Mahua Moitra: మహువా లోక్‌సభ ఖాతాను ఆ దేశం నుంచి 47 సార్లు వినియోగించారు: దూబే

డబ్బులు తీసుకుని పార్లమెంటులో ప్రశ్నలు అడిగారనే ఆరోపణలను ఎదుర్కొంటున్నారు టీఎంసీ ఎంపీ మహువా మొయిత్రా. అయితే ఈ కేసులో మరిన్ని బయటపడుతున్నాయి. ఆమె పార్లమెంటరీ ఖాతాను దుబాయ్‌ నుంచి దాదాపు 47 సార్లు వినియోగించినట్లు తెలుస్తోంది. విశ్వసనీయ వర్గాల ప్రకారం ఈ విషయాన్ని పలు జాతీయ మీడియా కథనాలు వెల్లడించాయి. అయితే మహువా మొయిత్రా గురువారం లోక్‌సభ నైతిక కమిటీ విచారణను ఎదుర్కోనున్న నేపథ్యంలో ఈ విషయం చర్చనీయాంశమవుతోంది. ఇందుకు సంబంధించి బీజేపీ ఎంపీ నిషికాంత్‌ దూబే ఎక్స్‌( ట్విట్టర్ ) వేదికగా స్పందించారు. దుబాయ్‌లోని వ్యాపారవేత్త హీరానందానికి చెందిన ప్రదేశాల నుంచి మహువా లోక్‌సభ ఖాతాలోకి 47 సార్లు లాగిన్‌ అయినట్లు, అక్కడి నుంచే పలు ప్రశ్నలు అడిగినట్లు మీడియా కథనాలు పేర్కొంటున్నాయని తెలిపారు. ఈ వార్తలు వాస్తవమని తేలితే.. దేశవ్యాప్తంగా ఎంపీలందరు ఆమె అవినీతికి వ్యతిరేకంగా నిలబడాలని.. హీరానందని స్వప్రయోజనాల కోసం ఆయనే ఈ ప్రశ్నలు అడిగారని రుజువైనట్లేనని పేర్కొన్నారు. పెట్టుబడిదారుల స్వార్థ ప్రయోజనాల కోసం మనం ఎంపీలుగా పనిచేస్తున్నామా అంటూ మండిపడ్డారు నిషికాంత్ దూబే.

Also read: కేటీఆర్‌, రేవంత్ రెడ్డి ఫోన్లకు హ్యాకింగ్ హెచ్చరిక.. బీజేపీ నేతలు ఏమన్నారంటే

ఇదిలా ఉండగా.. లోక్‌సభలో ప్రశ్నలు అడిగేందుకు వ్యాపారవేత్త దర్శన్‌ హీరానందాని నుంచి మహువా డబ్బులు తీసుకున్నారని.. పార్లమెంటరీ లాగిన్‌ వివరాలను హీరానందానికి ఇచ్చినట్లు నిషికాంత్ దూబే ఇటీవల ఆరోపించారు . మరోవైపు హీరానందాని కూడా మహువాకు లంచం ఇచ్చానని అంగీకరించినట్లుగా ఆయన పేరుతో ఓ అఫిడవిట్‌ వెలుగులోకి వచ్చింది. అయితే ఈ ఆరోపణలను మహువా ఖండించారు. హీరానందానికి తన లాగిన్‌ క్రెడెన్షియల్స్‌ ఇచ్చిన మాట వాస్తవమేనని.. కానీ, అందులో ఎలాంటి దురుద్దేశం లేదని, ప్రశ్నలన్నీ తానే అడిగినట్లు పేర్కొన్నారు. అలాగే హీరానందానితో కేంద్రం బలవంతంగా ఆ అఫిడవిట్‌పై సంతకం చేయించినట్లు మహువా ఆరోపించారు. అయితే మహువాపై వచ్చిన ఆరోపణలను తీవ్రంగా పరిగణించిన లోక్‌సభ ఎథిక్స్‌ కమిటీ.. ఆమెకు సమన్లు జారీ చేసింది. ఈ క్రమంలోనే ఆమె గురువారం హాజరుకానున్నారు. అలాగే తనకు లంచం ఇచ్చానని హీరానందాని అంగీకరించినట్లుగా ఉన్న అఫిడవిట్‌పై ఆయనను కూడా ప్రశ్నించేందుకు అవకాశం ఇవ్వాలని మహువా ఎథిక్స్‌ కమిటీని అభ్యర్థించారు.