Shabbir Ali:  కాంగ్రెస్ అమ్ముడుపోయే పార్టీగా మారింది: మాజీ మంత్రి షబ్బీర్ అలీ సంచలన ఆడియో లీక్

Shabbir Ali : తెలంగాణ కాంగ్రెస్ పార్టీలో ఒక్కసారిగా ఊహించని రాజకీయ అలజడి రేగింది. ఉమ్మడి నిజామాబాద్ జిల్లాకు చెందిన కాంగ్రెస్ సీనియర్ నాయకుడు, మాజీ మంత్రి షబ్బీర్ అలీ మాట్లాడినట్లుగా చెబుతున్న ఒక ఆడియో రికార్డింగ్ ప్రస్తుతం సోషల్ మీడియాలో దావానలంలా వైరల్ అవుతోంది. కామారెడ్డి జిల్లాకు చెందిన ఒక ముఖ్య నాయకుడితో ఆయన ఫోన్‌లో మాట్లాడిన సంభాషణగా ప్రచారంలో ఉన్న ఈ ఆడియో, సొంత పార్టీ తీరుపై ఆయనకున్న తీవ్ర అసంతృప్తిని, అంతర్గత విభేదాలను బట్టబయలు చేసింది. దీంతో రాష్ట్ర రాజకీయాలు ఒక్కసారిగా వేడెక్కాయి.

ఈ లీకైన ఆడియో సంభాషణలో షబ్బీర్ అలీ కాంగ్రెస్ అధిష్ఠానం లక్ష్యంగా సంచలన వ్యాఖ్యలు చేశారు. కాంగ్రెస్ పార్టీ ఇప్పుడు పూర్తిగా అమ్ముడుపోయే పార్టీగా తయారైందని ఆయన తీవ్ర ఆగ్రహం వ్యక్తం చేశారు. పార్టీ కోసం రాత్రింబగళ్లు కష్టపడి, నమ్ముకున్న నిబద్ధత గల నాయకులను పక్కనబెట్టేస్తున్నారని ఆవేదన చెందారు. కేవలం పైసలు ఇచ్చిన వాళ్లకే పార్టీలో కీలక పదవులు దక్కుతున్నాయని, అర్హత లేకపోయినా ధనబలంతోనే నాయకులుగా చలామణి అవుతున్నారని ఆయన ఆరోపించారు.

అంతేకాకుండా, పార్టీలో పదవుల కేటాయింపులపై ఆయన మరింత ఘాటైన వ్యాఖ్యలు చేశారు. అసభ్యకరమైన పనులు చేసిన వారికి, పండబెట్టిన వాళ్లకే పార్టీలో పెద్ద పీట వేస్తున్నారని షబ్బీర్ అలీ పేర్కొనడం కాంగ్రెస్ శ్రేణుల్లో తీవ్ర చర్చకు దారితీసింది. పార్టీలోని ఒక పెద్ద తలకాయకే ఈ ముడుపులన్నీ నేరుగా అందుతున్నాయని ఆయన ఆరోపించారు. కాంగ్రెస్ అంతర్గత వ్యవహారాల్లో, పదవుల పంపకాల్లో వెనుక ఏం జరుగుతుందో తాను ప్రతి ఒక్క అంశాన్ని నిశితంగా గమనిస్తున్నానని ఆయన స్పష్టం చేశారు.

ప్రస్తుతం ఈ ఆడియో 'హస్తం' పార్టీలో అత్యంత హాట్ టాపిక్‌గా మారింది. ఈ గ్రూప్ వార్ కాంగ్రెస్ అధిష్ఠానానికి పెద్ద తలనొప్పిగా మారేలా కనిపిస్తోంది. అయితే, ప్రస్తుతం తనకు అన్యాయం జరిగినట్లు భావిస్తున్నప్పటికీ, భవిష్యత్తుపై ఆయన ఆశాభావం వ్యక్తం చేశారు. "నాకు కూడా మంచి రోజులు వస్తాయి" అంటూ షబ్బీర్ అలీ చేసిన వ్యాఖ్యలు, రానున్న రోజుల్లో ఆయన రాజకీయంగా ఎలాంటి నిర్ణయం తీసుకోబోతున్నారనే దానిపై ఆసక్తిని రేకెత్తిస్తున్నాయి.