Tracking India : చైనాతో కలిసి భారత్‌పై పాక్ కొత్త కుట్ర.. 16 నెలల్లో 6 శాటిలైట్లతో నిఘా..!

Tracking India : దక్షిణాసియాలో వ్యూహాత్మక ఆధిక్యం కోసం అంతరిక్షంలో ఒక నిశ్శబ్ద యుద్ధం మొదలైంది. చైనా మద్దతుతో పాకిస్తాన్ తన అంతరిక్ష నిఘా సామర్థ్యాలను శరవేగంగా విస్తరిస్తోంది. గడచిన 16 నెలల స్వల్ప వ్యవధిలోనే పాక్ ఏకంగా ఆరు 'ఎర్త్-అబ్జర్వేషన్' (భూపరిశీలన) ఉపగ్రహాలను అంతరిక్షంలోకి ప్రయోగించింది. పాక్‌కు వ్యతిరేకంగా సరిహద్దుల్లో జరిగిన 'ఆపరేషన్ సింధూర్' ఉద్రిక్తతల కంటే ముందే ఈ ప్రయోగాలు ప్రారంభం కావడం గమనార్హం. భారత భూభాగాన్ని, వ్యూహాత్మక కదలికలను నిరంతరం పర్యవేక్షించేందుకే పాకిస్తాన్ ఈ సరికొత్త శాటిలైట్ నెట్‌వర్క్‌ను సిద్ధం చేసుకున్నట్లు రక్షణ నిపుణులు భావిస్తున్నారు.

పాకిస్తాన్ అంతరిక్ష పరిశోధనా సంస్థ 'సుపార్కో' (SUPARCO) 1961లో స్థాపించబడినప్పటికీ, దశాబ్దాల కాలంలో అది కేవలం కొన్ని ఉపగ్రహాలను మాత్రమే ప్రయోగించగలిగింది. కానీ, ఇటీవలి కాలంలో పాక్ అంతరిక్ష వ్యూహంలో అనూహ్య మార్పు వచ్చింది. జనవరి 2025 నుండి ఏప్రిల్ 2026 మధ్య కాలంలోనే ఆరు సరికొత్త నిఘా ఉపగ్రహాలను కక్ష్యలో ప్రవేశపెట్టింది. ఇందులో ఆప్టికల్ ఇమేజింగ్, హైపర్‌స్పెక్ట్రల్, రిమోట్ సెన్సింగ్ ప్లాట్‌ఫారమ్‌లు ఉన్నాయి. కేవలం పౌర అవసరాల కోసం కాకుండా, పక్కా సైనిక అవసరాల కోసమే ఈ ఉపగ్రహాల కక్ష్యలను (Orbital Architecture) డిజైన్ చేసినట్లు భారత నౌకాదళ మాజీ అధికారి రియర్ అడ్మిరల్ సుధీర్ పిళ్లై విశ్లేషించారు.

ఈ సరికొత్త శాటిలైట్ వ్యవస్థ ద్వారా భారత సరిహద్దుల్లోని వ్యూహాత్మక ప్రాంతాలపై పాక్ నిరంతర నిఘా ఉంచగలదు. అత్యధిక నాణ్యత గల చిత్రాలను తీయడం, భూమిపై జరిగే మార్పులను గుర్తించడం, సైనిక రహస్యాలను కనిపెట్టడం దీని ప్రత్యేకత. ముఖ్యంగా అక్టోబర్ 2025లో ప్రయోగించిన 'హైపర్‌స్పెక్ట్రల్ శాటిలైట్ హెచ్ఎస్-1' సాధారణ కెమెరాలకు దొరకని వస్తువులను కూడా గుర్తించగలదు. అలాగే సరికొత్తగా వచ్చిన PRSC-EO2, PRSC-EO3 ఉపగ్రహాలలో అధునాతన ఇమేజింగ్ మరియు ఆర్టిఫిషియల్ ఇంటెలిజెన్స్ (AI) సాంకేతికతను వాడటం వల్ల డేటాను వేగంగా విశ్లేషించే వీలుంటుంది.

పాకిస్తాన్ సాధించిన ఈ అంతరిక్ష పురోగతి వెనుక పూర్తిగా చైనా హస్తం ఉంది. ఈ ఉపగ్రహాలన్నింటినీ చైనా రాకెట్ల ద్వారానే ప్రయోగించారు. కేవలం రాకెట్ లాంచ్‌లకే పరిమితం కాకుండా శాటిలైట్ డిజైనింగ్, టెక్నాలజీ బదిలీ, మరియు డేటా షేరింగ్‌లో కూడా చైనా-పాక్ సంస్థల మధ్య లోతైన భాగస్వామ్యం ఉంది. ఉదాహరణకు, ఏప్రిల్ 2026లో ప్రయోగించిన PRSC-EO3 ఉపగ్రహం యొక్క కక్ష్యను అమెరికాకు చెందిన 'కామ్‌స్పాక్' (COMSPOC) సంస్థ విశ్లేషించింది. ఈ శాటిలైట్‌ను ప్రపంచవ్యాప్త కవరేజ్ కోసం కాకుండా, కేవలం దక్షిణాసియా (ముఖ్యంగా భారత్, జమ్మూ కాశ్మీర్) పై రోజూ పలుమార్లు నిఘా వేసేలా ప్రత్యేక కక్ష్యలో ఉంచినట్లు తేలింది.

ఈ రకమైన ఉమ్మడి నిఘా వ్యవస్థ భారత్‌కు రక్షణ పరంగా తీవ్ర ఆందోళన కలిగించే అంశం. చైనాకు చెందిన సొంత నిఘా ఉపగ్రహాలైన యాగోగాన్ (Yaogan), గావోఫెన్ (Gaofen) సిరీస్‌లతో పాటు ఇప్పుడు పాకిస్తాన్ ఏర్పాటు చేసిన కొత్త శాటిలైట్ నెట్‌వర్క్ కూడా తోడైంది. దీనివల్ల భారత సరిహద్దుల్లో సైనిక మోహరింపులు, మౌలిక సదుపాయాల కల్పన మరియు రక్షణ వ్యూహాలకు సంబంధించిన కీలక సమాచారం ఇస్లామాబాద్‌కు చాలా సులువుగా చేరే ప్రమాదం ఉంది. భవిష్యత్తులో జరిగే యుద్ధాలు భూమిపై ఆయుధాల కంటే అంతరిక్షం నుండి వచ్చే సమాచారం ఆధారంగానే నడుస్తాయని రక్షణ నిపుణులు హెచ్చరిస్తున్నారు.

మరోవైపు, గత రెండేళ్లలో భారత అంతరిక్ష పరిశోధనా సంస్థ (ISRO) కొన్ని ప్రతికూలతలను ఎదుర్కొంది. ఎర్త్-అబ్జర్వేషన్, నావిగేషన్ కార్యక్రమాలకు సంబంధించిన కొన్ని కీలక వ్యూహాత్మక శాటిలైట్ మిషన్లు విఫలమయ్యాయి. అంతరిక్ష రంగంలో చైనా, పాకిస్తాన్ల కంటే భారత్ సాంకేతికంగా ఎంతో ముందంజలో ఉన్నప్పటికీ, పొరుగు దేశాలు శరవేగంగా పెంచుకుంటున్న సైనిక-అంతరిక్ష నిఘా సామర్థ్యాలను తక్కువగా అంచనా వేయలేము. మారుతున్న కాలానికి అనుగుణంగా భారత్ కూడా తన అంతరిక్ష రక్షణ వ్యూహాలను మరింత పటిష్టం చేసుకోవాల్సిన అవసరం ఎంతైనా ఉంది.