Total Fertility Rate : భారత్‌లో పడిపోతున్న జననాల రేటు (TFR)..... చైనా బాటలో దేశం.. ఆందోళనలో నిపుణులు!

Total Fertility Rate : ప్రస్తుతం ప్రపంచవ్యాప్తంగా అనేక దేశాలు తీవ్రమైన జనాభా మార్పులను (Demographic Shifts) ఎదుర్కొంటున్నాయి. అంతర్జాతీయంగా సంతానోత్పత్తి రేటు (Total Fertility Rate - TFR) వేగంగా పడిపోతోంది. ఇప్పుడు భారతదేశం కూడా ఈ ట్రెండ్‌లోకి ప్రవేశించింది. దేశంలో జనాభా వృద్ధి రేటు నిరంతరం మందగిస్తోంది. శాంపిల్ రిజిస్ట్రేషన్ సిస్టమ్ (SRS) 2024 తాజా నివేదిక ప్రకారం, భారతదేశ సగటు సంతానోత్పత్తి రేటు (TFR) 1.9 కి పడిపోయింది. అంటే గతంతో పోలిస్తే భారతీయులు తక్కువ మంది పిల్లలకు జన్మనిస్తున్నారు. ఒక మహిళ తన జీవితకాలంలో జన్మనిచ్చే పిల్లల సగటు సంఖ్య గణనీయంగా తగ్గింది.జననాల రేటు తగ్గడం, సంతానోత్పత్తి రేటు పడిపోవడం అనేవి సాంకేతికంగా వేర్వేరు అంశాలైనప్పటికీ, ఒకదానితో ఒకటి ముడిపడి ఉన్నాయి. ఈ తగ్గుదల దేశ భవిష్యత్తుపై తీవ్ర ప్రభావం చూపుతుందని నిపుణులు హెచ్చరిస్తున్నారు.

భారతదేశంలో ప్రస్తుత పరిస్థితి ఏమిటి?

దేశంలో సంతానోత్పత్తి రేటు పడిపోతుండటంతో, దాని దుష్ప్రభావాల నుండి తప్పించుకోవడానికి ఆంధ్రప్రదేశ్ వంటి రాష్ట్రాలు ఇప్పటికే అప్రమత్తమయ్యాయి. ఏపీ ప్రభుత్వం మూడో లేదా నాలుగో బిడ్డ ఉన్న కుటుంబాలకు ఆర్థిక సహాయం అందించే యోచనలో ఉంది. ఆసియా నుండి యూరప్, అమెరికా ఖండాల వరకు అన్ని చోట్లా జననాల రేటు పడిపోయింది. దీనివల్ల భారతదేశంలో జనాభా సంతులనం దెబ్బతినడమే కాకుండా, జనాభా వేగంగా తగ్గిపోయే ప్రమాదం ఉంది.నిపుణుల అభిప్రాయం ప్రకారం.. ఇలాగే కొనసాగితే భారతదేశం కూడా చైనా లాంటి పరిస్థితిని ఎదుర్కోవాల్సి వస్తుంది. చైనాలో ఒక దశలో వృద్ధుల జనాభా విపరీతంగా పెరిగిపోయింది. భారతదేశంలో కూడా, ముఖ్యంగా దక్షిణ భారత రాష్ట్రాలలో వృద్ధుల జనాభా వేగంగా పెరుగుతోంది. గతంలో ప్రతి కుటుంబంలో 3 నుండి 4 గురు పిల్లలు ఉండటం సర్వసాధారణం, కానీ ఇప్పుడు మెజారిటీ కుటుంబాలు 1 లేదా ఇద్దరు పిల్లలకే పరిమితమవుతున్నాయి.

జననాల రేటు తగ్గడానికి ప్రధాన కారణాలు:

పెరుగుతున్న జీవన వ్యయం (Cost of Living): పిల్లల పెంపకం, చదువుల ఖర్చులు భారీగా పెరగడం.
ఆలస్యపు వివాహాలు: మారుతున్న జీవనశైలి కారణంగా లేటుగా పెళ్లిళ్లు చేసుకోవడం.
పట్టణీకరణ (Urbanization): నగర సంస్కృతి, చిన్న కుటుంబాల పట్ల ఆసక్తి.
మెరుగైన వైద్య సేవలు: శిశు మరణాల రేటు తగ్గడం వల్ల ఎక్కువ మంది పిల్లలు కావాలనే ఆలోచన మారడం.
సాంప్రదాయమార్పులు: మహిళల్లో విద్య, ఉద్యోగ అవకాశాలు పెరగడం.
ప్రభుత్వాల ఆందోళన: వృద్ధుల జనాభా పెరగడం, పనిచేసే యువశక్తి (Workforce) తగ్గడం వల్ల భవిష్యత్తులో పెన్షన్ వ్యవస్థ, ఆరోగ్య సేవలపై తీవ్రమైన ఆర్థిక భారం పడుతుందని రాష్ట్ర ప్రభుత్వాలు ఆందోళన చెందుతున్నాయి.

