/rtv/media/media_files/2026/06/16/latest-news-2026-06-16-17-54-52.jpg)
Gunshots in New York's Times Square
Follow Us
Times Square : అమెరికా బాస్కెట్బాల్ చరిత్రలో సరికొత్త రికార్డు సృష్టించిన న్యూయార్క్ నిక్స్ (New York Knicks) జట్టు సాధించిన అద్భుత విజయం.. న్యూయార్క్ నగరంలో తీవ్ర విషాదాన్ని, హింసను నింపింది. నేషనల్ బాస్కేట్బాల్ అసోసియేషన్ (NBA) ఫైనల్స్లో భాగంగా సాన్ ఆంటోనియో స్పర్స్ను ఓడించి, ఏకంగా 1973 తర్వాత అంటే దాదాపు 53 ఏళ్ల సుదీర్ఘ నిరీక్షణకు తెరదించుతూ నిక్స్ జట్టు ఛాంపియన్షిప్ను కైవసం చేసుకుంది. ఈ చారిత్రాత్మక విజయంతో పులకించిపోయిన అభిమానుల సంబరాలు అర్ధరాత్రి దాటాక ఒక్కసారిగా హింసాత్మకంగా మారి, నగరాన్ని భయాందోళనల్లోకి నెట్టేశాయి.
MUH CRIME IS DOWN .........
— PATTERN RECOGNITION LAB (@ItsMrsWilkes) June 14, 2026
Chaos erupted in Times Square as bystanders sprinted for cover while gunshots rang out. At least one person was shot, with multiple others stabbed and assaulted amid the panic. It was an absolutely wild and chaotic night in New York. pic.twitter.com/J1GINOZaNu
ప్రపంచ ప్రసిద్ధ పర్యాటక కేంద్రమైన న్యూయార్క్ టైమ్స్ స్క్వేర్ (Times Square) వద్ద వేలాది మంది అభిమానులు అర్ధరాత్రి భారీగా చేరుకుని విజయోత్సవాలు జరుపుకుంటున్నారు. ఈ క్రమంలో 42వ స్ట్రీట్ బ్రాడ్వే జంక్షన్ వద్ద అల్లరి మూకల మధ్య ఘర్షణ చెలరేగి, ఒక్కసారిగా కాల్పులు చోటుచేసుకున్నాయి. తుపాకీ శబ్దాలతో వినిపించడంతో ప్రాణభయంతో ప్రజలు రోడ్లపై పరుగులు తీశారు. ఈ తూటా పేలుళ్ల ఘటనలో 17 ఏళ్ల బాలుడు కాలికి తీవ్ర గాయంతో ఆసుపత్రిలో చేరాడు. అంతర్జాతీయ మీడియా సమాచారం ప్రకారం, ఈ ఘర్షణల తరుణంలో నలుగురు వ్యక్తులు కత్తిపోట్లకు గురికాగా, పదుల సంఖ్యలో ప్రజలు తొక్కిసలాట, దాడుల వల్ల గాయపడ్డారు.
విజయోత్సవాల ఆనందం కాస్తా అల్లరి మూకల చేతుల్లోకి వెళ్లడంతో తీవ్ర విధ్వంసానికి దారితీసింది. ఉన్మాదంతో ఊగిపోయిన కొందరు వ్యక్తులు బేస్బాల్ బ్యాట్లతో పోలీసు వాహనాలను, రోడ్డు పక్కన ఉన్న కార్లను ధ్వంసం చేశారు. ప్రపంచకప్ మ్యాచ్ల కోసం ప్రత్యేకంగా నిలిపిన స్కూల్ బస్సులపైకి ఎక్కి కొందరు యువకులు అల్లర్లకు పాల్పడటమే కాకుండా, కొన్ని వాహనాలకు నిప్పంటించారు. శాంతిభద్రతలను అదుపులోకి తెచ్చేందుకు ప్రయత్నించిన పోలీసు సిబ్బందిపై అల్లరి మూకలు రాళ్లు, ఇతర వస్తువులతో దాడులకు తెగబడ్డారు. ఈ దాడుల్లో 10 మంది పోలీసు అధికారులు తీవ్రంగా గాయపడ్డారు.
ఘటనా స్థలానికి భారీగా చేరుకున్న సాయుధ పోలీసులు చాకచక్యంగా వ్యవహరించి ముగ్గురు ప్రధాన అనుమానితులను నిర్బంధంలోకి తీసుకుని, వారి వద్ద నుండి లైసెన్స్ లేని తుపాకులను స్వాధీనం చేసుకున్నారు. ఈ హింసాత్మక ఘటనలకు సంబంధించి ఇప్పటివరకు మొత్తం 63 మందిని పోలీసులు అరెస్ట్ చేశారు. వారిపై పోలీసులపై దాడి చేయడం, అక్రమ ఆయుధాలు కలిగి ఉండటం, ప్రభుత్వ ఆస్తులను ధ్వంసం చేయడం, శాంతిభద్రతలకు భంగం కలిగించడం వంటి పలు తీవ్రమైన సెక్షన్ల కింద కేసులు నమోదు చేశారు. ఈ ఘోర ఘర్షణలకు సంబంధించిన భయానక దృశ్యాలు ప్రస్తుతం సోషల్ మీడియాలో వైరల్గా మారాయి.
యావత్ అమెరికాను ఊపేసిన ఈ అల్లర్ల నేపథ్యంలో న్యూయార్క్ నగర పోలీస్ శాఖ (NYPD) మరింత అప్రమత్తమైంది. ఎన్బీఏ ఛాంపియన్షిప్ గెలిచిన నిక్స్ జట్టు గౌరవార్థం రాబోయే గురువారం నాడు నగరంలో భారీ ఎత్తున అధికారిక విజయోత్సవ పరేడ్ (Victory Parade) నిర్వహించాల్సి ఉంది. ఈ పరేడ్ను వీక్షించేందుకు లక్షలాది మంది ప్రజలు వచ్చే అవకాశం ఉండటంతో, ఎలాంటి అవాంఛనీయ సంఘటనలు జరగకుండా నగరం అంతటా భద్రతను అసాధారణంగా కట్టుదిట్టం చేశారు. టైమ్స్ స్క్వేర్ మరియు పరిసర ప్రాంతాలలో అదనపు బలగాలను మోహరించి నిఘా ఉంచారు.
