అలర్ట్: TGPSC OTR గడువు పొడిగింపు...పూర్తి వివరాలు ఇవే!

తెలంగాణ ప్రభుత్వ ఉద్యోగాల కోసం ఎదురుచూస్తున్న నిరుద్యోగులకు కీలక అప్ డేట్.  తెలంగాణ రాష్ట్ర పబ్లిక్ సర్వీస్ కమిషన్ (TGPSC) తమ వన్ టైమ్ రిజిస్ట్రేషన్ (OTR) గడువును పెంచుతూ కీలక నిర్ణయం తీసుకుంది. అభ్యర్థులు తమ వివరాలను అప్‌డేట్ చేసుకోవడానికి ఇప్పుడు 2026 ఏప్రిల్ 10 వరకు సమయం ఉంది. ఈ గడువు పొడిగింపు వల్ల వేలాది మంది అభ్యర్థులకు ఊరట లభించనుంది. కొత్తగా విడుదలయ్యే నోటిఫికేషన్లకు దరఖాస్తు చేయాలంటే ఈ OTR అప్‌డేట్ చేసుకోవడం ఇప్పుడు తప్పనిసరి.

అసలు ఈ వన్ టైమ్ రిజిస్ట్రేషన్ అంటే ఏమిటి 

ఇదోక రకమైన డిజిటల్ ప్రొఫైల్ లాంటిది. అభ్యర్థులు తమ వ్యక్తిగత వివరాలు, చదువుకున్న అర్హతలు,  కుల ధృవీకరణ పత్రాలను ఒక్కసారి ఇందులో నమోదు చేస్తే సరిపోతుంది. ఆ తర్వాత కమిషన్ ఏ ఉద్యోగ నోటిఫికేషన్ విడుదల చేసినా, మళ్లీ మళ్లీ పూర్తి వివరాలు నింపాల్సిన అవసరం ఉండదు. కేవలం ఈ ప్రొఫైల్ ద్వారా నేరుగా దరఖాస్తు చేసుకోవచ్చు. ఇది అభ్యర్థుల సమయాన్ని ఆదా చేయడమే కాకుండా పొరపాట్లు జరగకుండా కాపాడుతుంది.

ప్రస్తుతం పాత రిక్రూట్‌మెంట్‌లు పూర్తవుతున్న తరుణంలో, ప్రభుత్వం కొత్త నోటిఫికేషన్లు ఇవ్వడానికి సిద్ధమవుతోంది. అందుకే ప్రతి అభ్యర్థి తమ ప్రొఫైల్‌లో ఏవైనా మార్పులు ఉంటే వెంటనే చేసుకోవాలి. ముఖ్యంగా అదనపు విద్యార్హతలు సాధించిన వారు, అడ్రస్ మారిన వారు లేదా మొబైల్ నంబర్, ఈమెయిల్ మార్చుకోవాలనుకునే వారు ఈ అవకాశాన్ని వాడుకోవాలి. అయితే ఇక్కడ గుర్తుంచుకోవాల్సిన విషయం ఏమిటంటే, ఒక అభ్యర్థికి ఒకే OTR ఉండాలి. తప్పుడు సమాచారంతో రెండు మూడు రిజిస్ట్రేషన్లు చేస్తే వారిపై కఠిన చర్యలు తీసుకునే అవకాశం ఉంది.

ఈ అప్‌డేట్ ప్రక్రియ చాలా సులభం. అభ్యర్థులు అధికారిక వెబ్‌సైట్ www.tgpsc.gov.in లోకి వెళ్లి తమ టీజీపీఎస్సీ ఐడి, పుట్టిన తేదీతో లాగిన్ అవ్వాలి. మొబైల్ నంబర్‌కు వచ్చే ఓటీపీ సాయంతో ప్రొఫైల్‌ను ఎడిట్ చేసుకోవచ్చు. విద్యార్హత సర్టిఫికేట్లు, ఫోటో, సంతకాన్ని స్పష్టంగా కనిపించేలా అప్‌లోడ్ చేయాలి. ఈ ప్రక్రియలో పొరపాట్లు జరగకుండా ఉండాలంటే అప్లికేషన్ సబ్మిట్ చేసే ముందు ఒక్కసారి అన్ని వివరాలను సరిచూసుకోవడం మంచిది.

చివరగా ఎవరైతే ఏప్రిల్ 10 లోపు తమ వివరాలను అప్‌డేట్ చేసుకుంటారో వారు మాత్రమే రాబోయే నోటిఫికేషన్లకు అర్హులుగా ఉంటారు. సర్టిఫికేట్లు అప్‌లోడ్ చేయడంలో నిర్లక్ష్యం చేయవద్దు. ఒకవేళ మీరు కొత్త అభ్యర్థి అయితే, ఈ గడువు తర్వాత కూడా రిజిస్ట్రేషన్ చేసుకోవచ్చు, కానీ ఇప్పటికే రిజిస్టర్ అయిన వారు మాత్రం ఖచ్చితంగా ఈ గడువును పాటించాలి. మరిన్ని వివరాల కోసం లేదా ఏవైనా సందేహాలు ఉంటే అధికారిక వెబ్‌సైట్‌లోని యూజర్ మాన్యువల్‌ను పరిశీలించవచ్చు.