Tamil Nadu CM : సీం విజయ్‌ దూకుడు..కావేరీపై లేఖ..రేపు ఢిల్లీకి సీం విజయ్‌...ప్రధానితో భేటీ

Tamil Nadu CM : తమిళనాడు రాజకీయ యవనికపై నూతన ముఖ్యమంత్రిగా బాధ్యతలు స్వీకరించిన సి. జోసెఫ్ విజయ్ (దళపతి విజయ్) తన తొలి అధికారిక ఢిల్లీ పర్యటనకు సిద్ధమయ్యారు. ముఖ్యమంత్రిగా ప్రమాణ స్వీకారం చేసిన తర్వాత ఆయన హస్తినకు వెళ్తుండటం ఇదే మొదటిసారి. మూడు రోజుల పాటు సాగనున్న ఈ సుదీర్ఘ పర్యటనలో భాగంగా బుధవారం (మే 27) ఉదయం రాష్ట్ర ప్రధాన కార్యదర్శి, సీనియర్ అధికారుల బృందంతో కలిసి విజయ్ ఢిల్లీ చేరుకోనున్నారు. రాష్ట్రానికి సంబంధించిన అత్యంత కీలకమైన, సుదీర్ఘకాలంగా పెండింగ్‌లో ఉన్న అంతర్రాష్ట్ర వివాదాలపై కేంద్ర పెద్దలతో చర్చించడమే లక్ష్యంగా ఈ పర్యటన ఖరారైంది. ఈ పర్యటనకు సంబంధించిన పూర్తి వివరాలు, సీఎం విజయ్ అజెండాలోని ప్రధానాంశాలు ఇలా ఉన్నాయి.

కావేరీ వివాదం – ప్రధాని మోదీకి అత్యవసర లేఖ

తమిళనాడు, కర్ణాటక రాష్ట్రాల మధ్య దశాబ్దాలుగా నలుగుతున్న కావేరీ నది నీటి పంపకాల వివాదం మేకెదాటు ప్రాజెక్టు రూపంలో మళ్లీ రాజుకుంది. కావేరీ నదిపై మేకెదాటు (Mekedatu) వద్ద కర్ణాటక ప్రభుత్వం కొత్తగా భారీ డ్యామ్ నిర్మించేందుకు, అక్కడ భూమి పూజ చేయడానికి విస్తృత ఏర్పాట్లు చేస్తోంది. కర్ణాటక ఏకపక్షంగా ముందుకు సాగుతుండటంపై తమిళనాడు ముఖ్యమంత్రి విజయ్ తీవ్ర అభ్యంతరం వ్యక్తం చేశారు.ఈ ప్రాజెక్టు పనులను తక్షణమే అడ్డుకోవాలని కోరుతూ ప్రధానమంత్రి నరేంద్ర మోదీకి సీఎం విజయ్ అత్యవసర లేఖ రాశారు.

కావేరీ నీటి వివాద ట్రిబ్యునల్ ఇచ్చిన ఆదేశాలను, దానిని సమర్థిస్తూ సుప్రంకోర్టు ఇచ్చిన తీర్పులను కర్ణాటక ప్రభుత్వం పూర్తిగా ఉల్లంఘిస్తోందని విజయ్ ఆరోపించారు. నదీ పరివాహక ప్రాంతంలో ఎగువన ఉన్న రాష్ట్రాలు, దిగువన ఉన్న రాష్ట్రాల (తమిళనాడు, కేరళ, పుదుచ్చేరి) ముందస్తు అనుమతి లేకుండా ఎలాంటి కొత్త జలాశయాలను నిర్మించకూడదనే నిబంధనను లేఖలో గుర్తుచేశారు. ట్రిబ్యునల్ అనుమతించిన ప్రాజెక్టుల జాబితాలో మేకెదాటు లేదని స్పష్టం చేశారు. కావేరీ బేసిన్‌లో ఇప్పటికే నీటి కొరత తీవ్రంగా ఉందని, ఉన్న నీటిని చట్టబద్ధంగా అన్ని రాష్ట్రాలకు కేటాయించారని తెలిపారు. ఇప్పుడు కర్ణాటక కొత్తగా డ్యామ్ కడితే అది సుప్రీంకోర్టు తీర్పును ధిక్కరించడమే అవుతుందని హెచ్చరించారు.బుధవారం ప్రధాని నరేంద్ర మోదీతో జరగబోయే భేటీలో సీఎం విజయ్ ఈ మేకెదాటు అంశాన్ని ప్రధానంగా లేవనెత్తి, కేంద్రం జోక్యం చేసుకోవాలని గట్టిగా ఒత్తిడి తీసుకురానున్నారు.

