TS TET: మెగా డీఎస్సీకి ముందు టెట్ నోటిఫికేషన్? అభ్యర్థుల్లో కొనసాగుతున్న ఉత్కంఠ!

TS TET Exam 2024: తెలంగాణలో మెగా డీఎస్సీకి (TS DSC) కాంగ్రెస్ గవర్నమెంట్ గ్రీన్ సిగ్నల్ ఇచ్చిన సంగతి తెలిసిందే. కాగా మొత్తం 11వేలకుపైగా పోస్టులకుగానూ మార్చి 4నుంచి దరఖాస్తుల ప్రక్రియ మొదలుకానుంది. అయితే ఈ సందర్భంగా డీఎస్సీ అర్హత పరీక్ష టెట్ ఇష్యూ మరోసారి చర్చనీయాంశమైంది. జూన్ చివరి వారంలో డీఎస్సీ పరీక్షలు నిర్వహించబోతున్నట్లు తెలుస్తుండగా.. డీఎస్సీ నోటిఫికేషన్ తో సంబంధం లేకుండా టెట్ ప్రకటన ఇస్తారా? లేక అభ్యర్థుల నుంచి వస్తున్న విజ్ఞప్తులను పరిగణనలోకి తీసుకొని మెగా డీస్సీకి ముందుగానే ప్రకటన చేస్తారా? అనే విషయంపై టెట్ అభ్యర్థుల్లో ఉత్కంఠ కొనసాగుతుంది.

అందరిని దృష్టిలో పెట్టుకుని..
ఈ మేరకు బీఈడీ (B.Ed), డీఎడ్(D.Ed) పూర్తిచేసిన అభ్యర్థులంతా మెగా డీఎస్సీకి ముందు టెట్ నిర్వహించాలని డిమాండ్ చేస్తున్నారు. టెట్ నిర్వహిస్తే చాలా మంది అభ్యర్థులకు లబ్ధి చేకూరుతుందని ఆశిస్తున్నారు. మరోసారి టెట్ నిర్వహించాలని ప్రభుత్వాన్ని కోరుతున్నారు. టెట్ నిర్వహించటం ద్వారా తమకు కూడా డీఎస్సీ పరీక్ష రాసే అవకాశం దక్కుతుందని చెబుతున్నారు. మరీ ఈ నేపథ్యంలో గవర్నమెంట్ ఏ నిర్ణయం తీసుకోనుందనే విషయంపై ఆసక్తి నెలకొంది. అందరిని దృష్టిలో పెట్టుకుని ముందుకు సాగాలనే విషయంపై ఆలోచన చేస్తున్నట్లు తెలుస్తోంది. గ్రూప్-1కు (TSPSC Group 1) సంబంధించి మరిన్ని ఉద్యోగాలు పెంచి కొత్త నోటిఫికేషన్ రిలీజ్ చేయగా.. ఇదే పద్ధతిలో రాబోయే డీఎస్సీకి ముందు టెట్ నిర్వహించాలని గవర్నమెంట్ ను అభ్యర్థులు రిక్వెస్ట్ చేస్తున్నట్లు సమాచారం. కాగా దీనిపై త్వరలోనే ప్రకటన వెలువడే చాన్స్ ఉన్నట్లు తెలుస్తోంది.

ఇది కూడా చదవండి: King Cobra: పాముతో భయంకరమైన సాహసం.. వీడియో చూస్తే దడుసుకుంటారు!

ఇదిలావుంటే.. రేవంత్ సర్కార్ (Telangana Govt) ఉద్యోగాల భర్తీని శరవేగంగా చేపట్టేందుకు కసరత్తులు చేస్తుండగా ఇందులో భాగంగానే ఏటా 2 సార్లు టెట్ నిర్వహించాలని రాష్ట్ర ప్రభుత్వం భావిస్తోంది. ఇందుకు సంబంధించి కసరత్తును కూడా ప్రారంభించినట్లు తెలుస్తోంది. ఎన్​సీటీఈ ఇచ్చిన ఆదేశాలను అమలు చేయాలని చూస్తోంది. ఇక గతేడాది సెప్టెంబర్ లో టెట్ నిర్వహించగా పేపర్‌-1కు 2.26 లక్షల మంది, పేపర్‌-2కు 1.90 లక్షల మంది అభ్యర్థులు హాజరయ్యారు. అంతకుముందు చివరిసారిగా 2022 జూన్ 12న విద్యాశాఖ టెట్ నిర్వహించింది.