6 రాష్ట్రాల్లో మాత్రమే మెరుగైన పరిస్థితి

భారతదేశంలోని కేవలం 6 రాష్ట్రాలలో మాత్రమే ఇప్పటికీ కుటుంబాలలో పిల్లల సంఖ్య ఎక్కువగా ఉంది. అవి:
బిహార్ (ఇక్కడ ఒక మహిళ సగటున 3 గురు పిల్లలకు జన్మనిస్తోంది)
ఉత్తరప్రదేశ్
మధ్యప్రదేశ్
రాజస్థాన్
ఛత్తీస్‌గఢ్
జార్ఖండ్

మిగిలిన అన్ని రాష్ట్రాల్లోనూ జననాల రేటు ఎంతగా పడిపోయిందంటే, రాబోయే రోజుల్లో అక్కడ వృద్ధుల సంఖ్య విపరీతంగా పెరగనుంది. ఢిల్లీ, కేరళ, తమిళనాడు వంటి రాష్ట్రాల్లో ఈ రేటు కేవలం 1.0 కి చేరింది.

పొరుగు దేశాల పరిస్థితి: చైనా ఒక హెచ్చరిక

చైనా: 2025లో చైనాలో జననాల రేటు రికార్డు స్థాయికి పడిపోయింది. ఎక్కువ మంది పిల్లల్ని కనాలని ప్రభుత్వం రకరకాల పథకాలు, ఆర్థిక సాయం ప్రకటించినప్పటికీ అక్కడ జనాభా వరుసగా నాలుగో ఏడాది కూడా క్షీణించింది. చైనాలో ప్రతి 1,000 మందికి జననాల రేటు 5.63 కి పడిపోగా, మరణాల రేటు 8.04 కి పెరిగింది (ఇది 1968 తర్వాత అత్యధికం). 2025 చివరి నాటికి చైనా జనాభా 34 లక్షలు తగ్గి 1.4 బిలియన్లకు పరిమితమైంది. 2016లో వన్-చైల్డ్ పాలసీని రద్దు చేసి ఇద్దరిని, 2021లో ముగ్గురిని కనడానికి అనుమతించినా చైనాలో ఫలితం లేకపోయింది.

పాకిస్తాన్: యునైటెడ్ నేషన్స్ పాపులేషన్ ఫండ్ (UNFPA) నివేదిక ప్రకారం, పాకిస్తాన్ జననాల రేటు 3.5 గా ఉంది. ఇది భారతదేశం కంటే చాలా ఎక్కువ. అక్కడ ప్రభుత్వం మారినా జననాల రేటు ఎప్పుడూ ఎక్కువగానే ఉంటోంది.
బాంగ్లాదేశ్: ఈ దేశం విద్య, ఆరోగ్య పథకాల ద్వారా తన జననాల రేటును నియంత్రించి, ప్రస్తుతం 2.1 అనే ఆదర్శవంతమైన (Ideal) స్థాయికి తీసుకువచ్చింది.

ఆసియా ఖండంలో వివిధ దేశాల సంతానోత్పత్తి రేటు (TFR)  OECD నివేదిక ప్రకారం, 2044 నాటికి మొత్తం ఆసియాలో సగటు TFR 1.61 కి, 2064 నాటికి 1.58 కి పడిపోనుంది. దక్షిణ కొరియాలో ఇది ప్రపంచంలోనే అత్యంత కనిష్టంగా 0.7 కి పడిపోయింది.వివిధ దేశాలు/ప్రాంతాల సంతానోత్పత్తి రేటు (టాప్ టు బాటమ్) పట్టిక ఇక్కడ చూడవచ్చు:

దేశం / ప్రాంతం                      జనన రేటు (TFR)
అఫ్గానిస్తాన్                                           4.7
పాకిస్తాన్                                               3.5
పాపువా న్యూ గినియా                          3.0
మంగోలియా, తైమూర్-లెస్టె                  2.6 
కంబోడియా                                           2.5
లావోస్                                                    2.4
బాంగ్లాదేశ్, ఇండోనేషియా, మయన్మార్2.1
భారతదేశం, నేపాల్, ఫిలిప్పీన్స్, శ్రీలంక, వియత్నాం1.9
ఉత్తర కొరియా                                      1.8
బ్రూనై                                                  1.7
ఆస్ట్రేలియా, న్యూజిలాండ్                   1.6
మలేషియా, మాల్దీవులు                       1.5
భూటాన్                                              1.4
జపాన్, థాయిలాండ్                           1.2
చైనా, సింగపూర్                                 1.0
హాంకాంగ్, మకావు, దక్షిణ కొరియా       0.7

భవిష్యత్తు అంచనాలలో కొంత అనిశ్చితి ఉన్నప్పటికీ, కొన్ని నివేదికలు 2064 నాటికి ఆసియా దేశాల సగటు జననాల రేటు 1.16 కి పడిపోవచ్చని, మరికొన్ని 2.01 కి చేరవచ్చని అంచనా వేస్తున్నాయి. ఏది ఏమైనప్పటికీ, ప్రస్తుత ట్రెండ్ చూస్తుంటే భారత్ త్వరితగతిన జనాభా నియంత్రణ నుండి జనాభా క్షీణత వైపు అడుగులు వేస్తోందని స్పష్టమవుతోంది.