Half Day Schools: తెలుగు రాష్ట్రాల్లో రేపటి నుంచే ఒంటిపూట బడులు.. సర్కార్ కీలక నిర్ణయం

తెలుగు రాష్ట్రాల్లో భానుడు తన ప్రతాపాన్ని చూపిస్తుండటంతో విద్యాశాఖ అప్రమత్తమైంది. పెరుగుతున్న ఉష్ణోగ్రతల దృష్ట్యా విద్యార్థుల ఆరోగ్యాన్ని దృష్టిలో ఉంచుకుని ఆంధ్రప్రదేశ్, తెలంగాణ రాష్ట్రాల్లో రేపటి నుంచి (మార్చి 16) ఒంటిపూట బడులను ప్రారంభించనున్నట్లు ప్రభుత్వాలు ప్రకటించాయి. ప్రభుత్వ, ఎయిడెడ్, ప్రైవేటు పాఠశాలలన్నింటికీ ఈ నిబంధన వర్తిస్తుందని అధికారులు స్పష్టం చేశారు.

తెలంగాణలో పాఠశాలల సమయాలు
తెలంగాణ విద్యాశాఖ ఆదేశాల ప్రకారం, రాష్ట్రంలోని అన్ని పాఠశాలలు ఉదయం 8:00 గంటల నుంచి మధ్యాహ్నం 12:30 గంటల వరకు మాత్రమే పనిచేస్తాయి. ప్రభుత్వ పాఠశాలల్లో చదివే విద్యార్థులకు మధ్యాహ్నం 12:30 గంటలకు పౌష్టికాహారంతో కూడిన మధ్యాహ్న భోజనాన్ని వడ్డించి, ఆపై వారిని సురక్షితంగా ఇంటికి పంపిస్తారు. ప్రైవేటు యాజమాన్యాలు కూడా ఇదే సమయాన్ని కచ్చితంగా పాటించాలని, మధ్యాహ్నం తర్వాత తరగతులు నిర్వహిస్తే కఠిన చర్యలు తప్పవని ప్రభుత్వం హెచ్చరించింది.

ఆంధ్రప్రదేశ్‌లో షెడ్యూల్ ఇలా..
ఏపీలో కూడా రేపటి నుంచే ఈ విధానం అమల్లోకి రానుంది. అయితే సమయాల్లో స్వల్ప మార్పు ఉంది. ఆంధ్రప్రదేశ్‌లో పాఠశాలలు ఉదయం 7:45 గంటలకే ప్రారంభమై మధ్యాహ్నం 12:30 గంటల వరకు కొనసాగుతాయి. విద్యార్థుల సౌకర్యార్థం మధ్యాహ్న భోజన పథకాన్ని యథావిధిగా కొనసాగించాలని పాఠశాల విద్యాశాఖ ఉత్తర్వులు జారీ చేసింది. ఎండ తీవ్రత దృష్ట్యా విద్యార్థులు ఇబ్బంది పడకుండా తగిన జాగ్రత్తలు తీసుకోవాలని ప్రధానోపాధ్యాయులకు సూచించింది. 2025-26 విద్యా సంవత్సరానికి సంబంధించి ఏప్రిల్ 23ను చివరి పని దినంగా నిర్ణయించారు. ఏప్రిల్ 24 నుంచి రెండు రాష్ట్రాల్లోని పాఠశాలలకు వేసవి సెలవులు ప్రారంభమవుతాయి. జూన్ 12 నుంచి తిరిగి 2026-27 విద్యా సంవత్సరానికి సంబంధించి పాఠశాలలు పునఃప్రారంభం అవుతాయి.