Odisha : కూతురు కులాంతర వివాహం.. మాజీ ఎమ్మెల్యేకు కుల బహిష్కరణ!

ఒడిశా రాష్ట్రంలోని నబరంగ్‌పూర్ జిల్లాలో ఒక షాకింగ్ ఘటన జరిగింది. మాజీ ఎమ్మెల్యే సదాశివ ప్రధానిని భత్రా సామాజిక వర్గం నుంచి బహిష్కరించారు. ఆయన తన కుమార్తెకు వేరే కులానికి చెందిన యువకుడితో పెళ్లి చేయడానికి నిర్ణయించుకోవడమే ఈ నిర్ణయానికి కారణం. సమాజం ఏర్పాటు చేసిన నిబంధనలను ఆయన ఉల్లంఘించారని ఆరోపిస్తూ ఈ కఠినమైన నిర్ణయం తీసుకున్నారు.

సామాజికంగా వెలివేస్తున్నట్లు

ఈ విషయమై భత్రా సమాజ నాయకులు నబరంగ్‌పూర్ జిల్లాలోని ఝరిగావ్ బ్లాక్, ధామణగూడ గ్రామంలో ప్రత్యేక సమావేశాన్ని ఏర్పాటు చేశారు. అఖిల భారతీయ భత్రా వికాస్ పరిషత్ ఆధ్వర్యంలో జరిగిన ఈ సమావేశంలో సమాజంలోని పెద్దలందరూ పాల్గొన్నారు. సదాశివ ప్రధాని కుటుంబం తీసుకున్న నిర్ణయం భత్రా గిరిజన సమాజం యొక్క సాంప్రదాయాలకు, ఆచారాలకు విరుద్ధమని వారు భావించారు. ఈ నేపథ్యంలో మాజీ ఎమ్మెల్యేతో పాటు ఆయన కుటుంబ సభ్యులను సామాజికంగా వెలివేస్తున్నట్లు ఒక లేఖ ద్వారా ప్రకటించారు. ఈ బహిష్కరణ వల్ల సమాజానికి చెందిన ఏ సభ్యుడు కూడా ప్రధాని కుటుంబంతో ఎటువంటి సంబంధం కలిగి ఉండకూడదని, వారి ఇంటి శుభకార్యాల్లో గానీ లేదా ఇతర వేడుకల్లో గానీ పాల్గొనకూడదని నిర్ణయించారు.

సదాశివ ప్రధాని కుమార్తె వివాహం వచ్చే నెలలో జరగనుంది. ఇప్పటికే వివాహానికి సంబంధించిన ఏర్పాట్లు కూడా పూర్తయ్యాయి. అయితే, సమాజం తీసుకున్న ఈ బహిష్కరణ నిర్ణయంపై సదాశివ ప్రధాని గానీ, ఆయన కుటుంబం గానీ ఇంతవరకు ఎటువంటి అధికారిక ప్రకటన చేయలేదు. ఒక ప్రజాప్రతినిధిగా పనిచేసిన వ్యక్తి విషయంలోనే ఇలాంటి పరిస్థితి ఎదురుకావడం ఆ ప్రాంతంలో చర్చకు దారితీసింది.

ఈ సంఘటన ఆధునిక కాలంలో కూడా కొన్ని గ్రామీణ ప్రాంతాల్లో కుల కట్టుబాట్లు ఎంత బలంగా ఉన్నాయో తెలియజేస్తోంది. వ్యక్తిగత నిర్ణయాలు, సామాజిక సంప్రదాయాల మధ్య జరుగుతున్న ఈ ఘర్షణపై అనేక వర్గాల నుంచి విమర్శలు వస్తున్నాయి. చట్టం ప్రకారం కులాంతర వివాహాలు చేసుకునే హక్కు అందరికీ ఉన్నప్పటికీ, క్షేత్రస్థాయిలో ఇలాంటి ఆచారాల వల్ల కుటుంబాలు ఎన్నో ఇబ్బందులను ఎదుర్కోవాల్సి వస్తోంది.