధ్యతలు చేపట్టిన షాన్ మసూద్.. గత మూడేళ్ల కాలంలో  జట్టును సరైన దారిలో నడిపించలేకపోయాడు. ఆయన కెప్టెన్సీలో ఆడిన 16 టెస్టుల్లో పాకిస్తాన్ ఏకంగా 12 మ్యాచ్‌ల్లో ఓడిపోయింది. 150 ఏళ్ల టెస్ట్ క్రికెట్ చరిత్రలో.. అగ్రశ్రేణి తొమ్మిది దేశాల కెప్టెన్లలో తాను సారథ్యం వహించిన మొదటి 16 మ్యాచ్‌లలో 12 ఓటములు చవిచూసిన ఏకైక కెప్టెన్‌గా మసూద్ ఒక చెత్త రికార్డును మూటగట్టుకున్నాడు. గత ఏడాది జరిగిన ఐసీసీ వరల్డ్ టెస్ట్ ఛాంపియన్‌షిప్ మూడో సైకిల్‌లో పాకిస్తాన్ 9వ స్థానంలో నిలిచింది.

సల్మాన్ ఆఘానే సరైన ప్రత్యామ్నాయం

జట్టులో స్థిరత్వం కోసం తనను కెప్టెన్సీ నుండి తొలగించవద్దని షాన్ మసూద్ పిసిబి చైర్మన్ మొహసిన్ నఖ్వీని కోరినట్లు సమాచారం. అయితే, నఖ్వీ అతని సలహాదారులు మాత్రం మసూద్‌పై నమ్మకం కోల్పోయారు. రాబోయే రోజుల్లో వెస్టిండీస్, ఇంగ్లాండ్ దేశాలతో కఠినమైన టెస్ట్ సిరీస్‌లు ఉన్నందున.. జట్టును నడిపించడానికి సల్మాన్ ఆఘానే సరైన ప్రత్యామ్నాయమని వారు భావిస్తున్నారు. జూలై 25 నుండి ట్రినిడాడ్‌లో వెస్టిండీస్‌తో రెండు టెస్టులు, ఆ తర్వాత ఆగస్టు 19 నుండి లీడ్స్‌లో ఇంగ్లాండ్‌తో మూడు టెస్టుల సిరీస్ ప్రారంభం కానుంది. బ్యాటర్‌గా కూడా మసూద్ గత నాలుగు ఇన్నింగ్స్‌ల్లో కేవలం ఒకే ఒక హాఫ్ సెంచరీ చేయడంతో, అతనిని జట్టులో కొనసాగించడం కూడా కష్టంగా మారింది.

పాకిస్తాన్ జట్టు హెడ్ కోచ్‌గా మాజీ కెప్టెన్ సర్ఫరాజ్ అహ్మద్, బౌలింగ్ కోచ్‌గా ఉమర్ గుల్ కొనసాగనున్నారు. అయితే వెస్టిండీస్ పర్యటన కోసం కొత్త బ్యాటింగ్ కోచ్‌ను నియమించే అవకాశం ఉంది. మరోవైపు, పాకిస్తాన్ క్రికెట్ షెడ్యూల్‌ను మెరుగుపరచడానికి ఆటగాళ్ల ప్రగతిని పర్యవేక్షించడానికి కీలకమైన డైరెక్టర్ ఇంటర్నేషనల్ క్రికెట్ పదవిని మరో మాజీ కెప్టెన్ మహమ్మద్ హఫీజ్‌కు అప్పగించాలని పిసిబి యోచిస్తోంది. క్రికెట్‌పై హఫీజ్‌కు ఉన్న అవగాహన జట్టుకు ప్లస్ అవుతుందని బోర్డు భావిస్తోంది.