Anshul Kuncha : మీ పిల్లలను అమెరికాకు పంపి చంపుకోకండి...అన్షుల్ కుటుంబ సభ్యుల ఆవేదన

అమెరికాలో ఉన్నత భవిష్యత్తును వెతుక్కుంటూ వెళ్లిన తెలంగాణకు చెందిన అన్షుల్ కుంచ ఫిలడెల్ఫియాలో జరిగిన దుండగుల కాల్పుల్లో ప్రాణాలు కోల్పోయాడు. ఉన్నత చదువులు, ఉద్యోగాల కోసం తమ పిల్లలను విదేశాలకు పంపుతున్న తల్లిదండ్రులకు ఈ ఘటన తీవ్ర దిగ్భ్రాంతిని కలిగిస్తోంది.

author-image
By Madhukar Vydhyula in ఇంటర్నేషనల్ క్రైం
New Update
FotoJet - 2026-06-07T130050.955

Indian Man Anshul Kuncha Shot Dead in Philadelphia

Anshul Kuncha : అమెరికాలో ఉన్నత భవిష్యత్తును వెతుక్కుంటూ వెళ్లిన మరో తెలుగు యువకుడు దారుణ హత్యకు గురయ్యాడు. తెలంగాణకు చెందిన అన్షుల్ కుంచ (28) ఫిలడెల్ఫియాలో పక్కా ప్లాన్ ప్రకారం జరిగిన దాడిలో ప్రాణాలు కోల్పోయాడు. ఈ ఘోర ఉదంతం అమెరికాలోని తెలుగు కమ్యూనిటీతో పాటు తెలంగాణలోని ఆయన స్వగ్రామం మేడ్చల్ జిల్లా గుండ్లపోచంపల్లిలో తీవ్ర విషాదాన్ని నింపింది. ఉన్నత చదువులు, ఉద్యోగాల కోసం తమ పిల్లలను విదేశాలకు పంపుతున్న తల్లిదండ్రులకు ఈ ఘటన తీవ్ర దిగ్భ్రాంతిని, ఆందోళనను కలిగిస్తోంది.

అన్షుల్ కుంచ అమెరికాలోని పెన్సిల్వేనియా రాష్ట్రం ఫిలడెల్ఫియాలో నివసిస్తూ, ఒక ప్రముఖ బహుళజాతి కంపెనీ (MNC)లో సాఫ్ట్‌వేర్ ఉద్యోగిగా పనిచేస్తున్నాడు. అయితే, వారాంతాల్లో (Weekends) అదనపు ఆదాయం కోసం పార్ట్ టైమ్ పిజ్జా డెలివరీ బాయ్‌గా కూడా విధులు నిర్వర్తిస్తున్నాడు. ఈ క్రమంలోనే శనివారం రాత్రి ఒక అపార్ట్‌మెంట్ ఫ్లాట్ నుంచి వచ్చిన పిజ్జా ఆర్డర్‌ను డెలివరీ చేయడానికి వెళ్లాడు. అతను డెలివరీ ముగించుకుని తిరిగి వస్తున్న సమయంలో, ముసుగు ధరించిన ఇద్దరు గుర్తుతెలియని దుండగులు అన్షుల్‌ను అతి సమీపం నుంచి తలపై పలుమార్లు కాల్చి దారుణంగా హత్య చేశారు.

ఈ దాడి యాదృచ్ఛికంగా లేదా దోపిడీ దొంగల వల్ల జరిగింది కాదని, ఇదొక పక్కా స్కెచ్ అని అన్షుల్ కుటుంబ సభ్యులు బలంగా నమ్ముతున్నారు. ఘటన జరిగిన సమయంలో అన్షుల్ వద్ద ఉన్న నగదును కానీ, ఇతర విలువైన వస్తువులను కానీ దుండగులు తాకలేదు. కేవలం ప్రాణాలు తీయడమే లక్ష్యంగా ఈ దాడి జరిగింది. ఎవరూ లేని నిర్మానుష్య ప్రాంతానికి రప్పించడానికి 'ఫేక్ పిజ్జా ఆర్డర్' సృష్టించి, తమ్ముడిని పక్కా ప్లాన్‌తో 'డెత్ ట్రాప్' లోకి లాగి చంపేశారని అన్షుల్ సోదరి తన్వి మీడియా ముందు కన్నీటి పర్యంతమయ్యారు.

