Medaram Jatara 2024: మేడారం జాతరకు వెళ్తున్నారా? ఈ యాప్‌ను కచ్చితంగా డౌన్‌లోడ్‌ చేసుకోండి!

Sammakka - Saralamma Jatara: ఈ సారి మేడారం జాతరకు ప్రత్యేక ఏర్పాట్లు చేసింది తెలంగాణ ప్రభుత్వం (Telangana Govt). ప్రజలకు, భక్తులకు ఎలాంటి ఇబ్బందులు కలగకుండా చేయాలన్న లక్ష్యంగా అన్నింటినీ రూపొందించింది. చిన్న చిన్న సౌకర్యాల నుంచి పెద్ద వాటి వరకూ అన్నింటి మీద దృష్టి పెట్టింది. ఇవాళ్టి నుంచి మొదలవనున్న జాతర (Medaram Jatara) కోసం స్పెషల్ ఆర్టీసీ బస్సులను వేశారు. వైఫై వచ్చేట్టు ఏర్పాట్లు కూడా చేశారు. భక్తులు చెల్లించుకునే మొక్కు లకోసం ప్రత్యేక ఏర్పాట్లు చేవారు. దానికి తోడుమొబైల్ యాప్‌ను కూడా రూపొందించారు.

అసలేంటీ యాప్...

మేడారం వెళ్ళే భక్తులకు కావాల్సిన అన్ని వివరాలు యాప్‌లో దొరికేట్టు తయారు చేయించారు ములుగు పోలీసులు. ఎక్కడెక్కడ ఏమేం ఉన్నాయి. ఎలా వెళ్ళాలి, బస్సులు ఎక్కడ దొకుతాయి, పార్కింగ్ ఎక్కడ చేసుకోవాలి, పుడ్ ఎక్కడ దొరుకుతుంది లాంటి అన్ని వవరాలు ఇందులో లభ్యమవుతాయి. ఈ ఆప్ ను గూగుల్ ప్లే స్టోర్ కి వెళ్లి #Guide to Medaram by MuluguPolice అని టైపు చేసి డౌన్లోడ్ చేసుకోవచ్చు. ఒక్కసారి ఈ ఆప్ ని డౌన్లోడ్ చేసుకున్న తర్వాత ఇంటర్నెట్ సదుపాయం లేకపోయినా వీలైనంత ఎక్కువ సమాచారాన్ని చూడగలిగేలా, ముఖ్యంగా జాతర పరిసర ప్రాంతాలలో ఉన్న పార్కింగ్ స్థలాలు, ఆర్టీసీ పార్కింగ్, జంపన్న వాగు, దర్శనం ప్రదేశాల మధ్య దారి ని ఇంటర్నెట్ కనెక్షన్ లేకుండానే చూసుకునే విధంగా ఈ ఆప్ ను రూపొందించారు. ఒక్కసారి ఈ ఆఫ్లైన్ మ్యాప్ ఓపెన్ చేసుకుంటే, ఇంటర్నెట్ లేకున్నా కూడా పని చేయడం దీని ప్రత్యేకత.

Also Read: Telangana : మార్చి 1 నుంచి గృహజ్యోతి పథకం అమలు.. షరతులు వర్తిస్తాయి

యాప్‌లో ఏమేమేం ఉంటాయి..
మేడారం ప్రవేశం, నిష్క్రమణ చుట్టుప్రక్కల ప్రదేశాల మార్గాలు, రహదారులు సూచించే మార్గ సూచిక మ్యాప్, అత్యవసర సమాచారం, చేయవలసినవి, చేయకూడనివి, సలహాలు, సూచనలు అందించడం, ఇతరులకు పంచుకోవడం వంటి సదుపాయాలతో పాటు, ఎప్పటికప్పుడు పోలీసులు పౌరులకు నేరుగా సమాచారం అందించడానికి వీలుగా ప్రకటనలు శీర్షిక కూడా చేర్చబడినది. ఈ ఆప్ ను హైదరాబాద్ కు చెందిన విమాక్స్ ఈ-సొల్యూషన్స్ ఇండియా ప్రైవేటు లిమిటెడ్ అనే సంస్థ ద్వారా రూపొందించబడింది. అలాగే మేడారం జాతర విశిష్టత, చరిత్ర, జాతర కార్యక్రమ సరళి, తేదీలు, రోజువారీ కార్యక్రమాల వివరాలతో పాటు, జాతర జరిగే 4 రోజులలో ఉండే రద్దీ దృశ్యా ప్రయాణికులకు ఎటువంటి ట్రాఫిక్ ఇబ్బందులు తలెత్తకుండా ఉండడానికి స్వంత లేదా ప్రైవేట్ వాహనాలకు, ఆర్టీసీ బస్సులకు వేరు వేరు మార్గాలు అలాగే రావడానికి, తిరిగి వెళ్ళడానికి వేరు వేరు మార్గాలను ఏర్పాటు చేశారు.

