phone addiction : డిజిటల్ మృగాలు...పిల్లల్లో ‘మొబైల్ వ్యసనం’.. కాపలాగా ‘బౌన్సర్లు’

phone addiction : డిజిటల్ యుగంలో స్మార్ట్‌ఫోన్ ఒక వ్యసనంగా మారితే అది ఎంతటి దారుణమైన పరిస్థితులకు దారితీస్తుందో చెప్పడానికి గుజరాత్‌లో వెలుగుచూసిన కొన్ని వింత సంఘటనలే నిదర్శనం. ఒకప్పుడు కేవలం రాజకీయ నాయకులు, ప్రముఖుల చుట్టూ మాత్రమే కనిపించే బౌన్సర్లు.. ఇప్పుడు ఇళ్లల్లోనూ పహారా కాస్తున్నారు. పిల్లల్లో మితిమీరిపోతున్న మొబైల్ వ్యసనాన్ని, వారి హింసాత్మక ప్రవర్తనను కట్టడి చేయడానికి ధనవంతులైన తల్లిదండ్రులు ఏకంగా నెలకు వేల రూపాయలు ఖర్చు చేస్తూ బౌన్సర్లను అద్దెకు తెచ్చుకుంటున్నారు.

గుజరాత్‌లోని అహ్మదాబాద్‌కు చెందిన ఒక 16 ఏళ్ల అమ్మాయి బెడ్‌రూమ్ బయట ఇద్దరు చొప్పున మొత్తం నలుగురు బౌన్సర్లు షిఫ్టుల వారీగా నిరంతరం కాపలా ఉంటున్నారు. ఆ అమ్మాయికి ఎలాంటి ప్రాణహాని లేకపోయినప్పటికీ.. ఆమె నుంచి ఫోన్‌ను దూరంగా ఉంచడానికి, ఆమె హింసాత్మక ప్రవర్తన నుంచి కుటుంబ సభ్యులను కాపాడుకోవడానికి ఆ తండ్రి నెలకు రూ.65 వేలు ఖర్చు చేస్తూ ఈ కఠిన నిర్ణయం తీసుకున్నాడు. సోషల్ మీడియా, గేమింగ్‌కు బానిసైన ఆ అమ్మాయి చేతి నుంచి ఫోన్ లాక్కుంటే చాలు.. ఇంట్లోని వస్తువులను పగులగొట్టడం, కుటుంబ సభ్యులపై భౌతిక దాడులకు దిగడం లాంటి ఉగ్రరూపం దాల్చుతోందని వైద్యులు వెల్లడించారు. ఆ అమ్మాయి ఫోన్‌తో ఎంతసేపు గడిపింది, ఎక్కడెక్కడికి వెళ్తున్నది, ఎవరెవరితో మాట్లాడుతున్నదనే సమాచారాన్ని ఈ బౌన్సర్లు నిరంతరం పర్యవేక్షిస్తూ తల్లిదండ్రులకు చేరవేస్తుంటారు.

ఇదే తరహాలో సూరత్‌లోనూ గేమింగ్ అడిక్షన్ (ఆన్‌లైన్ ఆటల వ్యసనం) ఉన్న ఒక 17 ఏళ్ల టీనేజ్ కుర్రాడి ప్రవర్తన నుంచి ఇంట్లోని పెంపుడు కుక్కను రక్షించడానికి ఏకంగా 8 మంది బౌన్సర్లను తొమ్మిది నెలల పాటు నియమించాల్సి వచ్చింది. ఫోన్ ఎక్కువగా వాడుతున్నాడని తండ్రి మందలిస్తే.. ఆ కోపాన్ని తండ్రికి ఎంతో ఇష్టమైన పెంపుడు కుక్కపై దాడి చేస్తూ ఆ కుర్రాడు తీర్చుకునేవాడు. ప్రస్తుతం సెక్యూరిటీ ఏజెన్సీలకు వస్తున్న సమాచారం ప్రకారం.. సంపన్న కుటుంబాలలో సెలబ్రిటీల భద్రత కంటే కూడా, మొబైల్ వ్యసనంతో ఊగిపోయే పిల్లలను నియంత్రించడానికే బౌన్సర్ల అవసరం ఎక్కువగా పెరుగుతోందని తెలుస్తోంది. ఈ బౌన్సర్లు పిల్లలపై ఎలాంటి చేయి చేసుకోకుండా, కేవలం వారిని హింసకు దిగకుండా నిరోధించడానికి మాత్రమే పనిచేస్తారు.

