Prabhas Kalki 2: ప్రభాస్ 'కల్కి 2'కి కష్టకాలం.. టెన్షన్ పడుతోన్న ఫ్యాన్స్!

Prabhas Kalki 2: కల్కి 2898 AD సినిమా ప్రేక్షకుల్లో భారీ స్థాయిలో క్రేజ్ సంపాదించుకుంది. సాధారణంగా ఒక సినిమా సీక్వెల్ రావడానికి ఎక్కువ సమయం తీసుకుంటే ప్రేక్షకుల ఆసక్తి తగ్గిపోతుంది. కానీ కల్కి 2 విషయంలో మాత్రం పరిస్థితి పూర్తిగా భిన్నంగా కనిపిస్తోంది. ఎలాంటి అధికారిక అప్‌డేట్స్ లేకపోయినా ఈ సినిమాపై అభిమానుల్లో ఆసక్తి మాత్రం అలాగే కొనసాగుతోంది.

దీనికి ప్రధాన కారణం దర్శకుడు నాగ్ అశ్విన్ Nag Ashwin మొదటి భాగంలో చూపించిన కథ, ఎమోషన్స్, భారీ విజువల్ ప్రపంచం అని చెప్పాలి. అలాగే సినిమాలో ఉన్న స్టార్ క్యాస్టింగ్ కూడా హైప్‌ను మరింత పెంచుతోంది. ముఖ్యంగా ప్రభాస్ Prabhas, అమితాబ్ బచ్చన్ Amitabh Bachchan, కమల్ హాసన్ Kamal Haasan వంటి పెద్ద నటులు ఉండటంతో ప్రేక్షకులు సీక్వెల్ కోసం ఎంతో ఆసక్తిగా ఎదురుచూస్తున్నారు.

ప్రస్తుతం నాగ్ అశ్విన్ కల్కి 2కు సంబంధించిన కొన్ని కీలక సన్నివేశాలను అమితాబ్ బచ్చన్, కమల్ హాసన్‌లతో చిత్రీకరిస్తున్నట్టు సమాచారం. అయితే ప్రభాస్ మాత్రం ఇంకా షూటింగ్‌లో చేరలేదు. ప్రస్తుతం ఆయన ఫౌజీ Fauzi, స్పిరిట్ Spirit సినిమాలతో బిజీగా ఉన్నారు.

ఇక కల్కి 2ను 2027లో విడుదల చేయాలని నిర్మాతలు ప్లాన్ చేస్తున్నారని టాలీవుడ్‌లో వార్తలు వినిపిస్తున్నాయి. ముఖ్యంగా 2027 డిసెంబర్‌ను రిలీజ్ టార్గెట్‌గా భావిస్తున్నట్టు సమాచారం. నాగ్ అశ్విన్ వచ్చే ఏడాది జూన్ నాటికి షూటింగ్ పూర్తి చేసి, ఆ తర్వాత పోస్ట్ ప్రొడక్షన్ పనులపై పూర్తి దృష్టి పెట్టాలని భావిస్తున్నారట.

అయితే ప్రస్తుతం ఉన్న పరిస్థితులు చూస్తే 2027లో సినిమా విడుదల కావడం అంత ఈజీ కాదనే అభిప్రాయాలు వినిపిస్తున్నాయి. ఎందుకంటే ప్రభాస్ ఇంకా షూటింగ్ ప్రారంభించలేదు. అలాగే చాలా భాగం షూటింగ్ మిగిలి ఉండటంతో పాటు, ఈ స్థాయి భారీ విజువల్ సినిమాకు పోస్ట్ ప్రొడక్షన్‌కే కనీసం ఆరు నెలల కంటే ఎక్కువ సమయం పట్టే అవకాశం ఉంది.

నాగ్ అశ్విన్ కూడా త్వరపడకుండా మంచి అవుట్‌పుట్ కోసం సమయం తీసుకునే దర్శకుడిగా పేరుంది. అందుకే ప్రపంచ స్థాయి విజువల్స్‌తో సినిమాను పర్ఫెక్ట్‌గా తీసుకురావాలంటే మరింత సమయం అవసరం కావచ్చు. దీంతో కల్కి 2 నిజంగా 2027లో ప్రేక్షకుల ముందుకు వస్తుందా లేదా అనే సందేహం ఇప్పుడు అభిమానుల్లో మొదలైంది.