War: రోజుకు రూ.8,455 కోట్లు, సెకనుకు 10 వేల డాలర్లు అమెరికా ఖర్చు.. ట్రంప్ ప్లాన్ ఏంటి?

War: ప్రపంచం మరో భారీ యుద్ధానికి సాక్ష్యంగా నిలుస్తోంది. ఇరాన్‌పై అమెరికా సాగిస్తున్న దాడులు ఆర్థికంగా పెను భారంగా మారుతున్నాయి. స్టాక్‌హోమ్ ఇంటర్నేషనల్ పీస్ రీసెర్చ్ ఇన్‌స్టిట్యూట్ (SIPRI) వెల్లడించిన తాజా గణాంకాలు చూస్తుంటే కళ్లు బైర్లు కమ్మడం ఖాయం. అమెరికా ఈ యుద్ధం కోసం ప్రతి సెకనుకు $10,300 (సుమారు రూ.9.8 లక్షలు) ఖర్చు చేస్తోంది. అంటే కనురెప్ప వేసి తీసేలోపు పది లక్షల రూపాయల ప్రజాధనం బూడిదలో పోసిన పన్నీరవుతోంది.

31 రోజులు.. 2.63 లక్షల కోట్లు!

ఫిబ్రవరి 28న ప్రారంభమైన ఈ యుద్ధం నేటికి 31వ రోజుకు చేరుకుంది. ఈ స్వల్ప కాలంలోనే అమెరికా ట్యాక్స్ పేయర్ల సొమ్ము $27.68 బిలియన్లు (సుమారు రూ. 2.63 లక్షల కోట్లు) ఖర్చయిందని సిప్రి డేటా పేర్కొంది. అధ్యక్షుడు డొనాల్డ్ ట్రంప్ హయాంలో జరుగుతున్న ఈ దాడులకు రోజుకు సగటున 890 మిలియన్ డాలర్లు వెచ్చిస్తున్నారు.

ఖర్చు ఎక్కడెక్కడంటే? 

యుద్ధం అంటే కేవలం తుపాకులు మాత్రమే కాదు, దాని వెనుక భారీ లాజిస్టిక్స్ ఉంటుంది. 
ఆయుధాలు & క్షిపణులు (36%): టోమాహాక్ క్రూయిజ్ క్షిపణులు, బాంబుల కోసం రోజుకు $320 మిలియన్లు.
ఎయిర్ ఫోర్స్ (27.5%): యుద్ధ విమానాలు, గగనతల ఇంధన నింపుడు మిషన్ల కోసం రోజుకు $245 మిలియన్లు.
నౌకాదళం: సముద్రంలో మోహరించిన క్యారియర్ స్ట్రైక్ గ్రూపుల కోసం రోజుకు $155 మిలియన్లు.
క్షిపణి రక్షణ: థాడ్, పేట్రియాట్ వంటి వ్యవస్థల నిర్వహణకు రోజుకు $95 మిలియన్లు.
నిఘా & సైబర్: శాటిలైట్ చిత్రాలు, నిఘా కోసం $45 మిలియన్లు.
సిబ్బంది: సైనికుల భత్యాలు, లాజిస్టిక్స్ కోసం $30 మిలియన్లు.

అరబ్ దేశాలపై ట్రంప్ కన్ను!

ఈ భారీ వ్యయాన్ని తగ్గించుకోవడానికి ట్రంప్ ప్రభుత్వం ఒక పాత వ్యూహాన్ని అమలు చేయాలని చూస్తోంది. 1990 గల్ఫ్ యుద్ధ సమయంలో ఇతర దేశాలు అమెరికాకు ఆర్థిక సాయం చేసినట్లుగా, ఇప్పుడు కూడా అరబ్ దేశాలు ఈ యుద్ధ ఖర్చును భరించాలని ట్రంప్ డిమాండ్ చేసే అవకాశం ఉంది. వైట్ హౌస్ ప్రెస్ సెక్రటరీ కరోలిన్ లీవిట్ మాట్లాడుతూ, "అధ్యక్షుడు ఆ దేశాలను భాగస్వామ్యం చేయడంలో ఆసక్తిగా ఉన్నారు" అని సంకేతాలిచ్చారు. అయితే, ఈసారి అమెరికా-ఇజ్రాయెల్ ఏకపక్షంగా యుద్ధానికి దిగడం గమనార్హం.

ఇరాన్ షరతులు - ప్రతీకార దాడులు
యుద్ధం వల్ల జరుగుతున్న నష్టానికి అమెరికా పరిహారం చెల్లించాలని, అప్పుడే చర్చలకు వస్తామని ఇరాన్ తెగేసి చెప్పింది. మరోవైపు, మధ్యప్రాచ్యంలోని అమెరికా సైనిక స్థావరాలపై ఇరాన్ డ్రోన్లు, క్షిపణులతో ప్రతీకార దాడులు చేస్తోంది. యుద్ధం ముగిసే సూచనలు కనిపించకపోవడంతో, ఈ ఖర్చు అంకెలు రాబోయే రోజుల్లో మరింత ఆందోళనకరంగా మారేలా ఉన్నాయి.