Tampa ship : 107 ఏళ్ల తర్వాత దొరికిన మొదటి ప్రపంచ యుద్ధం నాటి నౌక

Tampa ship : మొదటి ప్రపంచ యుద్ధ చరిత్రలో అత్యంత విషాదకరమైన, అమెరికా నౌకాదళానికి భారీ నష్టాన్ని మిగిల్చిన 'యూఎస్‌ఎస్‌ తాంపా' (USS Tampa) నౌక కథనం ఇప్పుడు మళ్ళీ వెలుగులోకి వచ్చింది. సుమారు 107 ఏళ్ల తర్వాత ఈ నౌక ఆనవాళ్లను బ్రిటన్ డైవర్లు గుర్తించడం విశేషం.  

హిస్టారికల్ బ్యాక్‌గ్రౌండ్...

1918వ సంవత్సరం.. మొదటి ప్రపంచ యుద్ధం ముగింపు దశకు చేరుకుంటున్న సమయం. సెప్టెంబరు 17న అమెరికా కోస్ట్‌గార్డ్ కట్టర్ నౌక 'తాంపా', గిబ్రాల్టర్ నుండి ఇంగ్లాండ్‌కు బయలుదేరిన ఒక భారీ నౌకాదళ కాన్వాయ్‌కు రక్షణగా బయలుదేరింది. ఆ ప్రయాణంలో తాంపా అత్యంత కీలక పాత్ర పోషించింది. అయితే, సెప్టెంబరు 26 నాటికి నౌకలోని బాయిలర్లకు కావలసిన బొగ్గు నిల్వలు దాదాపుగా అడుగంటాయి. ఆ సమయంలో నౌక వేల్స్‌లోని మిల్‌ఫోర్డ్ హెవెన్ రేవుకు చేరువలో ఉంది. బొగ్గును తిరిగి నింపుకోవడానికి, కాన్వాయ్ కంటే ముందే రేవుకు వెళ్లాలని కెప్టెన్ చార్లెస్ సాటర్లీ నిర్ణయించుకున్నారు. అధికారుల అనుమతితో తాంపా కాన్వాయ్ నుంచి విడిపోయి ఒంటరిగా వేగంగా దూసుకుపోసాగింది.

దురదృష్టవశాత్తూ, సరిగ్గా అదే సమయంలో జర్మనీకి చెందిన మృత్యువులాంటి జలాంతర్గామి UB-91 (కొన్ని చోట్ల UB-41 అని కూడా అంటారు) అక్కడ పొంచి ఉంది. రాత్రి 8:15 గంటల సమయం.. చుట్టూ చీకటిగా ఉంది. జర్మన్ జలాంతర్గామి కెప్టెన్ ఒక టార్పెడోను ప్రయోగించారు. అది నేరుగా వెళ్లి తాంపా నౌకను తాకింది. ఆ పేలుడు దాటికి, నౌకలోని బొగ్గు ధూళి కూడా అంటుకోవడంతో క్షణాల్లో భారీ విస్ఫోటనం సంభవించింది. కేవలం రెండు మూడు నిమిషాల వ్యవధిలోనే నౌక సముద్ర గర్భంలోకి జారిపోయింది. ఆ సమయంలో నౌకలో ఉన్న 131 మంది (111 మంది కోస్ట్‌గార్డ్ సిబ్బంది, 4 గురు నేవీ సిబ్బంది, మిగిలిన వారు బ్రిటిష్ సైనికులు) అందరూ జలసమాధి అయ్యారు. ఇది మొదటి ప్రపంచ యుద్ధంలో అమెరికా కోస్ట్‌గార్డ్‌కు జరిగిన అతిపెద్ద ప్రాణనష్టం.

 దశాబ్దాలుగా ఈ నౌక ఆచూకీ కోసం అన్వేషణ సాగుతూనే ఉంది. తాజాగా, బ్రిటన్‌లోని కార్న్‌వాల్ తీరానికి సుమారు 80 కిలోమీటర్ల దూరంలో, అట్లాంటిక్ మహాసముద్రం అడుగున 300 అడుగుల లోతులో దీని శిథిలాలను 'గ్యాస్‌పెరడోస్' (Gasparados) డైవింగ్ బృందం గుర్తించింది. డైవింగ్ బృందం నాయకుడు స్టీవ్ మోర్టిమర్ ఈ అన్వేషణను విజయవంతంగా పూర్తి చేశారు.  నౌకలోని ఇంజిన్ భాగాలు, స్టీరింగ్ యంత్రాలు. ఇతర శిథిలాలను బట్టి అది 'తాంపా' అని నిర్ధారించారు.ఈ ఆవిష్కరణ కేవలం ఒక శిథిలాన్ని కనుగొనడం మాత్రమే కాదు, దేశం కోసం ప్రాణాలర్పించిన 131 మంది వీరుల త్యాగానికి దక్కిన గౌరవం."సముద్రం అడుగున మౌనంగా నిదురిస్తున్న ఈ శిథిలాలు, యుద్ధం వెనుక ఉండే భీభత్సాన్ని, మానవ త్యాగాలను మనకు గుర్తు చేస్తున్నాయి." ఈ శిథిలాల గుర్తింపుతో అమెరికా కోస్ట్‌గార్డ్ చరిత్రలో ఒక అసంపూర్ణ అధ్యాయం ముగిసినట్లయింది. ఆ అమరవీరుల కుటుంబాలకు ఇది ఒక భావోద్వేగపూరితమైన విషయం.