Gyaneshwari : తుని పాప జ్ఞానేశ్వరి కేసులో బిగ్ ట్విస్ట్ ...కిడ్నాప్ కోణంలో దర్యాప్తు!

Gyaneshwari : కాకినాడ జిల్లా తుని మండలం దొండవాక పంచాయతీ సీహెచ్‌ అగ్రహారానికి చెందిన రెండేళ్ల చిన్నారి జ్ఞానేశ్వరి అదృశ్యం కేసు రోజుకో మలుపు తిరుగుతోంది. పాప కనిపించకుండా పోయి 6 రోజులు గడుస్తున్నా ఇప్పటివరకు ఎలాంటి ఆచూకీ లభించకపోవడంతో అటు కుటుంబ సభ్యుల్లో, ఇటు ప్రజల్లో తీవ్ర ఆందోళన వ్యక్తమవుతోంది. ఈ నేపథ్యంలోనే కేసును ప్రతిష్ఠాత్మకంగా తీసుకున్న పోలీసులు తమ దర్యాప్తును వేగవంతం చేస్తూ సరికొత్తగా 'ప్లాన్-బి'ని అమలు చేయడం ప్రారంభించారు. ప్రస్తుతం ఈ కేసును పూర్తిగా కిడ్నాప్ కోణంలో విచారిస్తున్నారు.

ఈ మిస్టరీ కేసులో చిన్నారి తల్లి భవానీ ఇచ్చిన స్టేట్మెంట్ ఇప్పుడు అత్యంత కీలకంగా మారింది. గత జనవరి నెలలో ఒక కారు విషయంలో తన భర్తకు కొందరితో పెద్ద గొడవ జరిగిందని ఆమె పోలీసులకు వెల్లడించారు. ఆ సమయంలో ఐదుగురు వ్యక్తులు వచ్చి తన భర్తను చంపేస్తామని తీవ్రంగా బెదిరించారని ఆమె పేర్కొన్నారు. అంతటితో ఆగకుండా, ఆ బెదిరింపులు జరిగిన కొద్దిరోజులకే ముఖాలకు మాస్కులు ధరించిన ఇద్దరు గుర్తుతెలియని దుండగులు తమ ఇంటి చుట్టూ రెక్కీ నిర్వహించారని భవానీ తెలపడంతో, కారు కోసం గొడవ పడిన ఆ వ్యక్తులే ప్లాన్ ప్రకారం చిన్నారిని కిడ్నాప్ చేసి ఉంటారనే అనుమానాలు బలపడుతున్నాయి.

సాధారణంగా ఇంత చిన్న వయసున్న చిన్నారులు పూర్తిగా పరిచయం ఉన్నవారైతేనే వారి వెంట వెళ్లే అవకాశం ఉంటుంది. అందువల్ల ఈ కిడ్నాప్ వ్యవహారం కుటుంబానికి బాగా తెలిసినవాళ్ల పనే అయి ఉంటుందని పోలీసులు గట్టిగా అనుమానిస్తున్నారు. ఇందులో భాగంగానే పాత కక్షల నేపథ్యంలో గొడవ పెట్టుకున్న ఆ వ్యక్తులను పట్టుకునేందుకు పోలీసులు ప్రత్యేక బృందాలతో గాలింపు చర్యలు చేపట్టారు. దీనితో పాటు పాప కుటుంబ సభ్యులు, బంధువుల యొక్క కాల్ డేటాను కూడా పోలీసులు క్షుణ్ణంగా పరిశీలిస్తున్నారు.

మరోవైపు, పాప అదృశ్యమైన మొదటి 2 నుండి 3 గంటల వ్యవధిలో అసలు ఏం జరిగింది? అనే అంశంపై పోలీసులు గట్టిగా ఫోకస్ పెట్టారు. ఎందుకంటే, గ్రామ పరిధిలో ఉన్న సీసీటీవీ (CCTV) ఫుటేజీలను పరిశీలించినప్పటికీ ఎక్కడా చిన్నారి ఆనవాళ్లు దొరకకపోవడం అనేక అనుమానాలకు తావిస్తోంది. సీసీ కెమెరాలకు చిక్కకుండా చిన్నారిని ఎక్కడికైనా తరలించారా, లేదా స్థానికంగానే ఎక్కడైనా దాచారా అనే కోణంలో శాస్త్రీయ పద్ధతుల్లో విచారణ జరుపుతున్నారు. ఈ సున్నితమైన ఉదంతంపై ముఖ్యమంత్రి కార్యాలయం (CMO) కూడా ప్రత్యేక దృష్టి సారించి, ఎప్పటికప్పుడు పరిస్థితిని ఆరా తీస్తోంది.

ఇదిలా ఉంటే, ఈ కేసులో ఊహించని విధంగా ఒక పెంపుడు కుక్క కీలక క్లూగా మారింది. గత శనివారం బాలికతో పాటే కనిపించకుండా పోయిన ఈ శునకం, మంగళవారం మధ్యాహ్నం అకస్మాత్తుగా తోటలోని మకాం వద్దకు తిరిగి వచ్చింది. అయితే అక్కడ భారీగా ఉన్న పోలీసులు, జనాన్ని చూసి భయపడి అది మళ్లీ పారిపోవడానికి ప్రయత్నించింది. ఐదు రోజుల పాటు చిన్నారి ఎక్కడ ఉందో ఈ కుక్కకు తెలిసి ఉండే అవకాశం ఉందని భావించిన పోలీసులు, ఉత్తరప్రదేశ్‌కు చెందిన కొందరు యువకుల సహాయంతో చాకచక్యంగా ఆ శునకాన్ని పట్టుకున్నారు.

ప్రస్తుతం తీవ్ర ఆందోళనతో రౌద్రంగా ఉన్న ఆ కుక్కను శాంతపరిచేందుకు చిన్నారి తల్లిదండ్రులు, డాగ్ ట్రైనర్లు ప్రయత్నిస్తున్నారు. ఈ ఐదు రోజులు ఆ కుక్క ఏయే ప్రాంతాల్లో తిరిగింది అనేది గుర్తిస్తే పాప ఆచూకీ దొరుకుతుందని పోలీసులు అంచనా వేస్తున్నారు. ఇందులో భాగంగానే ఆ కుక్కకు జీపీఎస్ (GPS) పరికరాన్ని అమర్చి, బాలిక తండ్రితో పాటు వెనుక పోలీస్ జాగిలాలను పంపడం ద్వారా తోట పరిసర ప్రాంతాల్లో గాలింపును తీవ్రం చేశారు. ఈ వినూత్న ప్రయత్నంతోనైనా చిన్నారి జ్ఞానేశ్వరి క్షేమంగా తిరిగి వస్తుందని అందరూ ఆశిస్తున్నారు.