Donald Trump : పుతిన్ ఆఫర్‌ను తిరస్కరించిన ట్రంప్..ఇరాన్ యురేనియంపై సంచలన నిర్ణయం!

మధ్యప్రాచ్యంలో నెలకొన్న యుద్ధ ఉద్రిక్తతలను తగ్గించేందుకు రష్యా అధ్యక్షుడు వ్లాదిమిర్ పుతిన్ చేసిన ఒక కీలక ప్రతిపాదనను అమెరికా అధ్యక్షుడు డోనాల్డ్ ట్రంప్ సున్నితంగా తిరస్కరించారు. ఇరాన్ వద్ద ఉన్న ప్రమాదకరమైన శుద్ధి చేసిన యురేనియం నిల్వలను రష్యాకు తరలించడం ద్వారా ఈ వివాదానికి ముగింపు పలకవచ్చని పుతిన్ సూచించారు. ఈ వారం ప్రారంభంలో ఇద్దరు నేతల మధ్య జరిగిన ఫోన్ కాల్‌లో ఈ అంశం చర్చకు వచ్చినట్లు ఆక్సియోస్ నివేదిక వెల్లడించింది. అయితే, ఈ ప్రతిపాదనకు ట్రంప్ అంగీకరించలేదని సమాచారం.

శుద్ధి చేసిన యురేనియం నిల్వలు

ప్రస్తుతం ఇరాన్ వద్ద సుమారు 450 కిలోల వరకు 60 శాతం మేర శుద్ధి చేసిన యురేనియం నిల్వలు ఉన్నాయి. వీటిని కేవలం కొన్ని వారాల వ్యవధిలోనే అణు ఆయుధాల తయారీకి పనికొచ్చే స్థాయికి మార్చవచ్చని నిపుణులు చెబుతున్నారు. ఈ నిల్వలతో దాదాపు పదికి పైగా అణు బాంబులను తయారు చేసే అవకాశం ఉందని అంచనా. అందుకే, ఈ నిల్వలను పూర్తిగా తన ఆధీనంలోకి తీసుకోవడం లేదా నిర్వీర్యం చేయడం అమెరికా,  ఇజ్రాయెల్ యొక్క ప్రధాన లక్ష్యంగా ఉంది. రష్యాకు తరలిస్తే అవి మళ్ళీ ఇరాన్‌కు అందవనే గ్యారెంటీ లేదని ట్రంప్ భావిస్తున్నట్లు తెలుస్తోంది.

ఎక్కడా రాజీ పడకూడదని

గతంలో 2015 అణు ఒప్పందం సమయంలో కూడా ఇరాన్ తన అల్ప-స్థాయి యురేనియం నిల్వలను రష్యాలోనే భద్రపరిచింది. అణు పరిజ్ఞానం ఉన్న దేశం కావడంతో రష్యా ఈ ప్రతిపాదనను మళ్ళీ తెరపైకి తెచ్చింది. నిజానికి గతేడాది మే నెలలో జరిగిన చర్చల్లో కూడా రష్యా ఇదే విషయాన్ని చెప్పింది. కానీ, ప్రస్తుత పరిస్థితుల్లో ఇరాన్ అణు నిల్వల విషయంలో ఎక్కడా రాజీ పడకూడదని, వాటిని పూర్తిగా సురక్షితం చేయడమే తమ తదుపరి అడుగు అని ట్రంప్ ప్రభుత్వం స్పష్టం చేస్తోంది. రష్యా ప్రతిపాదనను తోసిపుచ్చడం ద్వారా ఇరాన్‌పై మరింత ఒత్తిడి పెంచాలని ట్రంప్ యోచిస్తున్నట్లు కనిపిస్తోంది.