పిల్లలు ఈ స్థాయిలో డిజిటల్ స్క్రీన్‌లకు బందీలు కావడానికి కరోనా లాక్‌డౌన్ కాలం ఒక చేదు జ్ఞాపకంగా మిగిలిందని మానసిక వైద్య నిపుణులు విశ్లేషిస్తున్నారు. ఆ సమయంలో ఆన్‌లైన్ క్లాసులు, గేమింగ్, సోషల్ మీడియా వాడకం విపరీతంగా పెరిగిపోవడంతో పిల్లలు బయటి ప్రపంచంతో మరియు నిజమైన మానవ సంబంధాలతో సంబంధాలు తెంచుకున్నారు. ప్రారంభంలో నిద్రలేమి, ఏకాగ్రత లోపించడం, చదువులో వెనుకబడటం వంటి లక్షణాలు కనిపించినా.. రానురాను అది ముదిరిపోయి తమ ఎమోషన్స్‌ను (భావోద్వేగాలను) అదుపు చేసుకోలేని తీవ్రమైన మానసిక సమస్యగా మారుతుందని సైకియాట్రిస్టులు హెచ్చరిస్తున్నారు. ఫోన్ ద్వారా వచ్చే తాత్కాలిక వినోదమే వారికి మానసిక సపోర్టుగా మారిపోవడం వల్ల, అది లేనప్పుడు తీవ్ర ఆందోళన, కోపం వారిని ఆవహిస్తున్నాయి.

అయితే, పిల్లల నుంచి అకస్మాత్తుగా ఫోన్లను లాక్కోవడం లేదా వారిపై బౌన్సర్లను కాపలా పెట్టడం అనేది కేవలం తాత్కాలిక రక్షణ మాత్రమేనని వైద్యులు స్పష్టం చేస్తున్నారు. ఇలాంటి కఠిన చర్యల వల్ల పిల్లలు మరింత మొండిగా, హింసాత్మకంగా మారే ప్రమాదం ఉంది. ఈ సమస్యకు నిజమైన పరిష్కారం సరైన మానసిక వైద్య చికిత్స ,కౌన్సెలింగ్‌లోనే దాగి ఉంది. తల్లిదండ్రులు పిల్లలతో ఎక్కువ సమయం గడుపుతూ, వారి స్క్రీన్ సమయాన్ని క్రమక్రమంగా తగ్గించుకుంటూ రావాలి. శారీరక వ్యాయామాలు, క్రీడలు, సామాజిక సంబంధాలను పెంచడం ద్వారా మాత్రమే వారిని ఈ వ్యసనం నుండి దూరం చేయవచ్చు.

సాంకేతిక పరిజ్ఞానం అనేది మానవ జీవితాన్ని, జీవన శైలిని మెరుగుపరచడానికి ఉపయోగపడాలి కానీ, మనుషులను మృగాలుగా మార్చకూడదు. గుజరాత్‌లో వెలుగుచూసిన ఈ విస్తుగొలిపే సంఘటనలు నేడు అనేక భారతీయ ఇళ్లలో సాగుతున్న అంతర్గత ఘర్షణలకు అద్దం పడుతున్నాయి. తమ పిల్లల చేతుల్లోని స్మార్ట్‌ఫోన్ ఎప్పుడు వ్యసనంగా మారుతుందో గమనించుకుంటూ అప్రమత్తంగా ఉండాలని ప్రతి తల్లిదండ్రులకూ ఈ ఘటనలు ఒక బలమైన హెచ్చరికను జారీ చేస్తున్నాయి.