సూపర్ మార్కెట్‌లో బీభత్సం.. ఐదుగురు మృతి!

ఉక్రెయిన్ రాజధాని కీవ్‌లో శనివారం ఒక్కసారిగా తుపాకీ మోతలు మారుమోగాయి. నగరంలోని హోలోసివ్‌స్కీ జిల్లాలో గల ఒక బిజీ సూపర్ మార్కెట్‌లోకి చొరబడిన దుండగుడు విచక్షణారహితంగా కాల్పులు జరపడంతో ఐదుగురు పౌరులు ప్రాణాలు కోల్పోయారు. ఈ ఘటనలో మరో 10 మంది తీవ్రంగా గాయపడ్డారు. దుండగుడు మాల్ కాంప్లెక్స్‌లోని ఒక సూపర్ మార్కెట్‌లోకి ప్రవేశించి, అక్కడ ఉన్న ప్రజలను బందీలుగా పట్టుకున్నాడు. సమాచారం అందుకున్న వెంటనే పోలీసులు సంఘటనా స్థలానికి చేరుకోగా, నిందితుడు వారిపై కూడా కాల్పులకు తెగబడ్డాడు. ఈ క్రమంలో పోలీసులు జరిపిన ఎదురుకాల్పుల్లో (ఆపరేషన్) దుండగుడు హతమయ్యాడని ఉక్రెయిన్ అంతర్గత వ్యవహారాల మంత్రి ఇహోర్ క్లిమెంకో ధృవీకరించారు.

ప్రెసిడెంట్ జెలెన్స్కీ సంతాపం
ఈ విషాద ఘటనపై ఉక్రెయిన్ అధ్యక్షుడు వోలోడిమిర్ జెలెన్స్కీ తీవ్ర దిగ్భ్రాంతి వ్యక్తం చేశారు. మృతుల కుటుంబాలకు ఆయన తన ప్రగాఢ సానుభూతిని తెలియజేశారు. "కీవ్‌లో పౌరులపై కాల్పులు జరిపిన వ్యక్తిని భద్రతా దళాలు హతమార్చాయి. ప్రస్తుతం ఐదుగురు మరణించినట్లు సమాచారం ఉంది. పూర్తి వివరాల కోసం దర్యాప్తు కొనసాగుతోంది" అని ఆయన పేర్కొన్నారు.

సురక్షితంగా బయటపడ్డ బందీలు
పోలీసుల ఆపరేషన్‌లో నలుగురు బందీలు సురక్షితంగా ప్రాణాలతో బయటపడ్డారు. గాయపడిన పది మందిని చికిత్స నిమిత్తం సమీప ఆసుపత్రులకు తరలించారు. వీరిలో కొందరు శారీరక గాయాలతో పాటు తీవ్రమైన మానసిక క్షోభకు గురైనట్లు వైద్యులు తెలిపారు. సంఘటన జరిగిన వెంటనే మాల్ పరిసర ప్రాంతాల్లో ఉన్న ప్రజలను పోలీసులు సురక్షిత ప్రాంతాలకు తరలించారు. ప్రస్తుతం ఉక్రెయిన్ జాతీయ పోలీసు మరియు భద్రతా సేవల అధికారులు ఈ దాడి వెనుక ఉన్న కారణాలపై లోతైన దర్యాప్తు చేస్తున్నారు. ప్రజలకు ఎప్పటికప్పుడు ధృవీకరించిన సమాచారాన్ని అందించాలని అంతర్గత వ్యవహారాల మంత్రిత్వ శాఖను ప్రభుత్వం ఆదేశించింది.