Hyderabad Lawyer Murder : మాసబ్‌ట్యాంక్‌లో ఘోరం.. న్యాయవాది ఖాజా మొహియుద్దీన్ దారుణ హత్య!

Hyderabad Lawyer Murder : హైదరాబాద్ నగరంలోని మాసబ్‌ట్యాంక్ పోలీస్ స్టేషన్ పరిధిలో శనివారం ఉదయం అత్యంత దారుణమైన ఘటనా చోటుచేసుకుంది. ప్రముఖ న్యాయవాది (అడ్వకేట్) ఖాజా మొహియుద్దీన్‌ను దుండగులు కారుతో ఢీకొట్టి కిరాతకంగా హతమార్చడం నగరవ్యాప్తంగా తీవ్ర కలకలం రేపింది. తొలుత దీనిని ఒక సాధారణ రోడ్డు ప్రమాదం లేదా హిట్ అండ్ రన్ కేస్‌గా భావించినప్పటికీ, క్షేత్రస్థాయి పరిశీలన, సీసీటీవీ ఫుటేజీ ఆధారంగా పోలీసులు దీనిని పక్కా వ్యూహంతో జరిపిన అత్యంత పకడ్బందీ హత్యగా నిర్ధారించారు.

ఈ ఘాతుకానికి సంబంధించిన వివరాల్లోకి వెళితే.. శనివారం ఉదయం న్యాయవాది ఖాజా మొహియుద్దీన్ తన నివాసం నుంచి బయటకు వచ్చి, రోజువారీ పనుల నిమిత్తం కారులో బయలుదేరేందుకు సిద్ధమయ్యారు. తన కారు వెనుక సీట్లో కోర్టు బ్యాగును ఉంచి, డ్రైవింగ్ సీట్లో కూర్చోబోతున్న తరుణంలో ఈ ప్రమాదం జరిగింది. అప్పటికే అక్కడ నెంబర్ ప్లేట్ లేని కారుతో మాటువేసి ఉన్న ప్రత్యర్థులు, ఆయనపైకి ఒక్కసారిగా అతివేగంతో దూసుకొచ్చి బలంగా ఢీకొట్టారు. క్షణాల వ్యవధిలో జరిగిన ఈ ఘోర దాడి అనంతరం దుండగులు అదే కారులో అక్కడి నుంచి వేగంగా పరారయ్యారు.

ఈ ప్రమాదంలో తీవ్రంగా గాయపడిన మొహియుద్దీన్‌ను కుటుంబ సభ్యులు, స్థానికులు హుటాహుటిన ఆసుపత్రికి తరలించారు. అయితే, అప్పటికే ఆయన పరిస్థితి అత్యంత విషమంగా ఉందని వైద్యులు వెల్లడించారు. ఆసుపత్రిలో అత్యవసర విభాగంలో చికిత్స పొందుతూ పరిస్థితి క్షీణించడంతో ఖాజా మొహియుద్దీన్ చివరికి తుదిశ్వాస విడిచారు. ఘటనా స్థలంలో లభించిన సీసీటీవీ ఫుటేజీని పోలీసులు క్షుణ్ణంగా పరిశీలించగా, దుండగులు ఉద్దేశపూర్వకంగానే ఆయనను టార్గెట్ చేస్తూ కారును బలంగా ఢీకొట్టినట్లు స్పష్టమైన ఆధారాలు లభించాయి. దీంతో పోలీసులు ఈ కేసును సెక్షన్ మార్చి పూర్తిస్థాయి హత్య కేసుగా దర్యాప్తు ప్రారంభించారు.

బ్రేకింగ్ న్యూస్

వక్ఫ్ బోర్డు భూముల రక్షణ కోసం పోరాడుతున్న న్యాయవాది ఖాజా మొయినుద్దీన్ మృతి

హైదరాబాద్ మాసబ్ ట్యాంక్‌లో న్యాయవాది ఖాజా మొయినుద్దీన్‌ను కారుతో ఢీ కొట్టి పారిపోయిన దుండగులు

