భారత్‌లో మళ్లీ చమురు కష్టాలు.. ఇందిరా గాంధీ మాస్టర్ ప్లాన్‌తో సేఫ్?

ప్రస్తుతం పశ్చిమాసియాలోని హోర్ముజ్ జలసంధి దగ్గర యుద్ధ వాతావరణం నెలకొంది. ఇరాన్, అమెరికా దేశాల మధ్య ఉద్రిక్తతలు చెలరేగడంతో ప్రపంచం మొత్తానికి చమురు సరఫరా చేసే ఈ మార్గం మూతపడే ప్రమాదం ఉంది. దీనివల్ల భారత్‌కు కూడా ఇంధనం సరిగ్గా అందక దేశంలో ధరలు పెరిగే అవకాశం ఉంది. ప్రస్తుతం హోర్ముజ్ జలసంధి వద్ద అమెరికా-ఇరాన్ ఉద్రిక్తతల వల్ల ప్రపంచవ్యాప్తంగా చమురు సరఫరాకు ఆటంకం ఏర్పడింది. 

ఇలాంటి కష్ట పరిస్థితుల్లో భారత్ తన ఇంధన అవసరాల కోసం ప్రపంచంలోనే అత్యధిక చమురు నిల్వలు ఉన్న వెనిజులా వైపు చూస్తోంది. ఈ క్రమంలో వెనిజులా తాత్కాలిక అధ్యక్షురాలు డెల్సీ రోడ్రిగ్జ్ ఐదు రోజుల భారత పర్యటనకు రావడం అత్యంత కీలకంగా మారింది. ఆమె తన బృందంతో కలిసి ప్రధానమంత్రి నరేంద్ర మోదీతో చర్చలు జరపనున్నారు. ఇంధనం, వాణిజ్యం, ఔషధాలు, రవాణా రంగాల్లో సహకారాన్ని పెంచుకోవాలని భావిస్తోంది. మన దేశం తన చమురు అవసరాల్లో సుమారు 85 శాతాన్ని దిగుమతి చేసుకుంటుంది. ముఖ్యంగా పశ్చిమ ఆసియా నుండి వచ్చే చమురుపైనే మనం ఎక్కువగా ఆధారపడుతున్నాం. అయితే హోర్ముజ్ జలసంధి ప్రాంతంలో నెలకొన్న అశాంతి వల్ల చమురు లభ్యత తగ్గడమే కాకుండా ధరలు పెరిగే ప్రమాదం ఉంది. గతంలో వెనిజులా భారత్‌కు ప్రధాన చమురు సరఫరాదారుగా ఉండేది.

ఇప్పుడు ఆ దేశం మళ్లీ భారత్‌కు సపోర్ట్‌గా నిలవనుంది. అయితే 1968లో అప్పటి భారత ప్రధాని ఇందిరా గాంధీ కారకాస్ నగరాన్ని సందర్శించారు. వెనిజులాలో పర్యటించిన మొదటి భారత ప్రధాని ఆమెనే. ఆనాడు ఆమె నెలకొల్పిన బలమైన దౌత్య, ఆర్థిక సంబంధాలు నేటికీ ఇరు దేశాల మధ్య విశ్వాసాన్ని పెంచాయి. వెనిజులాలో చమురు నిల్వలు అపారంగా ఉన్నప్పటికీ.. గతంలో రాజకీయ అస్థిరత, అంతర్జాతీయ ఆంక్షల వల్ల ఆ దేశం పూర్తిస్థాయిలో ఉత్పత్తి చేయలేకపోయింది. కానీ ఇప్పుడు పరిస్థితులు మారుతున్నాయి. ఇప్పటికే రష్యా వంటి దేశాలపై ఆంక్షలు ఉండటం, పశ్చిమ ఆసియాలో సంక్షోభం కొనసాగుతుండటంతో, భారత్ తన ఇంధన వనరులను వైవిధ్యపరచుకోవాలని నిర్ణయించుకుంది. వెనిజులాతో కలిసి కేవలం చమురు వ్యాపారమే కాకుండా, ఔషధ తయారీ, పునరుత్పాదక ఇంధనం వంటి రంగాల్లో కూడా కలిసి పనిచేసే దిశగా భారత్ అడుగులు వేస్తోంది.