BIG BREAKING : అంతర్జాతీయ క్రికెట్‌కు కేన్ విలియమ్సన్ రిటైర్మెంట్!

న్యూజిలాండ్ క్రికెట్ జట్టు మాజీ కెప్టెన్ కేన్ విలియమ్సన్ అంతర్జాతీయ క్రికెట్‌కు రిటైర్మెంట్ ప్రకటిస్తూ సంచలన నిర్ణయం తీసుకున్నారు. ఈ ప్రకటనతో విలియమ్సన్ తన 16 ఏళ్ల సుదీర్ఘమైన, అద్భుతమైన అంతర్జాతీయ క్రికెట్ ప్రయాణానికి ముగింపు పలికారు. న్యూజిలాండ్ క్రికెట్ చరిత్రలోనే అత్యధిక పరుగులు చేసిన ఆటగాడిగా ఆయన రికార్డు సృష్టించారు. కేవలం 378 మ్యాచ్‌ల్లోనే 48.12 సగటుతో 19,346 అంతర్జాతీయ పరుగులు సాధించారు. ఆ దేశ క్రికెట్ చరిత్రలో అత్యంత గొప్ప, విజయవంతమైన బ్యాటర్‌గా ఆయన పేరు నిలిచిపోతుంది. 2019, 2023 ప్రపంచకప్‌లలో ఆయన న్యూజిలాండ్ జట్టును కెప్టెన్‌గా ముందుండి నడిపించారు.

కేన్ విలియమ్సన్ ఏమన్నారంటే:

"నేను దీని గురించి కొంతకాలంగా ఆలోచిస్తున్నాను. కానీ గత కొన్ని రోజులుగా, ఇదే సరైన సమయమని నాకు స్పష్టంగా అర్థమైంది. అంతర్జాతీయ క్రికెట్ ఆడాలనే కోరిక, కసి నాలో ఎప్పుడూ బలంగా ఉండేవి. న్యూజిలాండ్ కోసం ఆడిన ప్రతి మ్యాచ్‌లోనూ నా శక్తినంతా ధారపోశానని చెప్పడానికి నేను గర్వపడుతున్నాను. నా నూటికి నూరు శాతం ఇవ్వలేనప్పుడు ఆటను కొనసాగించడం సరైనది కాదు. అందుకే నా సొంత నిర్ణయంతో, గౌరవంగా తప్పుకునే అవకాశం రావడం నా అదృష్టంగా భావిస్తున్నాను" అని విలియమ్సన్ చెప్పారు.

విలియమ్సన్ 2016 నుండి 2024 వరకు మూడు ఫార్మాట్లలోనూ (టెస్ట్, వన్డే, టీ20) న్యూజిలాండ్ జట్టుకు కెప్టెన్‌గా వ్యవహరించారు. ఆయన నాయకత్వంలో జట్టు రెండుసార్లు ఐసీసీ ప్రపంచకప్ ఫైనల్స్‌కు, మూడుసార్లు సెమీఫైనల్స్‌కు చేరింది. అంతేకాకుండా 2021లో జరిగిన మొట్టమొదటి ఐసీసీ వరల్డ్ టెస్ట్ ఛాంపియన్‌షిప్‌ను న్యూజిలాండ్ గెలుచుకుంది. ఆయన 40 టెస్ట్ మ్యాచ్‌లకు కెప్టెన్‌గా ఉండి 22 విజయాలు, 10 ఓటములు, 8 డ్రాలు సాధించి.. స్టీఫెన్ ఫ్లెమింగ్ (28 విజయాలు) తర్వాత న్యూజిలాండ్ చరిత్రలోనే రెండో అత్యంత విజయవంతమైన టెస్ట్ కెప్టెన్‌గా నిలిచారు. అలాగే 91 వన్డే మ్యాచ్‌లలో 46 విజయాలు, 75 టీ20 మ్యాచ్‌లలో 39 విజయాలు అందించి.. న్యూజిలాండ్ చరిత్రలోనే అత్యధిక టీ20 విజయాలు అందించిన కెప్టెన్‌గా రికార్డు సృష్టించారు.

న్యూజిలాండ్ క్రికెట్ చరిత్రలోనే అత్యంత విజయవంతమైన కాలం విలియమ్సన్ కెప్టెన్సీలోనే సాగింది. ఇంగ్లాండ్‌లో జరిగిన 2019 క్రికెట్ వరల్డ్ కప్ ఫైనల్‌కు, భారతదేశంలో జరిగిన 2016 టీ20 వరల్డ్ కప్ సెమీఫైనల్‌కు ఆయన జట్టును తీసుకెళ్లారు. అలాగే 2021లో జరిగిన మొదటి ఐసీసీ వరల్డ్ టెస్ట్ ఛాంపియన్‌షిప్ ఫైనల్‌లో చారిత్రాత్మక విజయాన్ని అందించారు. దీనితో పాటు, ఆస్ట్రేలియాలో జరిగిన 2022 టీ20 వరల్డ్ కప్ సెమీఫైనల్స్, భారతదేశంలో జరిగిన 2023 క్రికెట్ వరల్డ్ కప్ సెమీఫైనల్స్, యూఏఈలో జరిగిన 2021 టీ20 వరల్డ్ కప్ ఫైనల్స్‌కు కూడా న్యూజిలాండ్ జట్టు ఆయన నాయకత్వంలోనే దూసుకెళ్లింది.