తీవ్ర గాయాలతో ఆసుపత్రిలో చికిత్స పొందుతూ మొయినుద్దీన్ మృతి

కబ్జాకు గురవుతున్న వక్ఫ్… https://t.co/eRKR1a2nRPpic.twitter.com/fHIxqPcpAg

— Telugu Scribe (@TeluguScribe) May 23, 2026

పోలీసుల ప్రాథమిక విచారణ ప్రకారం.. ఈ ఘోర హత్యకు పాత కక్షలు, ముఖ్యంగా మలక్‌పేట్ పరిధిలోని కోట్ల రూపాయల విలువైన భూవివాదాలే ప్రధాన కారణమని బలంగా అనుమానిస్తున్నారు. మృతి చెందిన ఖాజా మొహియుద్దీన్ సుదీర్ఘకాలంగా వక్ఫ్ బోర్డు తరఫున న్యాయవాదిగా వ్యవహరిస్తూ పలు కీలకమైన కేసులను వాదిస్తున్నారు. ఈ క్రమంలో మలక్‌పేట్‌లోని వక్ఫ్ ఆస్తులు, భూములకు సంబంధించి ఆలం ఖాన్, మహబూబ్ ఆలం ఖాన్ అనే వ్యక్తులతో ఆయనకు తీవ్రమైన వివాదాలు, విభేదాలు నడుస్తున్నాయి. ఈ భూముల వివాదంలో ఒక ప్రముఖ కాలేజీ మేనేజ్‌మెంట్ ప్రమేయం కూడా ఉందని, వారి నుంచే మొహియుద్దీన్‌కు ప్రాణగండం పొంచి ఉందనే ఆరోపణలు వస్తున్నాయి.

సీసీటీవీ ఫుటేజ్

హైదరాబాద్ మాసబ్ ట్యాంక్‌లో న్యాయవాదిపై హత్యాయత్నం

తన ఇంటి నుండి బయటకు రాగానే న్యాయవాది ఖాజా మొయినుద్దీన్‌ను కారుతో ఢీ కొట్టి పారిపోయిన దుండగులు

ఆసుపత్రికి తరలించిన కుటుంబ సభ్యులు, మొయినుద్దీన్ పరిస్థితి విషమంగా ఉన్నట్టు సమాచారం pic.twitter.com/8bJ1Z8hpxz

— Telugu Scribe (@TeluguScribe) May 23, 2026

గతంలోనూ ఖాజా మొహియుద్దీన్‌పై భౌతిక దాడులకు యత్నాలు జరిగాయని, దీనిపై స్థానిక హబీబ్ నగర్ పోలీస్ స్టేషన్‌లో అప్పట్లోనే కేసులు కూడా నమోదయ్యాయని పోలీసులు గుర్తుచేస్తున్నారు. అయినప్పటికీ ప్రత్యర్థులు పగతో రగిలిపోతూ, ఈసారి నెంబర్ ప్లేట్ లేని వాహనాన్ని ఉపయోగించి నడిరోడ్డుపై ఆయనను హతమార్చడం గమనార్హం. నగర నడిబొడ్డున ఒక సీనియర్ న్యాయవాదిని పగటిపూట ఇలా ప్లాన్ ప్రకారం చంపడంపై హైదరాబాద్ అడ్వకేట్ల సంఘాలు తీవ్ర ఆగ్రహం వ్యక్తం చేస్తున్నాయి. రాష్ట్రంలో శాంతిభద్రతల పరిస్థితిపై ఆందోళన వ్యక్తం చేస్తూ, న్యాయవాదులకు కనీస రక్షణ కరువైందని లాయర్లు తీవ్ర నిరసన వ్యక్తం చేస్తున్నారు.

ఈ హైప్రొఫైల్ హత్య కేసును హైదరాబాద్ పోలీస్ కమిషనరేట్ అత్యంత ప్రతిష్టాత్మకంగా తీసుకుంది. నిందితులను ఎంతటి వారైనా సరే వదిలిపెట్టే ప్రసక్తే లేదని, వారిని త్వరలోనే పట్టుకుంటామని ఉన్నతాధికారులు ప్రకటించారు. సీసీటీవీ కెమెరాల్లో రికార్డైన కారు రూట్ మ్యాప్ ఆధారంగా, నిందితుల ఆచూకీ కోసం పోలీసులు ప్రత్యేక బృందాలను (Special Teams) రంగంలోకి దించి నగరవ్యాప్తంగా గాలింపు చర్యలను ముమ్మరం చేశారు. ఈ ఘాతుకానికి వెనుక ఉన్న అసలు సూత్రధారులు, పాత్రధారులను గుర్తించేందుకు పోలీసులు ముమ్మరంగా దర్యాప్తు జరుపుతున్నారు.