అమెరికాలో భారతీయ విద్యార్థులు, యువ ఉద్యోగులపై దాడులు జరగడం ఇదే మొదటిసారి కాదు. గతంలో కూడా అన్షుల్‌పై అమెరికాలో ఒకసారి దొంగతనం దాడి జరిగింది. అప్పట్లో దుండగులు అతని గోల్డ్ చైన్, ఫోన్, నగదును లాక్కుని పారిపోయారు. ఆ సమయంలో ప్రాణాపాయం తప్పినప్పటికీ, ఈ సారి మాత్రం దుండగులు కావాలనే అతడిని టార్గెట్ చేసి ప్రాణాలు బలితీసుకున్నారు. ఈ దారుణ ఉదంతంపై స్థానిక ఫిలడెల్ఫియా పోలీసులు కేసు నమోదు చేసి, ఏ నంబర్ నుండి ఫేక్ పిజ్జా ఆర్డర్ వచ్చిందనే కోణంలో కాల్ డేటా ఆధారంగా ముమ్మర దర్యాప్తు జరుపుతున్నారు.

తమ్ముడి మరణంతో తీవ్ర దిగ్భ్రాంతికి లోనైన సోదరి తన్వి, తల్లిదండ్రులు కన్నీరుమున్నీరుగా రోదిస్తున్నారు. "నా తమ్ముడికి అసలు అమెరికా వెళ్లాల్సిన అవసరమే లేదు, అతనికి వెళ్లడం ఇష్టం కూడా లేదు. మేమే బలవంతం చేసి ఉన్నత భవిష్యత్తు ఉంటుందని పంపించాము.. ఇప్పుడు శవమై తిరిగి వస్తున్నాడు" అంటూ ఆమె గుండెలవిసేలా ఆవేదన వ్యక్తం చేశారు. తమలాంటి పరిస్థితి ఏ తల్లిదండ్రులకు రాకూడదని, దయచేసి ఎవరూ తమ పిల్లలను అమెరికాకు పంపించవద్దని ఆమె ఇతర భారతీయ కుటుంబాలకు చేతులు జోడించి విజ్ఞప్తి చేశారు.

ఇటీవలి కాలంలో అమెరికాలో తెలుగు రాష్ట్రాలకు చెందిన విద్యార్థులు, యువతపై వరుస దాడులు, హత్యలు పెరిగిపోతుండటం ఇక్కడి కుటుంబాలలో తీవ్ర భయాందోళనలను రేకెత్తిస్తోంది. గన్‌ కల్చర్, జాతివివక్ష లేదా ఒంటరిగా దొరికే డెలివరీ బాయ్స్‌ను టార్గెట్ చేయడం వంటి ఘటనలు రోజురోజుకూ ఎక్కువవుతున్నాయి. ఈ నేపథ్యంలో ప్రవాస భారతీయుల రక్షణపై అమెరికా ప్రభుత్వం, స్థానిక పోలీసులు ప్రత్యేక దృష్టి సారించాలని, అన్షుల్ హత్యకు కారణమైన నిందితులను త్వరగా పట్టుకుని కఠినంగా శిక్షించాలని తెలుగు అసోసియేషన్లు డిమాండ్ చేస్తున్నాయి.

#usa #america #family-members #pizza-delivery #Medchal Malkajgiri District #Gundlapochampally #Philadelphia
సంబంధిత కథనాలు
Advertisment
తాజా కథనాలు