భారీగా పెరిగిన కీరా దోస ధరలు.. కిలో రూ.358 పెట్టి కొంటున్న రష్యన్లు

సాధారణంగా మన దగ్గర దోసకాయ ధరలు పెరిగితే పెద్దగా చర్చ జరగదు. కానీ, ప్రస్తుతం రష్యాలో కీరా దోసకాయ ధరలు ఆ దేశ ప్రభుత్వాన్ని ఉక్కిరిబిక్కిరి చేస్తున్నాయి. నిత్యావసర వస్తువుల ధరల పెరుగుదలతో ఇప్పటికే సతమతమవుతున్న రష్యన్లకు, ఇప్పుడు కీరా ధరలు చుక్కలు చూపిస్తున్నాయి. ఎంతలా అంటే.. అక్కడ కేజీ దోసకాయ ధర మన భారతీయ కరెన్సీలో సుమారు రూ. 358 (300 రూబుల్స్) కు చేరుకుంది.

Читал про огурцы и ананасы в телеграм. Не поверил. Пошёл в продуктовый у дома… Ну, прям в какую-то Чунгу-Чангу превращаемся
Николай Травкин pic.twitter.com/VNRAN1YJ8K

— миллиард казахстанцев (@S8gy2AEgVRHyS2Q) February 18, 2026

ధరల పెరుగుదలకు కారణాలు..

రష్యాలో కీరా దోసకాయల ధరలు ఇంతలా పెరగడానికి భౌగోళిక మరియు ఆర్థిక కారణాలు ఉన్నాయి.
శీతాకాల ప్రభావం: ప్రస్తుతం రష్యాలో కఠినమైన శీతాకాలం నడుస్తోంది. ఈ సీజన్‌లో దోసకాయల ఉత్పత్తి భారీగా తగ్గుతుంది.
సాగు వ్యయం: గడ్డకట్టే చలిలో గ్రీన్‌హౌస్ సాగు చేయాలంటే భారీగా విద్యుత్తు, వేడిని ఇచ్చే యంత్రాలు అవసరం. దీనివల్ల ఉత్పత్తి వ్యయం పెరిగి, అది వినియోగదారులపై భారంగా మారుతోంది.
పరిమిత సరఫరా: ధరలు పెరగడమే కాకుండా, కొన్ని ప్రాంతాల్లో దోసకాయల కొనుగోలుపై ప్రభుత్వం పరిమితులు కూడా విధించింది.

సామాన్యుడిపై ఆర్థిక భారం

రష్యన్ల రోజువారీ ఆహారంలో, ముఖ్యంగా వారు ఇష్టంగా తినే సలాడ్లలో దోసకాయ అంతర్భాగం. గత డిసెంబర్ నుంచి ధరలు దాదాపు రెండు నుంచి మూడు రెట్లు పెరగడంతో ప్రజలు తీవ్ర ఆగ్రహం వ్యక్తం చేస్తున్నారు. ఆశ్చర్యకరమైన విషయం ఏమిటంటే, విదేశాల నుంచి దిగుమతి చేసుకునే అరటిపండ్ల కంటే, దేశీయంగా పండించే కీరా దోసకాయల ధరలే ఇప్పుడు అక్కడ ఎక్కువగా ఉన్నాయి.

ఈ పరిస్థితి తీవ్రతను గమనించిన ఒక స్థానిక దినపత్రిక, ప్రజలకు ఉపశమనం కలిగించేందుకు ప్రతిరోజూ పేపర్‌తో పాటు దోస విత్తనాలను కూడా ఉచితంగా సరఫరా చేస్తోందంటే పరిస్థితి ఎంత విచిత్రంగా ఉందో అర్థం చేసుకోవచ్చు.

యుద్ధం, ద్రవ్యోల్బణం
ఉక్రెయిన్ యుద్ధం నేపథ్యంలో రష్యా ఆర్థిక వ్యవస్థ ఇప్పటికే ఒడిదుడుకులను ఎదుర్కొంటోంది. పెరుగుతున్న పెట్రోల్ ధరలు, కరెంట్ బిల్లులు, ఇంటి నిర్వహణ ఖర్చులకు తోడు ఇటీవల వ్యాట్ (VAT) కూడా పెంచారు. దీనివల్ల ద్రవ్యోల్బణం పెరిగి అన్ని నిత్యావసరాల ధరలు ఆకాశాన్ని తాకుతున్నాయి.

ప్రభుత్వ హామీ

ప్రజల నుంచి వస్తున్న నిరసనలపై అక్కడి నాయకులు స్పందిస్తూ.. మరో నెల రోజుల్లో ఉష్ణోగ్రతలు పెరుగుతాయని, అప్పుడు ఉత్పత్తి పెరిగి ధరలు అందుబాటులోకి వస్తాయని సర్దిచెప్పే ప్రయత్నం చేస్తున్నారు. అయితే, నిత్యం తినే దోసకాయ కోసం ఇంత భారీగా ఖర్చు చేయాల్సి రావడంపై రష్యా సామాన్యుడు రగిలిపోతున్నాడు.