TG News: కవితకు బెయిల్ రావడం వెనక బీజేపీలో బీఆర్ఎస్ విలీనం హామీ ఉందని కాంగ్రెస్ నేత జగ్గారెడ్డి ఆరోపించారు. వచ్చే ఎన్నికల్లో బీజేపీ, బీఆర్ఎస్ కలిసి పోటీ చేయనున్నాయని, ఇదే మోదీకి కేసీఆర్ ఇచ్చే రిటర్న్ గిఫ్ట్ అని జగ్గారెడ్డి చెప్పారు. లిక్కర్ మాఫియా కింగ్ కవితకు ఐదు నెలలకే బెయిల్ ఇచ్చారని, సిసోడియాకు మాత్రం 17 నెలల వరకు బెయిల్ రాలేదని ఆయన అనుమానం వ్యక్తం చేశారు. ఐదు నెలలకే కవితకి బెయిల్ ఎలా వచ్చిందని ప్రశ్నించారు. తెలంగాణలో కాంగ్రెస్ నీ దెబ్బతీసే కుట్రలో బీజేపీ, బీఆర్ఎస్ ఈ ఒప్పందం కుదుర్చుకున్నాయన్నారు. ఈ మేరకు మంగళవారం మీడియా సమావేశంలో జగ్గారెడ్డి మాట్లాడుతూ.. జడ్జి బెయిల్ ఆర్డర్ ఇవ్వకముందే మూడు రోజులుగా కేటీఆర్ సోషల్ మీడియా హడావుడి చేస్తున్నారన్నారు. ఈ రెండు పార్టీలు వచ్చే ఎన్నికల లోపు విలీనం కావచ్చు లేదంటే పొత్తు పెట్టుకోవచ్చు అన్నారు.

బీఆర్ఎస్ పై కోర్టు చర్యలు తీసుకోవాలి..
అలాగే బెయిల్ వస్తుందని ముందే చెప్పిన కేటీఆర్ పై కోర్టు చర్యలు తీసుకోవాలని డిమాండ్ చేశారు. బెయిల్ పై విచారణ జరుగుతున్నప్పుడు జడ్జి చెప్పే వరకు తెలియదు. కానీ కవిత బెయిల్ పై మూడు నాలుగు రోజుల నుంచి కవితకు బెయిల్ వస్తుందని బీఆర్ఎస్ ఎలా సోషల్ మీడియాలో ప్రచారం చేసిందన్నారు. బీజేపీ ప్రభుత్వం బీఆర్ఎస్ కు ఒప్పందాల్లో భాగంగానే బెయిల్ వచ్చింది. జడ్జి చెప్పకముందే కేసీఆర్, కేటీఆర్, హరీష్ కు ముందు సమాచారం వచ్చింది. దేశంలో విచిత్ర పరిపాలన జరుగుతుంది. బీజేపీ తెలంగాణలో అధికారంలోకి వచ్చే పరిస్థితి లేదు. అందుకే బీజేపీ.. బీఆర్ఎస్ తో కలిసి పోయే దాంట్లో భాగమే లిక్కర్ కేసు. బీజేపీ వ్యూహం ఏమిటంటే.. తెలంగాణలో కాంగ్రెస్ అధికారంలో ఉంది కాబట్టి బీఆర్ఎస్ ను కలుపుకునే పనిలో ఉంది. పార్లమెంట్ ఎన్నికల్లో బీఆర్ఎస్ డమ్మీ పాత్ర పోషించింది. కవిత బెయిల్ కండిషన్ లో భాగమే పార్లమెంట్ ఎన్నికల్లో బీజపీ కి ఓట్లు వేయించారన్నారు జగ్గారెడ్డి.

ఇది కూడా చదవండి: Kolkata: అభయ అత్యాచార కేసులో పోలీసుల హస్తం? వెలుగులోకి విస్తుపోయే నిజాలు!

సొంత నియోజక వర్గం కేసీఆర్ వదులుకున్నారు..
ఇక మెదక్ లో బీఆర్ఎస్ గెలుస్తుంది అనే పరిస్థితిలో మూడో స్థానంకు ఎందుకు పోయిందన్నారు. కవిత కోసం సొంత పార్లమెంట్ నియోజక వర్గం కేసీఆర్ వదిలేసుకున్నారు. మాకు నాలుగు సీట్లు తగ్గడానికి బీజేపీ, బీఆర్ఎస్ కలిసి పోవడమే కారణం. రాజకీయంగా కాంగ్రెస్ నీ బలహీన పరిచే ఒప్పందంలో భాగమే బీజేపీ, బీఆర్ఎస్ ఎత్తుగడ. సిసోడియా, కేజ్రీవాల్ కు బెయిల్ ఇవ్వడానికి ఆలోచించిన కోర్టులు.. కవితకు ఐదు నెలల్లో బెయిల్ ఎలా ఇచ్చాయని ప్రశ్నించారు. బీజేపీ ఉత్తరాన వీక్ అయ్యింది. దక్షిణాదిలో బీఆర్ఎస్ ను బలహీన పరిచారు. ఏపీలో చంద్రబాబు, పవన్ కళ్యాణ్ తో పొత్తు పెట్టుకొని సీట్లు గెలిచింది. మేము జడ్జిని తప్పు పట్టడం లేదు. జడ్జి చెప్పక ముందే బీఆర్ఎస్ ఎలా చెప్పుకుంది అనేది మా వాదన. న్యాయవ్యవస్థ కేసీఆర్ కుటుంబంపై చర్యలు తీసుకోవాలని డిమాండ్ చేశారు.