Hyderabad: ట్యూషన్‌కు వెళ్లడం ఇష్టంలేక బాలిక సూసైడ్

హైదరాబాద్‌లోని చందనగర్‌లో దారుణం చోటు చేసుకుంది. ట్యూషన్‌కు వెళ్లడం ఇష్టంలేక బాలిక ఆత్మహత్య చేసుకుంది. 6వ తరగతి చదవుతున్న ఆహన (12) నల్లగండ్ల అపర్ణ సరోవర్‌లో నివాసం ఉంటుంది. స్థానికంగా ఉన్న గ్లెన్డేల్ అకాడమి స్కూల్‌లో చదువుతుంది. పాఠశాల అనంతరం బాలిక ఇంటికి వచ్చింది . బాలికను మ్యాథ్స్‌ ట్యూషన్‌కు వెళ్లాలని తల్లిదండ్రులు చెప్పారు. దీనికి బాలిక తాను వెళ్లను అని తెగేసి చెప్పింది. దీంతో బాలికపై తల్లి ఒత్తిడి తీసుకురావడంతో బాలిక 15వ అంతాస్థులోని కిటికీ నుంచి దూకి ఆత్మహత్య చేసుకుంది.

తమ కూతురు రక్తపు మడుగుల్లో పడి ఉండటాన్ని గమనించిన తల్లిదండ్రులు బోరున విలపించారు. స్థానికులు పోలీసులకు సమాచారం ఇచ్చారు. దీంతో రంగంలోకి దిగిన పోలీసులు బాలిక మృతిపై ఆరా తీశారు. మృతురాలి తండ్రి సందీప్ ఫిర్యాదుతో కేసు నమోదు చేసుకున్న పోలీసులు దర్యాప్తు ప్రారంభించారు. కాగా బాలికను అదే కమ్యూనిటీలోని 15 అంతస్థులో మ్యాథ్స్ టూషన్‌లో జాయిన్‌ చేశారు. కాగా బాలిక గత కొన్ని రోజుల నుంచి ట్యూషన్‌కు వెళ్లనని మారం చేస్తున్నట్లు బాలిక కుటుంబ సభ్యులు తెలిపారు. బాలికపై తల్లిదండ్రులు ఒత్తిడి తీసుకురావద్దని పోలీసులు సూచిస్తున్నారు. చిన్నారులు ఏమీ ఆలోచించకుండా క్షణికావేశంతో ప్రాణాలు తీసుకుంటున్నారన్నారు.