గుజరాత్‌లో ఘోరం.. 10 నెలల చిన్నారిపై అత్యాచారం

Gujarat: గుజరాత్ లో మరో దారుణం జరిగింది. కామాంధుల చేతిలో మరో పసిగుడ్డు బలైంది. బరూచ్‌లో పనోలి గ్రామంలో 10 నెలల బాలికపై 30 ఏళ్ల వ్యక్తి అత్యాచారానికి పాల్పడ్డాడు. నిందితుడు దీపక్ కుమార్ లాల్ బాబు సింగ్ ను  పోలీసులు అరెస్ట్ చేశారు. 

ఈ మేరకు పోలీసులు తెలిపిన వివరా ప్రకారం.. గుజరాత్‌లోని బరూచ్‌ జిల్లా పనోలి గ్రామంలో ఆదివారం 10 నెలల పాప తన ఇంటి ఆవరణలో ఆడుకుంటోంది. ఈ క్రమంలోనే ఎవరూ చూడకముందు చిన్నారిని ఎత్తుకెళ్లిన దీపక్ కుమార్ లాల్ బాబు సింగ్ అనే వ్యక్తి ఇంటి దగ్గరలోనే నిర్మానుష్య ప్రాంతంలో అత్యాచారం చేసినట్లు డిప్యూటీ సూపరింటెండెంట్ ఆఫ్ పోలీస్ కుశాల్ ఓజా తెలిపారు.

ఇక చిన్నారి తల్లి ఓ రెస్టారెంట్‌లో పనిచేస్తున్నట్లు చెప్పారు. చిన్నారి నాయనమ్మ పాప కేకలు విని పరుగెత్తుకుంటూ వచ్చి చూసేసరికి తీవ్రగాయాలై రక్తం కారుతోంది. వెంటనే విషయం తెలుసుకున్న గ్రామస్థులు నిందితుడిని వెంబడించి పట్టుకుని పోలీసులకు అప్పగించారు. పాపను బరూచ్ సివిల్ ఆసుపత్రికి తీసుకెళ్లారు. నిందితుడిపై లైంగిక నేరాల నుండి పిల్లల రక్షణ (పోక్సో) చట్టం, భారతీయ న్యాయ సంహిత కింద కేసు నమోదు చేశారు.