Paytm కీలక నిర్ణయం: 4 వేల మంది కొత్త ఉద్యోగాలు,  400 మంది ఔట్!

ప్రముఖ డిజిటల్ చెల్లింపుల సంస్థ పేటీఎం కీలక ప్రకటన చేసింది.  రాబోయే తొమ్మిది నెలల్లో దాదాపు 4 వేల మంది కొత్త ఉద్యోగులను నియమించుకోవడానికి సిద్ధమవుతోంది. తన వ్యాపార నెట్‌వర్క్‌ను మరింత విస్తరించడంతో పాటు, ఆర్టిఫిషియల్ ఇంటెలిజెన్స్ (AI) ఆధారిత సరికొత్త సేవలను అందించడమే లక్ష్యంగా కంపెనీ ఈ కీలక నిర్ణయం తీసుకుంది. ప్రస్తుతం పేటీఎంలో దాదాపు 40 వేల మంది ఉద్యోగులు పనిచేస్తుండగా, ఈ కొత్త నియామకాలతో సిబ్బంది సంఖ్య మరో 10 శాతం పెరగనుంది. అయితే, వార్షిక పనితీరు సమీక్ష ఆధారంగా దాదాపు 1 శాతం మంది ఉద్యోగులను, అంటే దాదాపు 400 మందిని కంపెనీ తొలగిస్తోందని పేటీఎం ప్రతినిధి ఒకరు తెలిపారు. గత ఏడాది జరిగిన భారీ తొలగింపుల తర్వాత ఇప్పుడు ఈ స్వల్ప మార్పులు చోటుచేసుకుంటున్నాయి.

రెండేళ్ల క్రితం ఆర్‌బీఐ పేటీఎం బ్యాంకింగ్ విభాగానికి సంబంధించి తీసుకున్న కఠిన చర్యల తర్వాత, కంపెనీ తన వ్యాపార శైలిని పూర్తిగా మార్చుకుంటోంది. పేటీఎంకు ఉన్న కోట్ల మంది రిజిస్టర్డ్ వినియోగదారులు కేవలం డబ్బులు పంపడమే కాకుండా, తమ యాప్ ద్వారా రుణాలు,  పెట్టుబడులు ఇతర ఆర్థిక సేవలను కూడా ఉపయోగించుకునేలా చేయడానికి కంపెనీ చీఫ్ ఎగ్జిక్యూటివ్ ఆఫీసర్ విజయ్ శేఖర్ శర్మ గట్టిగా ప్రయత్నిస్తున్నారు. ఈ నేపథ్యంలో సీనియర్ నాయకత్వ స్థానాలతో పాటు ప్రొడక్ట్, టెక్నాలజీ,  ఏఐ విభాగాలలో 2027 మార్చి వరకు ఈ రిక్రూట్‌మెంట్ ప్రక్రియ నిరంతరాయంగా కొనసాగనుంది. గత రెండు నెలల్లోనే ఇప్పటికే 800 మందికి పైగా కొత్తవారిని చేర్చుకున్నామని, మిగిలిన 4,000 మందిని తీసుకునే పనిలో ఉన్నామని కంపెనీ ఒక ప్రకటనలో స్పష్టం చేసింది.

బ్యాంక్ లైసెన్స్‌ను ఆర్‌బీఐ రద్దు

గతంలో RBI తీసుకున్న చర్యల వల్ల పేటీఎం తీవ్ర ఇబ్బందులను ఎదుర్కొంది. చివరకు ఏప్రిల్ నెలలో పేటీఎం పేమెంట్స్ బ్యాంక్ లైసెన్స్‌ను ఆర్‌బీఐ రద్దు చేయడంతో ఆ విభాగం పూర్తిగా మూతపడింది. ఆ సమయంలో తీవ్ర సంక్షోభంలో పడిన పేటీఎం ఏకంగా 4,500 మందికి పైగా ఉద్యోగులను తొలగించాల్సి వచ్చింది. ఆ బ్యాంకింగ్ విభాగంలో పనిచేసిన చాలా మందిని గత రెండేళ్లలో తొలగించగా, కొంతమందిని పేటీఎం గ్రూప్‌లోని ఇతర విభాగాల్లోకి తీసుకున్నారు. ఇప్పుడు మిగిలి ఉన్న వందలాది మంది సిబ్బందిని కూడా బ్యాంక్ పూర్తిగా మూతపడే ప్రక్రియలో భాగంగా తొలగించనున్నారు. అయినప్పటికీ, ఆ కష్టాలన్నింటినీ అధిగమించి పేటీఎం వరుసగా గత నాలుగు త్రైమాసికాల నుంచి లాభాలను నమోదు చేస్తూ మళ్లీ పుంజుకోవడం విశేషం.