White House : వైట్ హౌజ్ సమీపంలో మరోసారి కాల్పుల కలకలం..స్పాట్ లొ డొనాల్డ్ ట్రంప్

White House : అమెరికా రాజధాని వాషింగ్టన్ డీసీలో మరోసారి భద్రతా వైఫల్యం కలకలం సృష్టించింది.  అమెరికా అధ్యక్షుడు డొనాల్డ్ ట్రంప్ భద్రతలో మరోసారి భారీ లోపం బయటపడింది. సోమవారం మధ్యాహ్నం శ్వేతసౌధం (వైట్‌హౌస్) సమీపంలో ఓ సాయుధుడు భద్రతా బలగాలపై కాల్పులకు దిగడం అంతర్జాతీయ స్థాయిలో చర్చనీయాంశమైంది.  

సోమవారం మధ్యాహ్నం సుమారు 3 గంటల సమయంలో శ్వేతసౌధం వెలుపల గస్తీ కాస్తున్న యూఎస్ సీక్రెట్ సర్వీస్ (USSS) ఏజెంట్లు ఒక అనుమానిత వ్యక్తిని గుర్తించారు. అతని వద్ద ఆయుధం ఉన్నట్లు గమనించి ప్రశ్నించేందుకు ప్రయత్నించగా, ఆ దుండగుడు పారిపోతూ అధికారులపై కాల్పులు జరిపాడు. ప్రతిస్పందనగా సీక్రెట్ సర్వీస్ ఏజెంట్లు కూడా ఎదురుకాల్పులు జరిపారు. ఈ కాల్పుల్లో నిందితుడు గాయపడటంతో అతడిని వెంటనే అదుపులోకి తీసుకుని చికిత్స కోసం ఆసుపత్రికి తరలించారు. ఈ పెనుగులాటలో ఒక పౌరుడు (మైనర్) కూడా స్వల్పంగా గాయపడినట్లు సమాచారం.

కాల్పులు జరిగిన సమయంలో అధ్యక్షుడు డొనాల్డ్ ట్రంప్ వైట్‌హౌస్‌లోనే ఉన్నారు. కాల్పుల శబ్దం వినిపించగానే అప్రమత్తమైన భద్రతా సిబ్బంది వెనువెంటనే వైట్‌హౌస్‌ను లాక్‌డౌన్ చేశారు. బయట ఉన్న మీడియా ప్రతినిధులను సురక్షిత ప్రాంతాలకు తరలించి, శ్వేతసౌధం పరిసరాల్లోని రహదారులను మూసివేశారు. పరిస్థితిని సమీక్షించిన అనంతరం కొద్దిసేపటికి లాక్‌డౌన్‌ను ఎత్తివేసినప్పటికీ, భారీగా సాయుధ బలగాలను మోహరించారు.ఈ ఘటనలో మరో కీలక అంశం ఏమిటంటే, కాల్పులు జరిగిన ప్రాంతం నుండి ఉపాధ్యక్షుడు జేడీ వాన్స్ కాన్వాయ్ వెళ్లిన కొద్ది నిమిషాలకే ఈ దాడి జరిగింది. అయితే, నిందితుడు ఉపాధ్యక్షుడిని లక్ష్యంగా చేసుకున్నట్లు ఎటువంటి ఆధారాలు లేవని సీక్రెట్ సర్వీస్ డిప్యూటీ డైరెక్టర్ మాథ్యూ క్విన్ స్పష్టం చేశారు. కేవలం భద్రతా బలగాలను చూసి భయపడి నిందితుడు కాల్పులు జరిపాడా లేక దీని వెనుక ఏదైనా కుట్ర ఉందా అనే కోణంలో దర్యాప్తు చేస్తున్నారు.

ఇటీవల (ఏప్రిల్ 25, 2026) వాషింగ్టన్ హిల్‌టన్ హోటల్‌లో జరిగిన వైట్‌హౌస్ కరస్పాండెంట్స్ డిన్నర్ (WHCD) సమయంలో కూడా కాల్పుల ఘటన చోటుచేసుకుంది. ఆ సమయంలో ట్రంప్, మెలానియా, జేడీ వాన్స్, రక్షణ మంత్రి పీట్ హెగ్సెత్ వంటి కీలక నేతలందరూ అక్కడే ఉన్నారు. కోల్ టోమస్ అలెన్ అనే వ్యక్తి జరిపిన ఆ కాల్పుల ఘటనతో తాజా ఘటనకు ఏదైనా సంబంధం ఉందా అని అధికారులు ఆరా తీస్తున్నారు. వరుసగా వైట్‌హౌస్ లో   ప్రముఖులు ఉన్న సమయంలో  ఇటువంటి సంఘటనలు జరగడం భద్రతా వ్యవస్థపై ఒత్తిడిని పెంచుతోంది.
 
ప్రస్తుతం నిందితుడిని ఆసుపత్రిలో వైద్యుల పర్యవేక్షణలో ఉంచారు. కోలుకున్న వెంటనే అతడిని విచారించనున్నారు. ఎఫ్‌బీఐ (FBI), స్థానిక పోలీసులు సమన్వయంతో ఈ కేసును విచారిస్తున్నారు. వాషింగ్టన్ డీసీలోని అత్యంత సురక్షితమైన జోన్లలో ఒకటైన ఈ ప్రాంతంలో ఆయుధంతో దుండగుడు ఎలా రాగలిగాడు అన్నది ఇప్పుడు ప్రధాన ప్రశ్నగా మారింది.