ప్రయాణానికి సంబంధించి ముఖ్య విషయాలు..
తెలంగాణ రాష్ట్ర నలుమూలల నుండి స్వంత లేదా ప్రైవేట్ వాహనాల ద్వారా వచ్చేవాళ్ళుఏ ఏ మార్గాల ద్వారా రావచ్చు, ఎక్కడి నుండి ఎంత దూరం ఎక్కడెక్కడ దారి మళ్ళింపులుంటాయి..ఏ మార్గాల ద్వారా వచ్చే వారికీ ఏ పార్కింగ్ స్థలాలు అందుబాటులో ఉంటాయి..ఏ మార్గం ద్వారా వచ్చిన వారు తిరిగి ఏ మార్గం ద్వారా తమ గమ్య స్థానం చేరుకోవచ్చు లాంటి అంశాలననీ యాప్‌లో ఉన్నాయి. దాంతో పాటూ దారిలో పాటించవలసిన సూచనలను, మ్యాప్ లు ఉంచారు. ఇవి గూగుల్ మ్యాప్‌తో అనుసంధానం అయ్యేట్టు ప్లాన్ చేశారు. అలాగే మేడారం చుట్టుప్రక్కల ఉన్న 30కి పైగా పార్కింగ్ స్థలాలను భూ ఉపరితల అనుసంధానం చేసి (జియో ట్యాగ్గింగ్) ఆప్ వాడే వారు తమ ఉన్న స్థలం నుండి అక్కడికి గూగుల్ మ్యాప్ ద్వారా చేరుకునే విధంగా సూచనలను అందించడం, పార్కింగ్ సామర్థ్యం, పార్కింగ్ స్థలం విస్తీర్ణత, వంటి అంశాలు, ఆ పార్కింగ్ స్థలం నుండి అమ్మవారి గద్దెలకు సుమారు దూరం, పార్కింగ్ స్థలాల నుండి ఆర్టీసీ వారు ప్రవేశపెట్టిన ఉచిత బస్సు సదుపాయం నుండి సుమారు దూరం వంటి సమగ్ర సమాచారాన్ని అందుబాటులో ఉంచారు. అలాగే ఆర్టీసీ బస్సుల ద్వారా, రైలు మార్గాల ద్వారా వచ్చే మార్గాలు, తగిన సమాచారం కూడా ఇందులో ఉంది.

తప్పిపోయిన వారి కోసం కూడా..
జాతరలో తప్పి పోయే వారి సహాయార్థం ఈ సారి ప్రత్యేకంగా సహాయ, సమాచార కేంద్రాలు ఏర్పాటు చేస్తున్నారు. ఇటువంటి వారి ఫోటోలు, వివరాలు తెలపడానికి పెద్దపెద్ద తెరలను భక్తులకు కనబడే విధంగా పలు ప్రదేశాలలో ఏర్పరిచి ప్రత్యేక సాఫ్ట్వేర్ ద్వారా పర్యవేక్షించనున్నారు. సహాయ కేంద్రాల వివరాలు, అదే విధంగా ఎవరైనా తమ వారు తప్పి పోయినా లేదా తప్పి పోయినవారు కనిపించినా, ఈ ఆప్ ద్వారా ఫోటో, వారి ప్రదేశం వివరాలతో సమాచారం అందించవచ్చు. ఇవే కాకుండా భక్తులు ఏవైనా ఇబ్బందులు లేదా సంఘటనలు ఎదురైతే వాటిని కూడా పోలీసువారికి ఈ ఆప్ ద్వారా ఫిర్యాదు చేయవచ్చు.

Download APP