రష్యా-ఇరాన్ ‘వ్యూహాత్మక’ స్నేహం.. అమెరికాకు ముచ్చెమటలు పట్టిస్తున్న 'లియానా' డేటా!

ఇరాన్, రష్యాల మధ్య ఉన్న ఫ్రెండ్షిప్ కేవలం దౌత్యపరమైనది మాత్రమే కాదు, అది అంతరిక్షం నుంచి యుద్ధభూమి వరకు విస్తరించిన బలమైన బంధం. ప్రస్తుత పశ్చిమాసియా యుద్ధంలో కూడా రష్యా ఇరాన్‌కు అండగా చేయదగిన సాయం చేస్తోంది. అమెరికా యుద్ధనౌకల కదలికలపై రష్యా ఇంటెలిజెన్స్ డేటాను ఇరాన్‌కు అందిస్తుండటం అంతర్జాతీయంగా చర్చనీయాంశమవుతోంది. అమెరికా అధ్యక్షుడు ట్రంప్ ఈ సాయాన్ని తక్కువ చేసి చూపుతున్నప్పటికీ, ఇరాన్ విదేశాంగ మంత్రి అబ్బాస్ అరాగ్చీ మాత్రం మాస్కో నుంచి తమకు "మంచి సహకారం" అందుతోందని స్పష్టం చేశారు.

పై నుంచి నిఘా నేత్రం

రష్యాకు చెందిన ‘లియానా’ గూఢచర్య ఉపగ్రహ వ్యవస్థ ఇప్పుడు ఇరాన్‌కు కళ్ళుగా మారింది. సముద్ర గర్భంలో ఉన్న అమెరికా విమానవాహక నౌకలు, ఫైటర్ జెట్‌ల ఖచ్చితమైన స్థానాలను ఈ వ్యవస్థ పసిగట్టి ఇరాన్‌కు చేరవేస్తోంది. దీనికి తోడు, 2022లో రష్యా ప్రయోగించిన ఇరాన్ ఉపగ్రహం ‘ఖయ్యం’ ఒక మీటరు స్పష్టతతో కూడిన చిత్రాలను అందిస్తూ, టెహ్రాన్ క్షిపణి దాడులకు మార్గదర్శిగా నిలుస్తోంది.

ఆయుధాల ఇచ్చిపుచ్చుకోవడం

రష్యా-ఉక్రెయిన్ యుద్ధం మొదలైనప్పటి నుంచి ఈ రెండు దేశాల మధ్య ఆయుధాల మార్పిడి వేగవంతమైంది. ఇరాన్ తన ప్రసిద్ధ షాహిద్ డ్రోన్లు, బాలిస్టిక్ క్షిపణులు, మందుగుండు సామగ్రిని రష్యాకు సరఫరా చేసింది. దానికి బదులుగా రష్యా నుంచి గగనతల రక్షణ వ్యవస్థలు, హెలికాప్టర్లు, నిపుణుల సలహాలను ఇరాన్ పొందుతోంది.

ముఖ్యంగా షాహిద్ డ్రోన్లను రష్యా మరింత ఆధునీకరించి తిరిగి ఇరాన్‌కు అందించడం గమనార్హం.
AI మాడ్యూల్స్: డ్రోన్లలో కృత్రిమ మేధను అమర్చడం.
యాంటీ జామింగ్ కవచం: రష్యా తయారీ 'కామెటా-బి' నేవిగేషన్ మాడ్యూల్ వల్ల ప్రత్యర్థులు ఈ డ్రోన్లను స్తంభింపజేయడం అసాధ్యంగా మారుతోంది.
వ్యూహాత్మక దాడులు: శత్రువుల క్షిపణులను వృథా చేసేందుకు రష్యా నేర్పిన 'డమ్మీ డ్రోన్ల' ఎత్తుగడను ఇరాన్ ఇప్పుడు సమర్థవంతంగా వాడుతోంది.

మాస్కోకు చేకూరుతున్న ఆర్థిక లబ్ధి

పశ్చిమాసియాలో యుద్ధం ముదిరితే రష్యాకు రెండు విధాల లాభం చేకూరుతుంది. మొదటిది, గల్ఫ్ పోరు వల్ల చమురు ధరలు పెరిగి రష్యా ఖజానా నిండుతుంది. రెండోది, అమెరికా దృష్టి ఉక్రెయిన్ నుంచి పశ్చిమాసియాకు మళ్లడం వల్ల రష్యాకు ఉక్రెయిన్ యుద్ధంలో పట్టు లభిస్తుంది. అయితే, రష్యా సాయం పరిమితంగానే ఉందని భావిస్తున్న ఇరాన్, యుద్ధాన్ని పొరుగు దేశాలకు విస్తరించడం ద్వారా ప్రపంచ ఆర్థిక వ్యవస్థను దెబ్బతీసి, చమురు ధరలను మరింత పెంచే వ్యూహంతో ముందుకు వెళుతోంది. ఈ పరిణామాలు అగ్రరాజ్యం అమెరికాకు పెను సవాలుగా మారాయి.