 రామనాథపురం, నాగపట్టణం వంటి తమిళనాడు తీరప్రాంత జిల్లాల మత్స్యకారుల భద్రత అనేది రాష్ట్రంలో అత్యంత సెంటిమెంట్‌తో కూడిన రాజకీయ సమస్య. పాల్క్ జలసంధి (Palk Strait) సమీపంలో చేపల వేటకు వెళ్లే తమిళ మత్స్యకారులపై శ్రీలంక నావికాదళం తరచుగా దాడులకు దిగడం, వారిని అక్రమంగా నిర్బంధించడం, ఖరీదైన పడవలను స్వాధీనం చేసుకోవడం నిరంతరాయంగా సాగుతోంది. ఈ దీర్ఘకాలిక సమస్యకు శాశ్వత దౌత్య, రాజకీయ పరిష్కారాన్ని కనుగొనాలని కోరుతూ సీఎం విజయ్ కేంద్ర విదేశాంగ మంత్రి ఎస్. జైశంకర్‌ను ప్రత్యేకంగా కలవనున్నారు. ప్రస్తుతం శ్రీలంక జైళ్లలో మగ్గుతున్న తమిళ మత్స్యకారులను తక్షణమే విడుదల చేయించేలా అంతర్జాతీయ స్థాయిలో ఒత్తిడి తేవాలని ఆయన కోరనున్నారు.

 తమిళనాడులో మౌలిక సదుపాయాల కల్పన, పారిశ్రామిక వృద్ధి, సామాజిక సంక్షేమ కార్యక్రమాల అమలు కోసం కేంద్రం నుంచి ఆశించిన స్థాయిలో మద్దతు లభించడం లేదనే అసంతృప్తి రాష్ట్రంలో ఉంది. ఈ నేపథ్యంలో కేంద్ర హోం మంత్రి అమిత్ షా, ఆర్థిక మంత్రి నిర్మలా సీతారామన్‌లను కూడా విజయ్ కలిసే అవకాశాలు ఉన్నాయి.పట్టణ మౌలిక సదుపాయాల అభివృద్ధి, ఇటీవల ఎదుర్కొన్న ప్రకృతి వైపరీత్యాలకు సంబంధించిన విపత్తు సహాయ నిధులు (Disaster Relief), సంక్షేమ పథకాలకు కేంద్ర కేటాయింపులను పెంచాలని కోరుతూ ఆయన కేంద్ర ఆర్థిక మంత్రికి అధికారిక ప్రతిపాదనలను సమర్పించనున్నారు.

కేవలం అధికారిక పర్యటనగానే కాకుండా, విజయ్ తొలి ఢిల్లీ పర్యటన రాజకీయంగానూ ప్రాధాన్యత సంతరించుకుంది. జాతీయ రాజకీయాల్లో చక్రం తిప్పుతున్న కాంగ్రెస్ పార్టీ సీనియర్ నేతలు సోనియా గాంధీ, రాహుల్ గాంధీలను కూడా విజయ్ మర్యాదపూర్వకంగా కలవనున్నట్లు టీవీకే (TVK) పార్టీ వర్గాలు వెల్లడించాయి. తమిళనాడులో ముఖ్యమంత్రిగా పగ్గాలు చేపట్టిన తర్వాత జాతీయ స్థాయి నేతలతో విజయ్ జరపబోయే ఈ పరిచయ వేదికలు, రాబోయే రోజుల్లో కేంద్ర-రాష్ట్ర సంబంధాలతో పాటు సరికొత్త రాజకీయ సమీకరణాలకు దారితీసే అవకాశం ఉందనే చర్చ నడుస్తోంది. మొత్తంమీద, అటు కావేరీ జలాల రక్షణ, ఇటు మత్స్యకారుల భద్రత, రాష్ట్ర అభివృద్ధికి కేంద్ర నిధుల సాధనే లక్ష్యంగా సీఎం విజయ్ చేస్తున్న ఈ మూడు రోజుల హస్తిన పర్యటనపై యావత్ తమిళనాడు ప్రజలు, రాజకీయ విశ్లేషకులు ఎంతో ఉత్కంఠగా దృష్టి సారించారు.