Donald Trump : యుద్ధం జరుగుతోంది.. వెనక్కి తగ్గేదే లేదు: ట్రంప్ సంచలన వ్యాఖ్యలు

అమెరికా, ఇరాన్ దేశాల మధ్య ఉద్రిక్తతలు పతాక స్థాయికి చేరుకున్నాయి. గల్ఫ్ ప్రాంతంలో అమెరికాకు చెందిన రెండు యుద్ధ విమానాలు కూలిపోవడం అంతర్జాతీయంగా కలకలం రేపుతోంది. ఈ ఘటనలపై అమెరికా అధ్యక్షుడు డొనాల్డ్ ట్రంప్ తొలిసారి స్పందించారు. విమానాల కూల్చివేత వార్తలు వస్తున్నప్పటికీ, ఇరాన్‌తో జరగాల్సిన చర్చలపై దీని ప్రభావం ఉండదని ఆయన స్పష్టం చేశారు. "ఇది యుద్ధం.. ప్రస్తుతం మనం యుద్ధంలో ఉన్నాం" అంటూ ట్రంప్ వ్యాఖ్యానించడం పరిస్థితి ఎంత తీవ్రంగా ఉందో అర్థం చేస్తోంది.

రెండు వేర్వేరు ఘటనలు

శుక్రవారం గల్ఫ్ రీజియన్‌లో రెండు వేర్వేరు ఘటనలు చోటుచేసుకున్నాయి. తొలుత అమెరికాకు చెందిన F-15E స్ట్రైక్ ఈగిల్ యుద్ధ విమానాన్ని ఇరాన్ కూల్చివేసినట్లు వార్తలు వచ్చాయి. ఈ విమానంలోని ఇద్దరు సిబ్బందిలో ఒకరిని రక్షించగా, రెండో వ్యక్తి కోసం గాలింపు చర్యలు కొనసాగుతున్నాయి. అయితే ఆ రెండో వ్యక్తి ఇరాన్ సైన్యం చేతికి చిక్కాడని కొన్ని వార్తలు వస్తుండగా, అమెరికా మాత్రం ఇంకా వెతుకుతున్నామని చెబుతోంది. ఇదే సమయంలో మరో అమెరికన్ యుద్ధ విమానం కూడా కూలిపోయినట్లు అధికారులు ధృవీకరించారు. అది ప్రమాదవశాత్తూ పడిపోయిందా లేక ఇరాన్ కూల్చివేసిందా అనే దానిపై ఇంకా స్పష్టత రాలేదు.

మరోవైపు, ఇరు దేశాల మధ్య శాంతిని నెలకొల్పేందుకు జరుగుతున్న దౌత్య ప్రయత్నాలు పూర్తిగా విఫలమయ్యాయి. పాకిస్థాన్ రాజధాని ఇస్లామాబాద్‌లో అమెరికా అధికారులతో భేటీ కావడానికి ఇరాన్ నిరాకరించింది. అమెరికా పెడుతున్న నిబంధనలు తమకు ఏమాత్రం ఆమోదయోగ్యం కాదని ఇరాన్ తేల్చి చెప్పింది. దీంతో కాల్పుల విరమణ కోసం పాకిస్థాన్ వంటి దేశాలు చేస్తున్న మధ్యవర్తిత్వం ప్రస్తుతానికి అడ్డంకిలో పడింది. అటు యుద్ధ విమానాలు కూలిపోవడం, ఇటు చర్చలు విఫలం కావడంతో పశ్చిమ ఆసియాలో యుద్ధ మేఘాలు మరింతగా కమ్ముకుంటున్నాయి.